Sao o Saina

Tusia Ulimasao Fata ,

30 Hits

Iosefo Lili’a

Iosefo Lili’a

O le tau o le soifuaga I Samoa ua taugata lava, ae fa’afetai lava I Saina ma o latou pisinisi ua fa’amama avega mai.

O le saunoaga lea I le Tama ia Iosefo Lili’a 56 tausaga o lona soifua mai le afioaga o Nu’u Fou. Na aga’i atu le Tama ia Iosefo Lili’a e piki’ina mai lona afafine mai le aoga I le aoauli ananafi ma maua ai lona avanoa e fa’asoa ai I le Fofoga o Samoa.

Ua matua fiafia ma fa’agae’etia le Tama ia Iosefo Lili’a I le fesoasoani mai o pisinisi Saina I le taugata o le soifuaga ua iai nei Samoa.

“Ua faigata le olaga I Samoa nei ona o le taugata tele o soifuaga fa’atusa atu I tupe maua mai galuega ua le fetaui lava.

“O pisinisi Saina o lo’o fa’apena ona maua ai se fa’amama avega mo le lautele I le taugofie o a latou oloa o lo’o iai nei.”

Na saunoa le Tama ia Iosefo e to’afa tagata faigaluega I lona aiga fa’atasi ai ma lona faletua o lo’o fai ana galuega I le latou aiga.

“O le matou aiga lava ia e to’afa tagata o lo’o faigaluega I le taimi nei o si a’u fanau e toalua.

“Ua atoa nei le tausaga talu ona matou me’i mai iinei I Nu’u fou ae ua toititi lava masania ai foi.

“O lo’o fai foi galuega su’isu’i a si ou toalua iinei I le matou fale aua se isi tupe maua mo le tausiga o le matou aiga.”

Na saunoa foi le Tama ia Iosefoi I le fa’amanuiaga ua maua mai I pisinisi Saina ua iai nei.

“Ua avea le omai o nei Saina I le atunu’u ua maua ai se fa’amama avega mo le lautele ona ua taugata tele Samoa nei.

“O leisi itu o le fa’amanuiaga mai le au Saina ua iai nei o le tulaga lea ua maua ai avanoa faigaluega mo le lautele aua le tausia ina lea o latou foi aiga.”

© Samoa Observer 2016

Developed by Samoa Observer in Apia