Seleseleina fua o a matou galuega

By Aruna Lolani 17 May 2017, 12:00AM

O manuia o se tagata latou te seleseleina mai i fua o a latou galuega.

O se manatu fa’aalia lea mai ia Vaovai Fa’amanatu o Afega i lana fa’atalatalanoaga ma le Fofoga o Samoa, e 28 le matua o lona soifua ma o ia o se faifa’ato’aga o fala ai.

O Vaovai, lona uso ma le la tuafafine e faigaluega uma i le va’aiga ma le tausiga o le latou togafala sa atina’eina mai e ona matua.

“E lagona a lo’u loto fa’afetai i o’u matua aua le laua galuega lea sa amatalia i aso ua te’a lea ua maua ai se matou galuega e fai ma o se tasi fo’i o mea e taua tele i o’u matua ma lo matou aiga.

“Matou te fiafia a la e fa’aauau le galuega a o’u matua.

Sa ta’ua e Vaovai o ia e lona tolu i le latou fanauga e to’avalu ma na’o le to’atolu lava o lo’o feagai i le va’aiga o le togafala.

“E tai masina ma tau le fala, o se taimi fo’i na loua lelei a le fala e ai.

“E fa’atau atu fo’i a matou fala i le maketi i le tau $3-00 ma le $4-00 ma e maua ai se matou tupe, e latalata a la i le afe tala se matou tupe e maua. E mafai ona okaina atu ia matou fala pe a mana’omia.

“A na le iai a matou matua, matou te le iloaina fai nei galuega ma ou te le mafai fo’i ona ou faia pe a na fa’apea e leai se fesoasoani mai nisi o uso ma tuafafine.

“O le matou a ia lea aufaigaluega ma e mama ai fo’i se avega pea tu’ulima fa’atasi.

“Ou te le iloaina pe ou te toe fia faigaluega i sesi mea aua o lo’u a ia talitonuga o lo’u tofi a lea ma o se tasi lea o fua fa’ato’aga sa tele le malosi o o’u matua sa alu iai.

“O se galuega faigata mo la’ua, o se galuega faigata fo’i mo matou ae o le mea e pito sili ona matou fiafia ai, matou te toe aai a matou i fua o a matou galuega.”

By Aruna Lolani 17 May 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>