Tusi i le Fa’atonu - Mataupu e uiga i Lafoga a Faifeau:
Faatalofa atu i le paia o le au Faitau ma le mamalu o le Atunuu o mafai ona faitau ilenei Tusi. Ou te faamalulu atu foi pe a sala se gagana, ae ua ou manatu e faaauau pea ona faaalia se lagona i lenei mataupu ona e taua ma tele sona aafia i le tulaga tau le faatuatuaga faa Kerisiano.
O la’u Tusi sa tusia i le Samoa Observer o le aso Sa 9 o Aperila sa ou taumafai ai e faamatala le uiga o le mataupu ua tulai mai ona o aafiaga o Talitonuga Faavae o le faatuatuaga Faakerisiano (Fundamental Christian Belief} ina ia avea ma lu’itai o le au faitofa ao agai atu i le faataunuuina o le finagalo o le Malo ile faalafogaina o Alofa o Faifeau.
O lo’u popolega lea faatagata matua o le Ekalesia Kerisiano lea ou te toe faamatalaina faapea:
O le Faavae Autu o le Faatuatuaga Faa Kerisiano, o loo faataoto mai lava ona faavae i fetalaiga a le Alii o Iesu i lana Ekalesia (Katoliko, Metotisi, EFKS, etc,etc,) “Õ e tala’i le talalelei o le Faaolataga i nuu uma lava ina ia faaolaina tagata uma lava…” ona toe faapea mai lea; “aua nei avea se mea e tasi.. poo se taga tupe, seevae… ae õ a laulau ane se mea ‘ai ona faamanuia lea iai….”
Ona ia toe faapea mai foi lea; “a outou o, ia outou fua mai ni fua e lelei.” O le faalautelega faamataupu silisili la. Poo le faa-Telosia o le Faavae Autu lea o le Faatuatuaga Faa-Kerisiano - ia faataua le faaolaina o tagata. Aua le popole i lo outou ola poo a ni mea tou te aai ai, ma outou nonofo ai.
O le faigaluega na filifili e Iesu e galulue foi i lalo o le taitaiga a le Alii Faaola.
O le faigaluega e ave uma ma lona ola e fai ai le galuega. E le toe foi i le aiga i le afiafi pe a ta le afa o le fa. Sei malolo ma fai nisi feau a le aiga. Pe usu foi i le taeao e tuli le taimi amata ina nei le atoa le totogi. Ae nofo i le mea o iai le galuega.
E fai lava ia mea uma e leai ma se faatalitali pe fia se totogi, ‘a e fia ‘ai alu e fai sau saka.
A e nofo foi i le fale a tutulu, e le afaina, pe avane ni laupola e sulusulu iai, e mafua ai upu a Failauga. Ua e timuia ma faa fale le malu ona o le talaiga o le finagalo a le Atua. O le faamoemoe o le galuega ia fua mai ni fua lelei faale faatuatua.
O le alofa, o le agalelei, o le mata alofa, o le agamalu, ole loto maualalo o le faatuatua.
O le finagalo malie o tagata e tausi le Faifeau, o fua ia o le faatuatua. O le uiga foi lea o le Faavae Autu o le Faatuatuaga FaaKerisiano. Ma o le Faavae Autu foi lea o Aoaoga Faa Kerisiano (Fundamental Christian Teaching)
O le Alofa i Faifeau, o le Taulaga a tagata lotu. O le faiga lea faa EFKS, e tausi ai a latou Faifeau Tausi nuu. Ona o le mativa o le Ekalesia latou te le mafai ona tausi a latou faifeau. Ua le aumaia ai le Alofa i le Ekalesia tele e faasoa atu ai, a ua fai lava i le faiga lea.
A fai la, o le autiloga lea a le au fai tofa i fua lelei ua tulai mai i galuega Autu Faale faatuatuaga faakerisano o loo faia e Ekalesia Kerisiano o se faiga e tatau ona faatulafono ina ia avea ma solitulafono.
O le a le fesiligia lava le matua õia o le tulaga saoloto o Ekalesia i lana galuega lavea’i.
O le tulafono foi lea e mautinoa ai lava o le Ekalesia e pei o le upu a le Atunuu o le a noanoatia ai lauao o Taemanutava’e. O lea ua mafai nei ona aapa mai le Malo e faatulafonoina nisi mea faale Ekalesia e finagalo ai.
O le faiga lava ia faa E.F.K.S. na mafua ona faalau alofa o faifeau ona ole aganuu a Samoa a fai se faaaloalo e folafola, a fai se sua o se faaaloaloga e alaga i fafo. O le auala faa Samoa lea i faailoa ai le loto faafetai ona o le agalelei ua faaalia i le mea alofa ua foai mai.
E leai a se Samoa e le malamalama ai i lea aganuu. A le faia e tupu le toatama’i ma le le fiafia Soo se Samoa moni lava foi e malamalama o lea faiga e leai ma se manatu taufaamaasiasi o iai.
O lea ua faauiga e nisi o le auala e faamaasiasi ai tagata ina ia fai le foai. Ao le uiga lava lena faa EFKS mai le amataga. E leai foi se fesootai o lea fetalaiga a Iesu ma le faalafogaina o Alofa o Faifeau
O le ave o mea a Kaisara ia Kaisara. O loo manino foi i lea fetalaiga le finagalo o Iesu; e le feaiaa’i le Malo ma le Lotu. O mea tau Kaisara e pule ai Kaisara o mataupu tau le faatuatua o mea ia tau le Atua.
A fai nei ae õia mataupu faale faatuatuaga Kerisiano o se aafiaga tügä tele lea i le galuega faale agaga o loo feagai nei ma Ekalesia Kerisiano, o le a le toe saogalumu. Pe mata o le isi lea tulafono o le a sosoo ane ai nei o le fai o lafoga mo taulaga o loo ave nei mo le Ekalesia.
O le Sefulua’i, o le inati lea o le aiga sa Levi e pei ona faataoto mai e le Feagaiga Tuai, ao le Alofa o le vaega lea a le Faigaluega e pei ona faataoto mai e Iesu o le Matai o le galuega mai le Feagaiga Fou.
O le Mataupu ua taoto nei i lumamea, o le faatulafonoina lea o le Fua lelei o galuega faale faatuatua a leEkalesia. O loo taoto nei foi le lafo a Lualemana i se finagalo o le Ekalesia Aoao I lea mataupu
IA MANUIA LE AU FAITAU.
Popo Su’a
Faifeau Toeaina Malolo
(E.F.K.S.)