Tiute o le tamā

By Vatapuia Maiava 16 October 2016, 12:00AM

O le tamā i a Taualeo’o Latū ua 70 le matua o lona soifua o afio’aga o Toāmua ma Lalomauga ma ua maliu le tinā o le aiga i nai tausaga e le’i mamao atu.

E ui la ina ua tu’ua na’o ia ma le fanau, ae na ia saunoa e fa’apea e le avea lea ma auala e tu’ua ai lona tofi fa’atamā e ta’itai lona aiga.

“O lo’o fautua ai lava i aso uma , ina ia faia mea uma ma le loto malie ma le fiafia, o a lava mea ua foa’i i le aso, ia o le fa’afetai lava i le Atua ma galuea ai lava.

“ O manuia lava na o lo’o ola umi ai fanau , o manuia ia mai matua ua mavae ia ma o lea lava e va’ai atu o lo’o manuia le fanau. 

“E ui ina tu’ua e le tinā o le aiga le mafutaga nei ia o lo’o o’u fa’aauauina lava, ma ua tau le a’oa’ia fo’i aua ua matutua le fanau. 

“Ae o lo’o lelei lava nei vaega o le atunu’u, o lo’u iloa i ai e mativa o le tagata lava ia, e le fa’amoemoe i sou uso po o se tuafafine e fafagaina lau fanau ae o oe lava.

“Ia e leai lava se ese’esega i faiganu’u i tua ma nei.

“O le mea lava e tasi, ia o fuafuaga masani lava i totonu o matou aiga, o lo’o solo lelei lava mea.

‘Ia e leai lava ni itu se tele, aua e pei o le  fanau lava o lo’o fa’amoemoe ai itu e tele e lo matou aiga, aua o le lo’omatua ua maliu e le’i leva  atu nei.

“Ua toe lava o a’u ma le fanau o lo’o i le aiga i le taimi lenei, o le mea lava lena o lo’o i ai o le fai lava o mea fa’alenu’u ma le fa’aleekalesia.

“Ia e ta’i fia masina fa’atoā sao mai vaega fa’alenu’u e o’o fo’i i le Ekalesia ia e le fa’amalosi fo’i ni mea fa’alelotu.

 “O lo’o tu’u mai lava le loto o le malie o le tagata, e le fa’apea la a le faia ni mea fa’alelotu o le a le ituaiga vaega e o’o ai, e leai, o le taulaga e fai mai le loto malie ma le loto fuatia ifo a le tagata lava ia. “O vaega fo’i nei se ua leva na fai mai e tua’a ua mavae, o le tautuaina o nu’u , ekalesia ia ua leva ona ola mai ai ma soifua mai ai i le fia o tausaga.

“O lea le agaga tele o lo’o i a te a’u le tamā ina ia fa’apea ona feola ane fo’i fanau, ia aua ne’i te’a ma i latou le tautuaina o vaega nei ma le ekalesi aua o ala ia i fa’amanuiaga i lo latou ola.

By Vatapuia Maiava 16 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>