O lana miti e fia avea o ia ma se Inisinia

Tusia Aruna Lolani ,

53 Hits

FIA AVEA MA INISINIA I LE LUMANA’I: Iosefa Tamaia mai le afioaga o Manono.

FIA AVEA MA INISINIA I LE LUMANA’I: Iosefa Tamaia mai le afioaga o Manono. (Photo: Aruna Lolani)

A e fia manuia, e tatau lava ona e fa’atauaina le galue malosi ma le fa’amaoni. 

O le talitonuga lea o Iosefa Tamaia mai Manono, i lana fa’atalatalanoaga ma le Fofoga Samoa i le aso ananafi. 

E 18 le matua o lona soifua ma na ia fa’aalia i le Fofoga Samoa lana miti e fia avea o ia ma inisinia ma ia mafai fo’i e ia ona taofi le puapuagatia ua o’o ai nisi aiga i lenei vaitaimi. 

O Iosefa o se tamaitiiti aoga ma se ta’ita’i mai le aoga maualuga o Puna’oa. 

“A na ou taumafai i le aoga ona ou te mana’o e avea a’u ma se inisinia i le lumana’i.” O lona manatu fa’aalia lea i le Fofoga Samoa. 

“E pei o le galuega lava lea ou te mana’o e fai pea ou matua, ina ia mafai ona ou fesoasoani a a’u i lo’u nei tagata aemaise foi le tausiga o o’u matua. 

 “Ua tatou iloaina uma lava le taugata o le soifuaga ma e le’o se mea faigofie, o le ala lea o lo’o ou taumafai malosi ai i le aoga. 

“O lo’u tama sa feagai ma le tausiga o lo’u aiga i aso ua te’a, ma na’o ia fo’i sa faigaluega a’o lenei taimi o lea ua to’afa tagata faigaluega. Ae le fa’apea la o le’a ou nofonofo ai ma le faia ai se fa’atatau i lo’u olaga. 

 Sa ia fa’apea mai e mana’o lava ia e manuia lana aoga ina ia mafai ona ia fesoasoani atu i tagata Samoa. 

“Ou te mana’o e fesoasoani i tagata Samoa e fa’amuta o latou mafatiaga. Sa ia fa’apea mai. 

 “Ou te talitonu o le a tele tatou taavale i totonu o Samoa aemaise lava loua fa’ataga mai e le malo ia ta’avale ave itu tauagavale i luga ole auala.  

“Ou te masalo fo’i e alu alu a, taugata ma le faiga o ta’avale.  

“E pei o le tulaga na ou te mana’o ai e taunu’u lo’u miti lea e avea a’u ma inisinia ina ia mafai ona ou faia ta’avale a tagata Samoa i se tau taugofie. Avea ia lena fa’amama avega ina aua ne’i toe popole ai i le tele o fa’afitauli. 

Sa fa’aalia e Iosefa i le Fofoga Samoa e fautuaina pea ia e ona matua e fa’amalosi i le aoga. 

“E pau lava na ole mea o lo’o manana’o mai ai ia te au; o se lumana’i lelei. 

“E mana’o o’u matua e fai lelei la’u aoga aua o le aoga lava le ki ile manuia. 

“Ia o le taimi nei, o lo’o ou taumafai malosi atu ai i lena miti. 

“Ou te le fia ola i se olaga e leai ma sa’u mea aoga sa maua mai le aoga ae ia ou maua se auala e fesoasoani atu ai i nisi tagata Samoa. 

 Na ia toe fa’apea mai e taua lava ia te ia le su’esu’e malosi i le aoga i auala e aosia ai lesi tulaga o lana miti. 

“Ou te talitonu e pau lava lea ole auala, ma o le ou ta’utino atu foi ou te faia lava mea uma mo lo’u aiga aemaise ou matua. 

 “O lo’u tama e ave pasi ma o ia fo’i lesi alagatupe mo le aiga.

“O ia o se tama galue malosi ma ou te alofa tele lava i si o’u tama. 

O feau taua ma se fautuaga lelei na aumai ia Iosefa mo le tupulaga laiti o Samoa, ia outou usiusita’i i matua. 

“E pau lava lena ole auala i le manuia. E le mafai ona tatou ola i le olaga nei pea leai le fesoasoani a lou aiga aemaise lava ou matua. 

“E tatau la ona tatou usiusita’i ina ia tatou maua ai pea lo latou fesoasoani. Tu’u le faitio atu. 

 “A tatou faia lenei mea, o le faigofie fo’i lena o le tatou vaai atu i manuia ua agai mai i tatou ala.”

O Iosefa o ia le ulumatua o se fanauga e to’atolu.

© Samoa Observer 2016

Developed by Samoa Observer in Apia