Fa’atasia auaunaga fa’aSoifua Maloloina

By Ilia L Likou 16 January 2018, 12:00AM

E i ai le talitonuga i le telē ai lea o se la’asaga lelei o lo’o ua silasila ai nei le malo pe a toe tu’ufa’atasi le Auaunaga Fa’ale-Soifua Maloloina.

O lea le saunoaga a le Fa’atonu Sili o le Matagaluega o le  Soifua Maloloina i le fa’atalatalanoaga ma le Leitio Fa’avaomalo i Niu Sila, Leausa Dr Take Naseri.

O nei auaunaga a le Soifua Maloloina ua sefulu tausaga o  tu’u ese’eseina. 

Na ia fa’ailoa e tele nisi o fa’afitauli ua maitauina mai le tu’u ese’eseina ai ma o le mafua’aga lea ua toe fuafua ai nei mo le tu’u fa’atasia ai.

O le fa’aiuga o le masina lenei ua fuafua e fa’atinoina ai lea suiga.

Ina ua fesiligia e le Polokalame ma le 2AP le afioga i le Alii Palemia, Tuilaepa Sa’ilele Malielegaoi po o a ni mataupu i sa latou feiloaga ma le Matagaluega Fa’asoifua Maloloina i le vaiaso ua tuana’i, na ia saunoa ai o se avanoa na momoli ai le agaga fa’afetai i fomai ma e tausi soifua o le atunuu ona o la latou auaunaga fa’aauau pea.

“Manatua o le amataga  lenei o le tausaga e pei ona laugaina i le pulelaa o le isi auala foi lea e masani ona ave ai e le ‘au faigaluega Paia ale Atua i tagata o le tala lelei i tagata lotu, o le taimi lenei e fai ai upu na.

“O le foi o makoi e ese le auala na foi ai ua le toe foi le ala lea na omai ai , aua ua lapatia e agelu a le Alii le auala na omai ai ona o le tele lava le faaletonu o i ai.

“O lae e i ai Herota aua o lo’o fia  alu e asiasi le pepe o le kirisimasi ae leiloa e alu e fasioti le pepe o le Kirisimasi.

“Lea e fai ai le feau e sui le tausaga sui auala, o le auala lena o le ala lena na ala ai la matou feiloga ma alii ma tamaitai tausi mai, ia ma toe matimati galuega o lenei tausaga afai na i ai ni faaletonu le la tausaga ia tuu ese i lenei tausaga.

“O le fa’amalosiau lena ale malo ma a’u le ta’itai le malo male kapeneta e fa’afetai ai aua e seasea maua ni upu faafetai i lo tatou falemai, aua o le a le lelei o le falemai ae faitio faitio lava tagata.

“Ia e le mafai ona fa’amalieina tagata uma, ae aofai ai ma tatou uma , o tagata o le malo, e le ese ai Samoa.

 “E faapena i atunuu uma temokalasi e fulusia e tagata toatele le fa’afoeina o le malo e saoloto ai lava tagata e faitio, o uiga ia o faigamalo temokalasi o le saolotoga i o latou lava finaglao o le uiga la lena o si a’u fa’amalosiau.

“E tele le mau fuafuaga a lo tatou malo o fuafua i lenei tausaga aemaise o le tausaga nei.

I le atoa ai o le 100 o le tautua a Teine Tausi Soifua i le tausaga ua mavae na saunoa ai foi le agaga faafetai a le afioga i le Alii Palemia i lenei auaunaga i totonu o le atunuu.

“Ae le uma pea le agaga faafetai, pe a manatu i lenei aso ma le faamoemoe, ua tatou potopoto mai ai, o le faamanatu lea o le 100 tausaga o le tautua ma le auaunaga faa-Tausi Soifau i totonu o si o tatou atunuu.

“Tatou te manatua ai lava ma le loto faafetai tele i le Atua, ona o i latou o e sa mua’i asa le gāsū o le taeao. “O faletua ma tausi, o tina ma tama’ita’i o augafaapae faapelepele a aiga, afioaga ma alalafaga, i latou to’agaogao, loto tetele sa mua-i-malae i le faatinoina o lenei auaunaga.” “I latou sa gasea ma le le faalogologotiga, le fefefe ma le solomuli i le faatinoina o o latou tiute ma faiva faa-Tausi Soifua. Amata mai lava anamua, i taimi tonu a o vevesi le lalolagi, i taua tetele i tausaga ua mavae, lea na aafia tele ai ma Samoa. “Le taimi a o puleesea si o tatou atunuu e malo mai fafo.

“E manatua foi ma le alofa i latou ia ma Tausi Soifua uma i le faagasolo mai o lenei 100 tausaga ua atoa. “I latou ua saga mai i a pouli le folauga, ua tofafa mai tiasa, faapea foi nisi o e ua malolo manumalo, ina ua afu la latou tautua.

“E tautala aso pea lo latou taua, la latou tautua sa tuuina mai mo Samoa ma ona tagata. “E ui ina sa to’agaogao le aufaigaluega, sa utiuti foi ma laiti o latou totogi. “Sa le lava mea faigaluega e faatino ai la latou auaunaga, ma le lelei auala o femalagaina ma feesootaiga. “Sa vaapiapi lo latou silafia o le galuega ma le oo oo lo latou tomai ma le malamalama i le maualuga moomia ona sa le tele ni avanoa e saga tapu’e ma faafailele lo latou silafia i le faatinoina i le lelei aupito silisili, o tiute ma faiva alofilima faa-Tausi Soifua.

“I le faagasolo mai o le soifua ma le tula’i mai o le Malo Tuto’atasi o le atunuu, sa le ‘ela le silasila a Ta’ita’i le ave pea o le faamuamua i vaega ia aua lava se Samoa soifua maloloina.

“Taimi nei, e le o laaloa le silasila a le Malo i le lotoifale o le tafafa ina ia saga faaleleia pea ma siitia maualuga itu tau soifua maloloina ma tulaga tau aoaoga. “O le manulauti tauave pea lava pea a lo tatou Malo ia tumau ai pea ona avea Samoa ma ona tagata o se atunuu manuia.

“Silasila foi, o lea ua fou a tatou falema’i. “Ua faaleleia le tele o auaunaga faasoifua maloloina, ma ua siitia maualuga foi totogi o le aufaigaluega a le Malo, e aofia ai ma outou o Tausi Soifua. Silasila i fuafuaga tuutuumamao a le Malo, lea ua aoaoina ai ana lava tama fanau, o foma’i ma tausi soifua i totonu lava o tatou lotoifale i le Iunivesite Aoao o Samoa i le Papaigalagala. “Tele foi isi avanoa faavaitaimi i Samoa nei ma atunuu mamao, o le faamoemoe autu lava ia saga tapena ai o tatou lava tagata foma’i ma tausi soifua ina ia faatino le galuega lea i le lelei aupito silisili

“Le asō, ua tatou faamanatuina le atoaga o le 100 tausaga o le tautua faa-Tausi Soifua i Samoa nei. “O le fesili: O le a sau silasila oe le Tausi Soifua Samoa? O le atoa ai o le 100 tausaga o le auaunaga; ua 100 pasene ai ea le atoatoa o lau tautua ma le faatinoga o ou tiute faa-Tausi Soifua mo lou atunuu?

“Ou te talitonu o le tali o ia fesili ma le faamasinoga amiotonu, e maua mai lea i le mamalu lautele o le atunuu. “O tamā ma tinā matutua, o ulugalii, o failele ma pepe, o fanau iti ma soo se Samoa e sulufa’i atu i ou aao ua faapea ane “a! – ua ou ola” – Oe le Tausi Soifua Samoa, mo sau fesoasoani. “Pau lava lea, e fia soifua malolo ma o le taimi e vaaia ai le tausi soifua e totogo a’e ai foi ma lagona o le fiafia

“E mausali le faamoemoe o le Malo ua lava tapena le vasega o Tausi Soifua o Samoa mo le faatinoina o tiute ma faiva ma le auaunaga faa-Tausi Soifua e pei ona faatulafonoina ai i totonu o lo tatou atunuu.

“A ua matauina foi ma le popole nisi o vaivaiga ua tau alia’e mai e ono avea ma lape, e afaina ma vaemanua ai le galuega faa-Tausi Soifua, e tuuina atu mo le mamalu o si o tatou atunuu.

“O le fautuaga: Soia ia le aumaia uiga faaletagata e nunu ai le to’au aua galuega e tatau ona fai ma aua lava nei outou faoa le anava a le i’a lea o le apoa, e toe fetuia’i lava latou, aua e leai sa tatou mea lelei e maua mai ai. “Na o le atili tigaina ai o gasegase ma saga mama’i ai le atunuu o loo sulufa’i atu i o outou aao lavea’i, foliga ma le leo malu e faalototele, faamafanafana ma faamalosi’au e mulia’i asiasi le foma’i, a o le tausi soifua i taimi uma lava o le toomaga ma le mapusaga i tigā.

“O upu faai’u o lenei taeao:

“Le Sosaiete Tausi Soifua e, ia lava papale i se aso, se taimi o le a faataunuu ai lou tou faamoemoe, ua asoa o outou lavasi i ai. “O se maa faamanatu o le 100 tausaga o lau tou tautua.” O se maa faamanatu e mautu ma aoga mo Tausi Soifua ma tagata lautele, e tu matila i le silamaimoa e aoga mo fuafuaga mamao uma lava eseese a le tou Sosaiete a Tama’ita’i Tausima’i o le asō ma ēluā.”O le a lea faamanatu sili? O se Hall tele fou lea aua ua pumoomoo ma ua pala foliga o le Hall o iai nei. Lau Afioga i le Minisita, fai ma au faamuamua le folafolaga lenei a le Malo ia faatino i totonu o le isi tausaga faaletupe o le a sosoo nei. “Tautuana i lau afioga i le Minisita ia ‘aua ‘aua lava nei tuua’ia le Malo i le lafo o upu ae le tuā.

O lea le agaga e tasi na saunoa i ai le Minisita o le Soifua Maloloina i a Tuitama Dr Talalelei Tuitama.

“E ia te a’u le agaga fiafia ma le faafetai tatou te mafuta ai i lenei taeao i le faalauiloaina aloai o Taiala mo le ausia o tulaga maualuluga i le tomai ma le auaunaga Faatausi Soifua i Samoa nei.

“Ou te momoli atu le faamalō ma le faafetai i le Matagaluega o le Soifua Maloloina (MOH) ma le Fono Faatonu a le Auaunaga Faatausi Soifua ma Faatosaga mo lenei galuega taua. “O loo faatulaga mai ai matati’a e moomia ona ausia i le tulaga tau i tomai a’oa’oga, tomai tau i le faatinoina o le galuega faatausi-soifua, tomai e ausia ai tulaga maualuluga ma matagofie e faatino ai le galuega faatausi-soifua ae faapea foi le tomai e faatino ai le galuega faatausi-soifua i se tulaga saogalemu mo i latou uma o le a faatino i ai le galuega faatausi-soifua.

“O lenei taiala ua tuufatasia ina ia faamautinoa ai le saogalemu o tagata uma o le a faatino i ai le galuega faatausi-soifua a ia faatino foi lenei galuega i ni auala aloaia ma faatamalii.

“O loo tuuina atu i totonu o ni taiala tulaga manino e ao ona faatonutonu folau ai le faatinoga o le galuega faatausi-soifua a’o faafeagai ai ma tagata lautele, o gasegase ta’ito’atasi o aiga o e o loo faatino iai lenei auaunaga, aemaise foi o le va ma le isi tausi soifua.

“O lenei foi Ttaiala o loo faamauina ai tomai ma mautinoa lo latou lelei ma le aoga sa matauina i le faatinoga o lenei auaunaga i fita ua sola, ma ua mautinoa e mana’omia e i latou uma o loo faatinoina lenei auaunaga o le tausi soifua i taimi uma.

“O nei Taiala ua ma’ea ona toe iloiloina ma toe fetuutuuna’i ina ia o gatasi ma fesuiaiga ua iai le faatinoga o le auaunaga faatausi-soifua i nei ona po. Na gata mai le iloiloina o nei taiala i le tausaga e 2007.

“Ou te fautuaina tausi soifua uma ina ia faitau i ai ma tauloto nei taiala o loo faailoa atu ai auala aloaia ma amio pulea e faatinoina ai lau galuega faatausi-soifua aua o le le usita’ia o nei taiala e ono auala mai ai ni moliaga faaletulafono faasaga i a te oe e tusa ai ma le Healthcare Professions Registrations and Standard Act 2007.

“I lo’u tulaga Minisita o le Soifua Maloloina, ou te tuualalo atu ai ina ia faamuamua le tagata ma’i ma e uma o loo faatino i ai lau galuega i taimi uma.

“I lou faatino ai o lenei galuega i se auala maualalo, faaaloalo ma le alofa e atagia ai le maualuga o lou a’oa’oina ma le maualuga o le silafia faatausi-soifua ua e ausia.” O le faatumauina ai pea le tulaga maualuga, mamalu ma le tausaafia o le auaunaga faatausi-soifua sa tauasa mai e i latou na mua i malae ma asaina le gasu o le taeao o loo ua lago mai ti’asa ma saga mai i aopouli.

“O loo e tauaveina le mitamitaga o e sa tautuaina Samoa ma le le faalogologotiga, ae faamaualuluga ma mimita i le avea ai o i latou ma tausi-soifua

“Ia soo le fau ma le fau 

“Aua ne’i tō’ele’ele le afu maligi o ō tatou tuaa.

By Ilia L Likou 16 January 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>