“ Ia outou lelei ma le Atua”

By Rev. Petaia Setu 15 July 2018, 12:00AM

( 2 Korinito.5:20)

E maua se maopoopoga i le fematea’i? Se faailoga o le fealofani le felotoa’i? A o ai le tagata na te fia faatau le va ma le Atua? Ua uma ona faaleleia e le Atua o i tatou ia te ia talu Iesu Keriso, ua tuuina mai foi ia te i matou le galuega o le leleiga. O lenei, o sui i matou o Keriso, ia outou lelei ma le Atua.

O nai faaletonu ia o loo iai le galuega i le ekalesia i Korinito. E ui o le toatele ua toe malamalama ma foi mai i mea sa a’oa’oina ai e Paulo, peitai o loo iai pea se isi vaega o le ekalesia ua avaga atu i le valea o loo taitaiina sesē ai e a’oa’o pepelo o le lotu Iutaia. O loo ua tautala le aposetolo e faamalamalama le uiga ma le tulaga o lana galuega molimau i le faaolataga a Iesu Keriso. I le, ua faailoa mai e Paulo mea nei e lua e tatau ma ‘e manaomia e tusa ma lo tatou ola ia Keriso: o le faafouina, ma le faaleleiga.

O mea ia ua tā’ua, e tasi lo la faavae; o Iesu Keriso. E faafou ia Keriso; e faalelei ia Keriso. A o mea foi ia e lua o loo naunau Paulo e toe fausia ai le olaga o le ekalesia ia Keriso, aemaise lava i latou o loo faaletonu o latou manatu. I latou ua maua i mailei a le au failotu o le lotu o Iutaia ma ua latou faaleagaina ai le tulaga faa – aposetolo a Paulo, ma ona tofi molimau o le talalelei a Iesu Keriso. Latou la ia o loo manaomia ona toe faapupula i le upu moni ma toe faafoi i le faatuatuaga iā Iesu Keriso. Ae faapefea la ona toe faafoi i le Alii? Fai mai Paulo, ia outou lelei ma le Atua. Faalelei ma le Atua. Amata i le salamō. O le salamō o le faamatalaina o lou tagata ua sui.

Ua lagona i lou loto lou sesē. Ua e inoino i lou olaga tuai. Ua e sola ese mai le pouliuli. Ua e saili i se olaga fou. Se olaga fiafia o iai le saolotoga. Se olaga mamā. Olaga e maua iai le mafanafana o le alofa. A maua alofa, ona moni lea o le salamō. A maua salamō, ua mautinoa foi loto maulalo. E tupu mai i le loto maualalo le loto faamagalo. A o le loto faamagalo, o le taula’iga lea o le alofa. (Luka.6:28; Mata.5:44; Luka.23:34). Samoa, o la’ei na o “faafouga” ma “faaleleiga”.

O le gafa lea o Leleiga. E le mafai la ona maua e se faresaio pe ola ai foi se faifeau o le lotu Iutaia auā ua na ona mafi i le tulafono. E lē taulia i tulafono a Iutaia se gafa faapea! Ia, ae faapefea tatou? O le tali masani lava a tagata uma, Manuia lava, faafetai. Poo le a lava le tetele o faafitauli, o le tali lava lea. E tiga lava ona tau oti, o le tali lava lea.

Oka, o le tele ia o faaletonu na o loo i lou olaga. Faalelei oe ma le Alii lou Atua. Le au uso e, ia outou lelei ma le Atua. E lē mafai ona e saoloto vaganā ua oulua lelei ma le Atua. Se ā se auala e faalelei ai oe ma le Atua? E le o le Atua e faalelei ma oe – o oe. O oe le tagata pepelo, faamaualuga, sauā i fanau a le Atua. Oe le tagata taufaaleaga, faatuputupu leaga, faomea, faotane, fao avā, mulilua. Oe le taufaavalea, le gaoi ma le lē popoi, le fasioti tagata, ma le faatautala, ma a’u le tagata agasala! Ia faalelei tatou ma le Atua.

Faafetai i le tōfā mai anamuā na faavaeina se auala mafanafana e fefaamagaloa’i ai e ala i le ifoga, ua faatupuina ai le leleiga i le tu ma le aga faa Samoa. O Leleiga na afua mai ina ua to’amālie le fesilafa’iga a Loto Maulalo ma Loto Faamagalo. O le ala lea o tatou, tatou tagata toilalo. Salamō, ma tootuli i luma o le Atua ma le loto maulalo. Le loto ua momomo ma le loto ua sa’o. Le loto ua fausia e le alofa. Ua saili i le faaleleiga ma ua gālala i le saolotoga.

E lē fesiligia le tōfā fa’apalepale a le mătua faitama. O le Atua o le alofa lava ia ( 1 Ioane.4:16). Na te faamagaloina au amioleaga uma lava (Salamo.103:3). Na te foaiina mai le alofa tunoa i ē faamaulalo ( 1 Peteru.5:5,6). O loo talitalia tatou e lo tatou Tamā i le ao ma le po ma aso uma lava. O loo fofola mai ona aao e fia opogi oe, ma sogi atu ia te oe, ma faa’ofu oe i lona mamalu ma lona matagofie, i le itu aso e te salamō ai ma foi atu e faalelei ma ia (Luka.15:20).

Le au uso e, o manu’a o le galuega e le mai fafo, a o manu’a lava i fale. O manu’a sili ia ona taugā. O lotoifale faale ekalesia. E sa’o ai se isi lapataiga o loo sau i le TV Samoa, Sole, ua koe oki lava kakou iā kakou! O ē ua aoaoina ia Keriso ma ua malamalama i le talalelei, ua siligia agavaa o Paulo a o fea foi e aumai ai lona tofi! (1 Kori.10:10). Se i vaai pe le o oe le isi o loo fesēa’i atu ai i lea pogisā? E faapefea ona e alofa i le Atua ae o loo inoino i lou tuāoi? O fetaui lou toaga i le lotu ma mafutaga tatalo ae tala va i le isi uso a tagata? E faapefea ona e laugaina le alofa faamagalo o le Atua, a o le taulamalama ma le fia taui ma sui o oe lava o loo taulamua?

Samoa e, ua uma ona fai e le Alii o Iesu Keriso le leleiga o oe ma le Atua. Ua leva ona fai e Iesu o lea faaleleiga i luga o le satauro. O le upu satauro i le mataupu nei, o lona uiga, o tiga, o puapuaga, o le mamafa, o tuuaiga, o sauaga, o faifaiga ma tauemuga, o faiga leaga uma e fai ia te oe, onosai e amo. Inu iai. O ala na o le faafouga. O fitā na o le leleiga. E le faia e le Atua – o oe e faia. Ua uma ona aumai e le Atua le faataitaiga e ala ia Iesu Keriso. O le taimi lenei o oe ma a’u. Fai mai le aposetolo, ua tuuina mai foi ia te i matou le galuega o le leleiga. O le galuega fa’aāuāu, o oe e fa’aauaūa. Fai oe ma sāvali a Keriso i galuega o le leleiga. E faama’ite e oe, ma totonugalemu ia te oe. E leo ia te oe, ma tino ia te oe. O le āta lena sa fofola e Paulo ia Korinito. Na saunia e Iesu, na faia foi e le aposetolo.

O Paulo, o le auala lea o le Atua i loto o le ekalesia ina ia faatupuina ai le iloa lelei ma le malamalama i le Atua, e ala i le salamō e toe fuataiina ai i se olaga fou ia Keriso (f.17). A o le faitoto’a foi lea o Korinito i le Atua mo le leleiga ma le Atua (f.20). A malamalama, e iloga maopoopoga. A talitonu ma faatuatua, e fealofani ma tutū faatasi mo le galuega a le Atua.

Samoa e, “o sāvali i matou a Keriso.....matou te ole atu, o sui i matou o Keriso, ia outou lelei ma le Atua”  Amene.

 

7737063/7783782

By Rev. Petaia Setu 15 July 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>