Ripoti mai Leoleo

By Ilia L Likou 15 March 2018, 12:00AM

(PEPA FA’AMATALAGA) O le aso Sa 11 o Mati na ripotia mai ai e le falemai se alii o lo o taoto i le falemai ma ni ona manuaga tuga i lona tauau, o le ua, faapea ai ma ona fofoga. Na faia uluai suesuega a leoleo ma taofia ma molia mai ai se tamaitai 23 tausaga  i lona taumafai lea e faaoo le oti (attempted murder) i lenei taulealea ma o lo o taofia nei i lalo o le vaaiga a leoleo seia aulia le aso 26 o Mati e tulai ai o ia i luma o le faamasinoga. O lenei alii o lo o taofia pea i le falemai ona o le tuga o ona manuaga ma e 17 tausaga lona matua.

2. O le aso lua 6 o Mati 2018 na faaulu mai se tagi a se tamaititi aoga o le Robert Louis Stevenson e faasaga i se faiaoga i lona faaoolima lea ia te ia. Na faia suesuega a leoleo ma taofia mai ai se alii faiaoga i le aso faraile na tea nei ma molia ai o ia i le faaoolima. Ua toe tatala nei o ia i tua ma e tulai i le aso 27 o Mati i luma o le faamasinoga. O lenei faiaoga e faapea o se alii aoao ua faauu mai o ia i le aofa faafaifeau mai I Malua ma o lo o faiaoga nei o ia i lea aoga. 

3. O le aso 5 o Mati na tulai mai se faalavelave tau taavale i Falevao na fetoai ai se Dyna ma se Toyota van. I uluai suesuega a leoleo na masalomia ai o le telefoni feaveai na mafua ai ona tulai mai lenei faalavelave. E toalua nisi o le pasese o le Dyna na manunua ai ma taofia ai i le falemai. Ua toe tetea nei i tua i laua nei mai le falemai. Ua molia nei foi e leoleo le alii ave taavale o le van e 25 tausaga o Saleaumua i le ave taavale faatamala ua oo ai le manua (negligence driving causing injury)ma e tulai i luma o le faamasinoga i le aso 27 o Mati e tali i ona moliaga.

4. O le aso 8 foi o Mati na tulai mai foi se i si faalavelave tau taavale i Tiavi lea na fetoai ai se Dyna Izusu ma se Ford explorer. O le uluai suesuega a leoleo na masalomia ai le saoasaoa o le ford explorer na mafua ai lenei faalavelave. E toatolu nisi o le pasese a le Dyna na taofia ai i le falemai ma toe tetea ai i tua i lea lava aso. Ua molia nei e leoleo le alii ave taavale o le ford explorer mai Faitoo-uta i le ave taavale faatamala (negligence driving causing injury) ma e tulai i luma o le faamasinoga i le aso 27 o Mati e tali i ona moliaga.

5. O le aso 10 foi o Mati na tulai mai foi se i si faalavelave tau taavale i Moataa i luma o le Apia Park ina ua soa ai e se taavale ituaiga o le Ford se taulealea na ia kolosia le auala . Na auina atu lenei alii i le falemai ma o lo o taofia pea o ia i le tuga o ona manuaga. Ua molia ai nei foi e leoleo se tamaitai 37 tausaga o Nuu-fou ma Talimatau i le ave taavale faatamala ua oo ai le manua (negligence driving causing injury) ma e tulai o ia i luma o le faamasinoga I le aso 27 o Mati e tali atu i ona moliaga.

6. O le aso Sa 11 o Mati 2018 na molia mai ai foi e leoleo se pule aoga mai i se kolisi e mai le itumalo o Faleata i moliaga o le osofaiga mataga (indecent assault) i ni uiga sa faapea o lo o masalomia ai o ia sa ia faia lea i se tamaititi o lenei aoga. E tulai o ia i luma o le faamasinoga i le aso 27 o Mati e tali atu ai i ona moliaga i le maea ai o suesuega.

7. O le aso 8 foi o Mati na faaulu mai ai se tagi a ni tamaiti aoga mai le kolisi o Avele e faasaga i le o lo o pule lua ma se tasi faiaoga i le kolisi lava o Avele. Na faia suesuega a leoleo ma o lea na molia mai ai i le aso nei le pule lua o le kolisi o Avele i lona faaosoina lea o se tasi e fai se soligatulafono (parties to offences) ae o le alii faiaoga ua molia nei i le faaoolima i nei tamaiti aoga. E tulai i laua uma nei i le aso 3 o Aperila 2018 e tali atu i o laua moliaga.

8. O le aso Faraile 9 o Mati na faatoai mai ai se tagi a le kamupani a le Samoa Planet e faasaga i le api o foliga (facebook page ma le blog)a le OLP poo le Ole Palemia. O lenei mataupu e faapea o lo o tuuaia ai lenei kamaupani i ni faamatalaga sese ma le le sao ua tuuina lea i luga o lenei facebook page e se tagata e faasaga i lenei kamupani. O lo o faia nei i ai suesuega a leoleo ma e leai se tasi ua molia mai ai i lenei mataupu.

9. O le aso toonai 10 o Mati 2018 na molia ai e leoleo i le moliaga o le faomea matuia (aggravated robbery) ni alii se toafa lea sa sailia mai i le vaiaso ua tuanai atu e tusa ai ma se taavale laupasese na latou ave faamalosia ma tuuina ai le ave taxi le tama 64 tausaga o Vaivase i tua o le keli o lana taavale lau pasese. O nei alii e toafa e 19 tausaga o le tasi ae o le isi toatolu ei luga ifo o le tai 20 tausaga le matutua. O lo o taofia uma i latou nei i lalo o le vaavaaiga a leoleo e faatali ai le tulai ai i luma o le faamasinoga i le aso 9 o Aperila e tali i o latou moliaga.

By Ilia L Likou 15 March 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>