Galue malosi mo le lelei o aiga

By Fetalai Tuilulu’u 15 March 2017, 12:00AM

E leai se mea e faigata pe ā maioio lelei ma silafia le fa’atulagaga o tulaga tau le olaga. 

O lea le manatu o le tamā ia Luki Vaiula, 40 tausaga le matua le soifua mai le afioaga o Tiavī i le lā fa’atalatalanoaga ma le Fofoga o Samoa le aso ananafi. 

O le alagatupe o lo’o fa’amoemoe ai le tamā o le maumaga lava. 

“O le tulaga lava lenā o lo’o iai le taimi nei, a le aunoa ma le maumaga e tua iai e leiloa pe fa’apefea ona tausi le fanau ma le aiga. 

“Ia na ota iloa lelei le tulaga e o’o iai le aiga pe a le galue malosi, e u’i lava i le ola falõlõ ma le ola fa’amoemoe, o lea foi le tulaga e vatu ai se manatu ina ia silafia lelei lea itū.

“O le lumana’i si o matou aiga e fa’amoemoe lava i tupe maua mai le maumaga, o a’u lava lea e gafa ma le matafaioi lea o le galue le ma’umaga ma la’u e fa’atau le maketi.

“Ua leva ona matou nonofo i nei ae o le tulaga lava lea o lo’o iai nei o le ola ai tupe maua le maumaga. 

“Ia ua masani ai foi, aua o le mea lava sa tua lava iai le taugata le soifuaga, ae le faitioina foi le taugata le soifuaga ona o le atunu’u o tatou o le atunu’u atia’e e talafeagai lava le soifuaga ma le olaga alualu i luma o lo’o iai nei. 

“Ia e le’o na’o le pau lea o lo’u maumaga o lo’o iai foi le isi vaega i gauta ma o lo’o ola lelei foi. 

Sa taua e le tamā ia Laki na faigaluega muamua a’o nofo i Tutuila peitai ina ua omai nei ma lona to’alua sa le ona fai le matafaioi o le fatu aiga tausi e ala i le maumaga. 

“O le tupe maua lā e lava lelei ma totoe mo le fa’asoa i le fanau aoga ae maise o mea fai ma mea’ai foi i aso taitasi. 

“O le itu e sefe ai ma lava le fa’asoa ona o le lēai o ni mea fai le nu’u, e leai ni faiga nu’u i nei. 

“Toe faigofie mea uma ona o tulaga lelei i le suavai ae maise foi le eletise. 

Ae ui lava i lea e iai lava tulaga o lo’o fia manaomia ai le fesoasoani ona o tulaga i fefa’atauaiga o meamata. 

“O matou e lelei lava mea uma peitai o auala femalagaina i le la’uina o meamata le makeki e faigata ona o le mamao mai tua nei ma le taulaga. 

“E taugata le totogi o le ta’avale e ave ai meamata a ave foi le pasi e taugata foi. 

“O le isi foi itū e na’o a’u lava le tagata e galue, e faia to’atasi lava le fatuaiga e leai se tasi e fesosasoani, a o’o foi la na ma’i ua leiloa po fea a maua ai se fesoasoani. 

E ui ia vaega o Luki o se tama tautua lotu. 

“Ae soia ia, o le Ali’i e alofa tunoa, o lo’o ia silafia foi tulaga o lo’o iai si matou  aiga nei. 

“O ia foi e ona le malosi fa’asoa mai.

By Fetalai Tuilulu’u 15 March 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>