Le mautaga i le faigata o le soifuaga
O le lelava ai o le totogi e maua mai le galuega e tali atu ai i le taugata o le soifuaga o se faafitauli e le’o mafai ona maua se fofo.
O se tasi ia o manatu mai le tamā ia Solomona Kolio, 38 tausaga mai le afioaga o Sogi ma Fasito’o-tai.
Sa taua e Kolio o le soifuaga ua iai nei Samoa ua lē toe taugofie ma ua atili faigata ai lava ona o le lelava o le totogi e maua mai.
“E toalua tagata faigaluega a lo matou aiga o loo faigaluega mo le tausiga o lo matou aiga I le itu tau le seleni.
“O au ma le tuagane o lou toalua o loo fesoasoani lea I le tausiga o si o matou aiga.
E maua atu e le Fofoga o Samoa Kolio o loo agai atu i lona maumaga aua le tapenaina mai lea o le To’onai a lona aiga mo le Aso Sa ananafi.
“O le utiuti ai o le fa’asoa o se fa’afitauli lava lea mo ia ma lona aiga ona e na’o le toalua i laua o loo galuelue.
“O au o lo’o tausia si ma fanau e toafa ae o loo iai le faamoemoe o le tausaga nei o le a faaaoga ai le isi toalua.
“O le faatinoina o faalavelave faale-aiga ma mea faale-ekalesia o nisi ia o faafitauli o loo faaopopo mai ona o le seleni lava e faamoemoe e faatino ai ia vaega uma.
“O le tulaga lelei o loo iai le ma’umaga o loo fesoasoani mai.
“E le faatauina fua o le faatoaga ae o loo faaaogaina lava lea mo le gasesega o taumafa a lo matou aiga mo lea aso ma lea aso.
“E pei lava o le asō, lea ou te agai atu I le ma’umaga mo le tapenaina mai o se To’ona’I mo le Aso Sa. O se tasi lea o itu o loo faapena ona faasaoina ai foi le seleni mai le faaaluina I le faatauina mai o meamata mai le maketi.
Sa faailoa foi e Kolio e na’o le tolu lava aso e faaaogaina ai lona totogi.
“O le soifuaga lea ua o tatou iai matuai faigata ma taugata ae faafetaia lava ona o lea iai le ma’umaga o loo maua mai ai se isi faamamaavega.
O le ala lea e le tatau ai ona o tatou tilotilo e saili nao galuega ae e ao foi ona galueina le laueleele e fesoasoani I le tausiga o le aiga.