E mamā se avega pe ā loto e tasi
“Ia e le fa’alagolago tele fo’i i nai fanau faigaluega i lenei vaitau ona ua tatou molimauina lava le taugata o le tau o le soifuaga.” Fa’aifo Leiluao Falelauniu, 54 le matua o le soifua o Falelauniu.
Na ia fa’ailoa o le faigofie o so’o se galuega o le galulue fa’atasi.
“Ia e pei o lea lava le fa’amoemoega o lo’o i ai le taimi lenei, ia o a mea ua mafai ona maua mai le lauele’ele ia o le aumai lava e fa’atau i luma nei.
“E le’i leva si o matou maketi i luma i’inei, ia e le’i tele fo’i nai tagata o lo’o ua i ai o latou iloa o lo’o i ai si o matou maketi i tua nei.
“Ia e le tele lava ni vaega e pei ona ua la’u , o aufa’i, avoka o esi ma isi o le fa’amoemoega lava ia mafai lava ona ola lelei nai aiga.
“O nei tupe uma ia o lo’o fesoaosani malosi mo si o matou nei fo’i aiga mai lea taimi i lea taimi.
Na ia fa’ailoa e le’o iloa se tele o se tupe e mafai ona maua ona fa’atoa amata la latou maketi.
“O lenei taeao e le’i tele ni fa’atau, ae o le itu fa’afetai ia o lo’o ua amata.
“O le taua lena, o le vave na amata, ia o a lava tupe e maua ia o lena lava, ae masalo o le vaiaso o lo’o lumana’i ia fa’atoa tele mai ai tagata e omai e fa’atau.
“I a te a’u ia, ia e alu ai lava i le taimi lenei atonu fai mai le isi toeina e ‘fai fai lava nice’.
“E leai se isi itu e pito sili ona taua , o le tu’u i ai le loto i so’o se fe’au e fai.
Na ta’ua e Fa’aifo e tele lava nisi o vaega o lo’o ia va’ava’ai i ai e aoga ai tupe mai le maketi.
“Ia e pei ona ta’ua muamua, ia o a tupe o le a maua o le a fesoaosani le tau togitogiina ai o fanua o lo’o nonofo ai nei.
“E le gata i lea, ae o lea ua toe amata aoga a le fanau, ia o le isi lea itu e fia ave ai le fesoasoani.
“O mea’ai, o mea e fai o aiga, aua ua le asa lava se aso ma le mau fa’alavelave.
“Ia fa’aopopo atu ai loa i le fa’amoemoe i lugā ia ona saga manuia ai lava lea o fanau, aiga, nu’u ma le atina’eina o ekalesia o lo’o galulue ai.