LAUGA - “O ia ua outou tapuai iai ma le le iloa, ou te faailoa atu ai ia te outou.”

Tusia Rev. Petaia Setu ,

134 Hits

Petaia Setu

Petaia Setu

(Galuega 17:23 )


O le Aso Sa lenei e masani ai i tausaga uma ona leoleoā ai tamaiti ma faasufi ai e matua fanau e fai a latou tauloto. Ua oo mai lava i ona po nei, o loo uuna’ia pea tau lava ina tautala, pese, ’e’ē  ma faa-taga, e aunoa ma se malamalama.

Ua faapea foi ona tapisa o Atenai i le Atua o tagata Iutaia ma le le malamalama pe se ā lea ituaiga atua? Auā ua tusia i luga o le fata upu ia, MO LE ATUA E LE ILOA! I le ua tulai Paulo ma faailoa atu, “O ia ua ma outou tapuai iai ma le le iloa, ou te faailoa atu ai ia te outou.”

Ua le manatu le aposetolo e toe faaopoopo atu se isi foi Atua fou i le aai nei, a ua tautala e faamalamalama ia manino lelei tagata uma i le ATUA E LE ILOA. O le Atua lea e muamua lava ona a’oa’o ai le tama ma le teine Samoa pe a amata ona tautala, O ai na faia oe? O le Atua lea na ia faia le lagi ma le lalolagi ma mea ua tumu ai. O le Atua e le vaaia e mata o tagata. E soifua lava ia mai le vavau e oo i le faavavau.

O le Atua malosi; o le Atua Poto; e aoao lana pule i le lagi ma le lalolagi. O le Alii ia o le lagi ma le lalolagi. E ifo ia te ia tagata uma; e auauna ia te ia mea uma, auā o lana lava galuega i tatou uma. O le autū o le molimau a Paulo, e tasi lava le Atua moni e toatasi.

Faapei ona folafola e perofeta anamuā, “Auā o loo faapea ona fetalai mai o Ieova, o lē na faia le lagi; o ia lava o le Atua; o le tufuga o lē na faia le lalolagi; o ia na faatumauina; na ia le faia fua; na ia faia ina ia ainā, o a’u o Ieova, ae leai se tasi.” (Isaia. 45:18) Ua fetalai mai le Atua, “O a’u o Ieova, ae leai lava se tasi; e leai se Atua, na o a’u lava... e afua i le mea e alu a’e ai le la, e oo i le mea e alu ifo ai, e leai se tasi ua na o a’u; o a’u o Ieova, ae leai lava se tasi.” (Isaia. 45:5-7)

O Atenai o le laumua lea o Eleni (Greece). O le nuu lotu. E tapuai tele ona tagata (f.22). E tele atua eseese i totonu o le laumua nei ua vaevaeina ai le olaga tapuai o ona tagata. Peitai ua na o ni tupua ua ta ae leai se ola o iai.

O atua ua faia e tagata. A’o le Atua e le iloa, o le Atua na ia faia le tagata. O ia te ia le ola ma le malosi o mea uma na faia. O le Atua moni lea. Ua na o lea le Atua moni e toatasi o loo faamamafaina i le faamalamalamaga a le aposetolo nei. Ia manatua foi e pei o le poto lava lea o loo laualuga i le lalolagi i na ona po, o loo faalagolago pea iai le tele o aoaoga i nei augātupulaga, o le poto o Eleni. O le aai nei o Atenai e tauta’ua ona tulaga tau aoaoga ma ona faleaoga. Le poto lea ua ‘atagia ai le Atua o tagata Iutaia ua oo lava i le satauro o Keriso ua o se valea tele ia Eleni (I Kori. 1:23).

Samoa, ua fia tausaga o le talalelei a Iesu Keriso i ou laufanua? O le ā le mătua o lou aoaoina faakerisiano? Tatou toe foi i le amataga mai o oe. O ai  na faia oe? Ua ou faalogo i a tatou fanau ua talanoa mai i le ituaiga filosofia lea ua aoaoina ai, mai la tatou aoga i le Papa i Galagala e faapea, “e leai se mea e ta’u o se ‘sa’o’ poo se ‘sesē’.” O le poto lea faa Eleni. Lea ua faapea mai ai Paulo, ua avea e le Atua ma valea (I Kori. 1:20).

E afua i se ā ona ta’ua e le Atua o le valea? Ina ua latou le iloa le Atua. E le mafai foi e se poto o le lalolagi ona iloa le Atua (f.21). A o ai foi le toa na te faamasino galuega ma fuafuaga mamana a le Atua? (Isaia. 29:16 ; Rom. 9:20).

O le natura lava ia o le Atua, o le amiotonu; o le sa’o. A o le sesē, e tupu mai i le filifiliga a le tagata. E le mafai ona fai sau filifiliga i le mea e tasi. E tatau lava ona sili a’e i le tasi ni mea e te filifili ai e ta’u maia le taunuuga, poo lelei, poo leaga; poo sa’o foi, poo sese. O lea foi na tuu ai e le Atua i le faatoaga i Etena le laau e iloa ai le lelei ma le leaga, e lua iai mea e fai ai le filifiliga a le uluai tagata. Poo le saolotoga e pule ai i mea uma ua tuusaolotoina ai e le Atua (Kenese. 1:29,30), poo le laau lea e tasi e le maua ai le saolotoga (Kenese. 2:17).

O Atenai lava ia, ua na o le olaga faapaupau. E le mafai la ona e maua iai se lelei poo se sa’o. Peitai o le Atua o Isaraelu, la lea ua tusia mai i luga o le fata, ua mafai e ala i le faamalamalamaina e Paulo, ona lua iai mea e fai ai le filifiliga a tagata.

Fai mai a le aposetolo, o ia ua outou tapuai iai ma le le iloa, ou te faailoa atu ai ia te outou. Lea ua tautala le aposetolo e talatalapipi le tala’aga o le Atua. O lona mamalu ma lona silisili ese. O ana galuega ma lona poto. O lona uiga paia ma lona natura. O lona moni ma lona le faatusalia (Isaia. 45:5-7).

Faafetai ia Paulo e ui ina tele ma anoanoa’i le mau atua ma talitonuga eseese i le laumua nei o Eleni, a ua le miga lava e ta’utino atu, e na o le tasi lava le Atua moni o loo soifua pea lava pea, na o le Atua ua outou faapea mai ai, o le Atua e le iloa. E le mafai ona tatou vaai atu i le Atua; ae le mafai ona lilo oe ma a’u i le silafaga a le Atua.

Samoa e, e faapefea ona faamatala lou iloa o le Atua? E mafai ona e ola faasamasamanoa e aunoa ma lou iloa o le mea lea e sa’o pe sesē foi? Samoa, o tatou o le atunuu lotu; ae le o tatou uma o ni tagata talitonu! O le ala lea o le tele o fetauai’ga ma feeseesea’iga. O le fasi avā ma le mau amio matagā. O le fematea’i ma le fefaamasinoa’i. O le pogai lea o le muimui ma le fela’ula’ua’i; o le faailoga tagata ma le vaai maulalo; o le sauāina o le mativa ma le pule malosi i mea totino a le malo, ekalesia, ma aiga. 

Uso e, a’oa’o  lau fanau ma lou aiga i uiga ma natura o le Atua. A ia sili ona mua’i faamasani ai oe ma lou toalua. Ia tapuai malamalama. Auauna ma le mautinoa.

Samoa, e le i faia fua le tōfā poto ma le utaga mamao a tua’ā  ua mavae. O le filifiliga sa faia ma le mautinoa. Ua iloa i le loto le faamaoni ma le alofa tunoa o le Atua. O le faatuatua ua mauaa i le Faavae e manuia ai Samoa i la le tino, i le mafaufau, ma lona soifua faale agaga.

Pese la ia, ma vivii leotele. Faailoa ma molimau atu i ou matua; i lau fanau ma lou aiga, i au uō ma tagata uma, le Atua moni e toatasi e ola ai oe, e saoloto ai tatou uma; e manuia ai le lalolagi uma.

 

Amene

 

7737063/7783782

E-mail: petaiasetu@gmail.com

© Samoa Observer 2016

Developed by Samoa Observer in Apia