Na ta’ua e le tinā i a Lagi Iuta o Vailele-Uta i le Fofoga o Samoa e tele vaega  o lo’o fia mana’omia lona fa’aleleia i le taimi lenei ae paga lea ua le lava le fa’asoa.

O le aso ananafi na fa’ailoa mai ai e le tinā i a Lagi le taumafai ai lea e sa’ili fesoasoani aua nisi o vaega e fia fa’aleleia o lona aiga.

“O le taimi lenei na o le tamā lava o le aiga o lo’o faigaluega, ma fa’atoā na alu e fagota  amata i le vaiaso na se’i mavae atu nei ona o le lē tagolima lava.” Lagi.

“O si o matou aiga, ia o lena ua outou taga’i atu ai, e leai se paipa e pei ona e silasila atu ai, o le mea e la’u mai ai le vai ia e le faigofie.

“Pau lava le mea o lo’o fia maua mai ai se fesoasoani o se tane vai.

“E moni lava, o nai fa’afitauli lava nei o lo’o feagai ai i le taimi lenei, aua ua na’o o a’u lava, le tamā o le aiga ma le atali’i.

O le taimi ae le’i maua se galuega a le tamā o nai mea tōtō lava na tua i ai le aiga.

“O  lea lava la e taumafai e fa’amāmā atu ai le mea lea , e tau tōtō atu ai fuala’au e fesoasoani ai i le aiga, o le tamā lea fa’atoā alu le Aso Gafua e faigaluega.

O lo la fa’amoemoega, ‘ia ma tau faigaioi lava aua le aiga.

“O le mea la lea ua alu ai le tamā o le aiga, fa’atoā totogi pe a sau  i le Aso Faraile o le vaiaso lenei.

E le gata la i le tanevai e pei ona ia ta’ua o lo’o mana’omia ai se fesoasoani ae o nisi lava o vaega o lona fale o lo’o ia mana’o e fa’atino ae o le fa’alavelave o le le lava o le fa’asoa.

“Ia o tapoleni o lo’o mana’omia lava , aemaise o nai apa, a timu ua tutulu le fale nei ….ia ua tele lava le mana’o ae ua le lava le fa’asoa.

“E tele lava nai mea e mana’omia e pei lava o lea e tau faifai atu vaega nei,e le faapea e fai atu loa lelei loa.

“O nai mea lava e fa’amautu lelei ai le aiga, ona e pei ona ta’ua muamua a timu e tutulu, ona o apa tuai lea e faa’aoga ai, tusa lea fa’atoā tasi nei le vaiaso, talu ona omai iinei.