Fa’asoa mai se tamā i ona mafatiaga

Tusia Deidre Tautua-Fanene ,

234 Hits

O se va’aiga fa’amomoi loto i le nofoaga o le tamā ia Tauinaola mai le afioaga o Faleasi’u.

O se va’aiga fa’amomoi loto i le nofoaga o le tamā ia Tauinaola mai le afioaga o Faleasi’u. (Photo: Misiona Simo)

E to’a luasefulu tagata e nonofo i lalo o le fale e tasi. 

O le tamā ia Tauinaola Taputaua, o lana fanau e to’atolu ma o latou ta’ito’alua ma a latou fanau, ma isi o le aiga.

O le mea moni lea mo lenei aiga i Faleasiʻu. Ae o le itu pitosili ona leaga ai o le lēai lea o se suavai ma se eletise.

“Pau lava lea o le fale ua gafatia i lenei taimi,” o le saunoaga lea a Tauniaola.

“O mea uma lava ia e fausia ai lenei fale e mai le laueleele e pei o launiu ua uma ona lalaga ina ia mafai ona ato ai le taualuga o le fale.”

Sa ta’ua e lea tamā o le manaoga tele po’o se miti tele o lo’o nofo ma ia o le fia maua lea o se fale lelei mo lona aiga.

“E manaomia lava se fale lelei ma telē ina ia mafai ona nonofo uma ai. E pei ona e silasila atu o le fola o le fale o lo’o fola i fala.

“o le fa’avae fo’i e le’o simāina.

“O le taimi lenei o lea e tau fai atu se isi fuafuaga ina fauina ni mea e mafai ai ona kava uma le fale ina ia aua ai nei susu pe a oo ina timu.

“o lea e fa’aaogaina foi lauiniu e fai ai pola o le fale.”

E ese mai ia fa’afitauli o le isi fa’afitauli tele o loo feagai ma lenei aiga o le leai lea o se suavai.

“E leai se vai e oo mai iinei ma o le mafuaaga lea e manaomia ai lava se tane vai.

“O le taimi lenei o loo matou faalagolago tele I matou tuaoi mo le vai, ma e leai foi ni kalone ina ia mafai ona utu ai ma sefe ai le vai.

“e toatolu la’u fanau lea matou te nonofo faatasi ae ua fai aiga uma foi ua fai fanau foi.

O le isi toalua e toaono a laua fanau, a mafaufau la iai o le toatele ia o matou o loo nonofo uma iinei ma le mafatiaga tele o le tau su’e o se suavai e fa’aaoga.”

Sa ta’ua e Tauinaola le fiafia tele pe afai ae iai se agelu e mafai ona ofoina atu se tane vai mo latou.

“E faigofie uma mea uma ma le olaga pe afai e maua mai se tane vai ina ia fesoasoani i o matou mafatiaga o loo iai nei.

“E na o le toalua o loo faigaluega i le taimi nei ma e faiauala ae o totogi e maua i le vaiaso e tai $100.

“Ae o le tau foi o le soifuaga ua fai lava si taugata.”

Afai e te fia fesoasoani i lenei tama faafesootai le numera o le 7260984.

© Samoa Observer 2016

Developed by Samoa Observer in Apia