Galue le Tama’ita’i Loia i a Mary Kints mo se tali

By Fa’aliliuina e Ilia L Likou 14 July 2016, 12:00AM

O lo’o ua taumafai nei le tama’ita’i loia mai Papua Niu Kini lea o lo’o a’oa’oina i le Iunivesite i Aukilani i a  Mary Kints i le taumafai ai lea ona faia se faiga e tulaga lelei mai ai le Tulafono ina ia fa’aitiitia ai le sauaina ma le fasiotia o i latou o lo’o faia vai fa’ataulaitu i totonu o Papua Niu Kini.

Na ia ta’ua e ao lava ona nofo malamalama le to’atele o tagata o lo’o nonofo i nofoaga mautua o nei ituaiga o fa’asalaga e le’o se mea tatau lea i totonu o le Tulafono.

E ui ina fai si faigata ona fa’ao’o atu lea feau i le to’atele o tagata ae na saunoa Kints o le mea e ao ona faia  vave i ai se faiga mea manu o lo’o tele le taimi.

O le tausaga ua mavae na agalelei ai  Niu Sila mo le tu’uina atu lea o fesoasoani aua lava le fa’aitiitia ai o sauaga i tinā ma tama’ita’i i Papua Niu Kini.

O le fesoasoani o se laina telefoni mo le logoina o sauaga mai so’o se vaega o le atunu’u i leoleo ma e o lo’o galulue mo lea tulaga i totonu o le atunu’u.

E pei ona silafia ai le si’itia ai lea o vaega nei aemaise o sauaga e aga’i i tama’ita’i  e pei ona lipotia pea i le tele o taimi ona e le gata o sauaga i totonu o o latou lava o aiga, o faiga-aiga fa’amalosi, aemaise ai le taumafai lava lea e fa’aitiitia le fasiotia ai o tinā o lo’o o latou fa’ataunu’uina vai fa’ataulaitu.

E pei ona ta’ua ai i ripoti o le masina o Me o le tausaga ua tuana’i le fasiotia ai o se tasi o tinā e suafa i a Mifila e na te faia  vai fa’ataulaitu i totonu o se tasi o vaega o Papua Niu Kini ua avea lea ma atugaluga tele ona o le fa’atupula’ia ai o lea tulaga.

E fa’apea fa’amatalaga o Mafili na mafai ona fa’asaoina mai lona ola mai lima o tagata na o latou foufou e fasiotia i a te ia i le masina o Fepuari i le tausaga lenei aepeitai na i’u lava ina maliu fasia i le masina o Me i le tausaga nei lava.

O ripoti na tu’uina mai na ta’ua ai le tulaga faigata tele ua o’o ai vaega o su’esuega mo le tau fa’aitiitia ai o lea tulaga mata’utia e pei ona ua alia’e mai i Papua,

Saunoa le Komesina o Leoleo i a Epenesa Nili ‘ o le taimi lenei o loo ua fuafua le aoina mai o i latou na i ai i le fasiotia o lenei tinā.’

“O le tipitipiina (tulou) o Mafili o se tulaga leaga tele lea i lo’u iloa i ai, ma sa le tatau ona toe tula’i mai nei va’aiga a’o taumafai ai le  atunu’u lenei e fa’aitiitia nei vaega.

“E leai ma se ripoti jua tu’uina mai i lenei fa’alavelave ae o lo’o o matou taumafai pea i ai ina ia fa’amaoti mai tulaga uma nei.

“O se tulaga fa’anoanoa tele pe a silasila lelei lava i lenei fa’alavelave ma o lo’o taumafai e tu’ufa’atasia se ripoti ina ia mafai ona aoina mai fa’amatalaga i a’i latou na auai i lea taimi a’o i ai lenei tiga i ona mafati’aga.

E pei ona silafia e le fou lea tulaga i totonu o lenei atunu’u i le taumafai ai lea o tagata e fasiotia i latou nei o lo’o faia vai fa’ataulaitu.

E o’o mai lava i le taimi lenei e le’i mafai lava ona soalaupule lelei ni vaega taua aua le fa’ato’afilemuina o le mataupu i e o lo’o faia vai fa’ataulaitu i totonu o Papua ma e o lo’o tete’e ai i ia faiga.

E o’o lava i ta’ita’i lotu ua o lo’o latou vala’au pea mo se filemu e pei ona i ai le Akiepikopo i a Douglas Young ona o lona talitonuga ua mana’omia tele se suiga.

Fai mai lana feau fa’amalosi ua mana’omia e Papua se suiga i le taimi lenei aemaise o le agai atu i le lumana’i mai tu fa’apaupau.

O lo’o ua mautinoa nei le sosola  ese mai ai o i latou o lo’o faia vai fa’ataulaitu i Papua Niu Kini i  nofoaga saogalemu ona ua mautinoa le lamatia ai lea o lo latou ola mai ‘i e o lo’o sa’ilia i latou e fa’ao’o i ai le oti ona o faiga e pei ona o latou fa’atinoina.

O se tasi  o ali’i talavou i a Ruth Kissama na ia ta’ua i le leitio Ausetalia e to’afa ni fafine mai le ituaiga o Enga ua sosola atu i mauga maualuluga ona o le fefefe , ma ua ta’ua i latou o ‘sulufa’i i o latou lava lau’ele’ele.

O tala lata mai o lo’o ua maua  o fafine nei ma a latou fanau e 13 o lo’o ua i se tulaga lamatia lo latou ola ma le soifua ona o nisi o tu’ua’iga e fa’apea o i latou ia ma a latou vai fa’ataula’itu na mafua ai le maliliu o nisi o lea itu o Papua Niu Kini.

O le tausaga e 2013 e pei ona ripotia muamua atu ai, na valaa’u e o lo’o galulue i Tulafono Fa’ava-o-malo i le atunu’u o Papua Niu Kini i le mafua’aga ua  le mafai ai ona tu’uina atu i le fa’amasinoga o le tagata lea na ia susunu olaina Kepari Leniata o se tasi o tinā vai fa’ataula’itu.

Sa fa’ailoa mai e Kate Schuetze lea o lo’o gafa mo lea tulaga i le Pasefika e to’alua i la’ua na ta’ua o lo’o ua molia i le fa’alavelave lea ma o le itu fa’anoanoa ai e o’o mai lava i le taimi lenei e le’o iloa se tala ua o’o ai le fa’amasinoga o nei tagata na fa’atinoina lea tulaga.

Ma o ni ituaiga o fa’alavelave na ta’ua e ia ripoti ua lepetia ai le va nofo lelei o aiga aemaise o vaega ese’ese i totonu o Papua Niu Kini.

O se tulaga fa’atupula’ia fa’afitauli nei i totonu o Papua ma o lo’o ua fa’asolo i le fa’asauaina ai o fanau aemaise o tama’ita’i i totonu o Papua.

Sa ta’ua e le Minisita i Ausetalia i a Julie Bishop i le tausaga ua mavae atu nei, o lona taunu’u ai i totonu o Papua i le tautalagia ai o le vaega lava ia i Sauaga i Tina ma Tama’ita’i ae ona maua ai i le taimi lava lea o lo’o i ai ni tina se to’atolu o lo’o mafatia i sauaga ma o se fa’anoanoaga lea.

E o’o mai i le taimi lenei o lo’o taumafai pea le faigamalo o le atunu’u lenei o Papua ina ia fa’amalamalama le to’atele o ona tagata ina ia o ‘ese mai i le ola ai pea i talitonuga le talafeagai e pei o le fasiotia o tagata.

O le masina o Oketopa o le tausaga ua mavae atu na taofia ai fo’i se tamā i Papua ina ua ia fa’ao’oina se oti i lona afafine  e lua tausaga. O lea ripoti na manino mai ai le fao ese mai ai e lenei ali’i mai lima o lona to’alua o la la’ua pepe e lua tausaga le matua ma aga’i atu i se togavao. E o’o atu le tamā lenei o lo’o fepe’ei i luga o se la’au ni tamaiti se to’alua  ma sa le ano i ai o ia ae fa’apea loa ona ia ‘ai le ua o lona afafine ma inu lona toto.

O tamaiti nei sa o la va’ai tino i lea tulaga na o la’ua ta’uina i tagata ma mafua ai lona ona maua ma pu’e e tagata o le nu’u lenei ma ave ai loa o ia i le Ofisa o Leoleo. O le tulaga e pei ona maitauina nei, o le si’itia ai o i latou o lo’o ua ’a’afia i tulaga nei ma o se itu o lo’o galulue ai pea tagata o lo’o malamalama o latou mafaufau aemaise o lotu Kerisiano i Papua.

O se tasi lenei o atunu’u i totonu o le Pasefika e o’o mai lava i le taimi lenei o lo’o fa’atinoina ai lava le tele o vai fa’ataulaāitu e ona tagata.

O lo’o ta’ua mai i tala mai atunu’u mamao aemaise i latou o lo’o mata’ituina lea tulaga, e leai se tulaga o tau fa’aitiitia ai le fa’atinoina ai lea o lea vaega i totonu o Papua, ua atili ai ona si’itia le numera o taulasea Papua e fa’atinoina lea fo’i `au`aunaga i totonu o le atunu’u.

O se tasi o fa’alavelave na tula’i mai i le  masina o Fepuari o le tausaga 2012.

E   fa’apea o le  tina  i a Kepari Lenata  na te fa’atinoina le faia ai o tulaga fa’ataulaāitu i totonu o lona nu’u, na ia ta’utino mulimuli ina ua su’esu’eina e le `āīga e ana le tamaitiiti e ono tausaga lea na uma lona ola, e sa’o o ana vai na mafua ai ona oti le tamaititi lenei.

Sa ta’ua e matuiā tele le tulaga ma le va’aiga na fasiotia ai lenei tinā e tagata o le nu’u lea, lea na maua i fa’amatalaga sa faufau e’e mai lava lenei tinā i le fia maua ai o se fesoasoani, ae o lo’o li’o e tagata o lenei nu’u ma taliē i ai a’o o latou susunu olaina o ia ma tauai ai i luga pa’u ta’avale i le tino o le tinā ma talalī (tulou) ai, ma e foliga mai e leai se manatu popole tele i ai o i latou i totonu o lenei nu’u i lea tulaga. 

E 20 tausaga o lenei tinā i a Kepari Leniata lea na fa’ailoa mai e nisi na o le taunu’u atu lava o tagata  toso mai i fafo ae o lo’o i ai ma si ana fanau teine laiti e to’alua, saisai telenoa (tulou), ma sasa  lona tino i ni u’amea ua uma ona fa’avevela, ma ina ua uma o lea faiga sa o latou avea ai loa lona tino i se nofo’aga o lo’o lafoa’i ai le lapisi ma susunu ai loa o ia a’e o lo’o ola pea ni pa’u ta’avale ua ma’e’a ona sasa’a i ai le penisini.

O le nu’u o Paiala i Papua Niu Kini sa tula’i mai ai lenei tulaga, ma e talitonu le to’atele o tagata Papua o faiga Fa’ataulaāitu nei e fasiotia ai o latou fili.

O se tasi o faifeau o lo’o galue i totonu o lea vaega o Papua na ia fa’ailoa lona fa’anoanoa ai tele i le tele o i latou ua fasiotia ma maimau o latou ola, ma ua leva ona tatau ona faia se fuafuaga a le mālō e tapu ai nei faiga fa’anu’upo o lo’o fa’atinoina pea e tagata o Papua.

Fai mai lona talitonuga o le matua’i to’atele lava o e ua fasiotia i faiga nei ma o le matua’i tete’e ai lava o talitonuga fa’a-Kerisiano i lea tulaga, o le fasioti tagata o se tasi o ‘aga e inosia i Fofoga o le Atua Soifua, ae ona o le le malamalama o nei tagata i le Talalelei i a Iesu Keriso o lea tonu lona mafua’aga o le fa’atinoina ai pea o nei faiga o lo’o o latou talitonu i ai

O lea fa’alavelave mata’utia sa mafai ona o’o atu leoleo i le nofo’aga tonu lea na alia’e mai ai lenei fa’alavelave, ae na toe fa’asolomuli e tagata o le nu’u lenei i latou na o’o atu e taofia le susunuina o lenei tinā.

Sa ta’ua e le Komesina o Leoleo i a Tom Kulunka i lea tausaga, le le talia ai lea i le tulafono nei faiga “fa’atevolo” o lo’o fa’atinoina pea i Papua.

“Ua leva ona tatau ona sui nei tagata, ma e le alo le tulafono i fa’aiuga o le a faia i a’i latou na fa’atinoina lea tulaga” o lana tala mai lea.

E le’o iloga mai lava gaioiga a le faigamalo o Papua e tau fa’alemū mai ai lea tulaga.

E tusa ai ma fa’amaumauga e le na o le pau ai lea o le tele o fa’atinoga le talafeagai e afua mai i talitonuga fa’aitūlua o tagata o Papua ma e le’o iloa po o faia i ai ni fa’asalaga fa’alemalo.

O nisi o su’esu’ega o lo’o ua maua ai le fa’afaigata tele ai lea e tagata tafafao po o turisi fo’i ona asia pe toe afea le atunu’u o Papua Niu Kini ona o nisi o fa’alavelave ogaoga o lo’o tula’i mai ai pea.

“O le tele o nei fa’alavelave e mafua mai ona o le ola le malamalama o ona tagata aemaise o le ola ai pea i talitonuga o le pogisa ma le le malamalama ma o lo’o taumafai pea se faiga mo le fa’amalosia ai lea o Tulafono ina ia mafai ona tete’e atu ai i nei faiga.” o le fa’aaliga lea a se tasi o ta’ita’i leoleo o Peter Philip i Papua Niu Kini.

Sa ia ta’ua fo’i e tele nisi ituaiga o faiga fa’apenei i Papua Niu Kini ma o le popolega ua i ai nei   o le si’itia ai lea o e taulaitu o lo’o fa’atinoina nei sauaga mata’utia ma le le lelei i se va’ai a atunu’u i fafo.

O Papua Niu Kini, o se tasi lenei o atunu’u o lo’o tele ai  itu’aiga fa’alavelave fa’apenei i le Pasefika, ma ua avea lea ma alofaga o le to’atele o i latou e fia asia.

O le saogalemu ai o tinā ma tama’ita’i i totonu o Papua Niu Kini o se vaega o lo’o ua ave ai nei le fa’amamafa a le atunu’u aemaise ai o Papua o lo’o ua maitauina ai pea le sauaina ai o le to’atele o tinā ona o latou talitonu e pei ona ua i ai nei.

O se vaega o lo’o ua ave ai pea le fa’amamafa o le tele o nisi o atunu’u aemaise lava Ausetalia ina ia fo’ia nei vaega uma i se taimi lata mai.

Ona o le fa’atuputupula’ia ai o sauaga o tina ma tama’ita’i i totonu o le atunu’u lenei o Papua i lea le tulaga.

O le tausaga na se’i mavae atu nei na amata ai ona savali ai o le to’atele o nisi e o le atunu’u le tete’e malosi atu ai lea i nei tulaga e pei ona ua fa’ailoaina atu muamua ma na tau molimoli lea feau i nisi o pese, tala fa’atino ma tatalo mo tinā na ‘a’afia o latou ola i sauaga i Papua.

E pei ona silafia ai o le taimi lenei ua fai lava le loto faitalia o le tagata latou ia, ma o le mafu’aga lea ua tele ina maliu fasia ai nisi o tinā ona ua le mafai ona o’o atu nei mataupu i leoleo mo su’esu’ega aemaise o le fa’anofo filemuina.

O le fa’ailoa mai ai la o ia tulaga  lo’o ua vala’au nei le to’atele o tagata Papua aemaise ai o le tete’e tele i nei faiga.

O le manatua ai o tinā ua maliliu ina ua fasiotia ai e nisi o tagata o lenei atunu’u o se itu lea ua ave ai nei le fa’aaloalo mo le Tete’e atu i Sauaga lea ua faia mo tausaga uma, ae le gata i lea o se tasi lea o tulaga e ao ona fa’atinoina i lo latou lea talitonuga.

E ui i le tele ai o nei fa’afitauli o lo’o feagai ma Papua Niu Kini ae o le tele o fesoasoani o lo’o ua ofoina e le tele o  atunu’u e i ai  Niu Sila e mo  le fa’aleleia ai lea o le tele o nisi o tulaga o lo’o mana’omia tele.

O  se agaga fiafia tele mo e o lo’o o nonofo i vaega nei o lo’o va’aia ai pea le sasa’a atu ai o le tamaoaiga o atunu’u tetele nei.

O le tele lava o fesoasoani o foma’i ofo fuaina lo latou taimi e auauna ai e ala i galuega fa’afoma’i, o nisi o vaila’aua ae o le tele lava o vai taumafa pe a o’o le taimi e mana’omia tele ai, ma o le va’aiga lava lea e tasi o lo’o i ai le tele o atunu’u o le Pasefika.

O le tele o ia fesoasoani lea fo’i na  tu’uina atu ai e Niu Sila se fesoasoani i le atunu’u o Papua Niu Kini mo le fausia ai o se tasi o ana ala laupapa lea i Madang e fa’afaigofie ai ona feso’ota’i ma le isi itū o le a’ai lava lea e tasi i le tausaga ua mavae.

O se itu na fa’ailoa mai ai le fa’afiafiaina ai o e o lo’o nonofo i lea itu o Papua Niu Kini ona o ia fesoasoani.

O se agaga fa’afetai na fa’ailoa mai e le faigamalo o lea atunu’u ona o le fesoasoani maoa’e ua ofoina atu e le Fitafita a Niu Sila, ma o le agaga maualuaga o le fa’aauau pea lea o le nofo lelei i va o atunu’u uma ma Papua Niu Kini.

E pei ona silafia ai o Papua Niu Kini' o se motu tel'e le tuu totonu o le Pasefika. O le taulaga o 'Papua' o Port Moresby, o tagata mai i le atunu'u lenei o ni tagata mai Melanisia. O tagata o 'Papua Niu Kini' e i ai le gagana Toki Pisini,Hiri Motu, Peretania ma isi fo'i gagana e tele. O  tagata nonofo i 'Papua Niu Kini' e tusa ma le 6 miliona tagata o lo’o nonofo i 'Papua Niu . Na uto’atasi Papua Niu Kini mai Ausetalia i le 1975.

By Fa’aliliuina e Ilia L Likou 14 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>