Fia maua e se tamā se fale lelei

Tusia Deidre Fanene ,

59 Hits

O Maleifua Mataia o se tamā e mai le afioaga o Matautu Lefaga.

E toatolu lana fanau ma o loo nonofo i se tama’i faleo’o ua fa’aleagaina uma e le ma’ema’ea o le afā o Gita i le tausaga nei.

O le ma’ema’ea o Gita ua fa’aleagaina uma a tapoleni sa fa’apea ona tali ai le timu mai le sao i totonu o le fale.

Ae peita’i sa lei mafai e ia tapoleni ona taofia le malosi o le savili ma o le mafuaaga lea sa mafai ona faaleagaina uma ai meaafale o le latou fale.

E ui o loo faigaluega uma laua ma lona atalii ae e leo mafai ai lava ona fofo faafitauli i le itu tau seleni ma o le mafuaaga foi lea o le le mafai ai ona faaleleia le latou fale.

Ma e nofo ma lenei tamā ma lona popole tele ona o le tulaga faaletonu o le latou fale.

“Ua atoa nei le 10 tausaga talu ona matou nonofo iinei ma sa matou galulue ma le malosi ina ia matou taunuu mai i le tulaga lea ua matou iai i le taimi nei.

“Mai le taualuga sa faia i pola seia oo ina faisiaina i apa ato fale.

 “Ou te faigaluega, ma o le totogi o loo ou mauaina o loo faia ai mea faalelotu, o mea faale aiga faapea ai ma mea faalenuu.

“O le taimi nei e tasi lou atalii lea ma te nonofo iinei ao le isi au fanau o loo nonofo ma le latou tinā i Saanapu.

“E fai lava ma omai e asi maua ma e tagi ai lava le loto ona o lo’u manaoga tele lea e iai ou te manao ina ia mafai ona omai matou te nonofo ae peitai e leo taitai maua se saogalemu o si au fanau i lenei ituaiga fale e iai.

“E ui o lea e maua le galuega ae e leo mafai ona faatinoina manaoga uma o loo iai ma faaleleia ai le nofoaga.

“O se miti ina ia mafai ona faataunuuina o le fia maua lea o se fale lelei mo si au fanau.

“Ae paga lea e leo mafai ona faataunuuina uma nei miti ona o le utiuti o le tala i le seleni.

“E leai se tasi e fia nofo i se fale faapenei ma a oo ina timu e sau uma lava i totonu le timu ona ua faaleagaina uma lava e Gita tapoleni sa iai e tali ai le timu.”

Afai e te fia fesoasoani i a Maleifua faafesootai le numera o le telefoni 7278419.

© Samoa Observer 2016

Developed by Samoa Observer in Apia