Tofia e le Malo le Ofisa Sili fou mo le Fa’alapotopotoga o ‘Ele’ele a Samoa
Ua tofia nei le Ofisa Sili fou o Pulega mo le Fa’alapotopotoga o ‘Ele’ele o Samoa (SLC).
O le Tofa a Ulugia Petelo Kavesi, ua sui-tulaga nei ia Peseta Afoa Arasi Tiotio ua loa tausaga o tauavea lea tofiga maualuga o le malo.
O Ulugia o lo’o avea ma Pule o le Vaega o ‘Au’aunaga Lautele i le Fa’alapotopotoga o Taui mo Fa’alavelave Fa’afuase’i.
Na feso’ota’i atu ananafi i le Matai Vaiusu ma fa’ailoa mai ai lona fiafia tele ona o le tofiga fou ua iai nei.
“Ua lagona le fiafia i lenei tofiga,” o lana fa’aaliga lea.
“Sa ‘ou talosaga i le Fa’alapotopotoga mo ‘Ele’ele o Samoa, e pei lava o tulaga masani o mea fa’apenei, o le naunau lava e o’o atu i se isi fo’i tulaga ma ‘ou te fa’afetai ai i Le Atua, ona o le tofia o a’u nei e avea ma Ofisa Sili o le Fa’alapotopotoga.”
O Ulugia e mai le Afio’aga o Vaiusu ma ua 16 tausaga o galue i le Fa’alapotopotoga mo Taui o Fa’alavelave Fa’afuase’i.
Na fa’au’uina mai le Iunivesete o le Pasefika i Saute ma fa’ailoga o le Master i Tulaga Tau Fa’afoeina o Pisinisi, Master i Mata’upu Tau Atina’e ma le Bachelor i Mata’upu Tau Fa’ato’aga.
Sa galue fo’i Ulugia o le Pule o Su’esu’ega ma Fa’amaumauga i le Pulega mo Tagata Maimoa mai Fafo ma ua fa’aipoipo, e toafa ona alo.
O Ulugia le tasi o Ofisa Sili fou o le Vaega fou na tofia e le’i mamao atu, lea e aofia ai le Ofisa Sili o le SIFA, o To’oto’o’ole’a’ava Dr. Fanaafi ‘Ai’ono Le Tagaloa, lea ua suia Alosamoa Erna Va’ai-‘Ai’ono ua maliu.
Ua māua fo’i e le Samoa Observer, ua toe tofia lava Papali’i Sonja Hunter i le Ofisa Sili o le Pulega mo Tagata Maimoa mai Fafo, mo le isi tolu tausaga o muamua.
Sa fesiligia le Ali’i Palemia, Tuila’epa Sa’ilele Malielegaoi a’o le’i tu’ua le atunu’u mo Europa, i se fa’amatalaga o tofiga nei, pe ua fai iai se fa’ai’uga a le Kapeneta.
Peita’i e le’i fia tali lelei mai Tuila’epa e fa’ailoa mai e ua tofia ae na saunoa mai:
“O lo’o fa’asolo lava i le tulaga e masani ai ona fa’ailoa muamua lea i e ua filifilia,” o lana fa’aaliga lea.
Na fa’aopoopo mai fo’i, e lea se mea e popole ai fua ‘outou (vaega fa’asalalau) po’o ai e tofia, o le a faitalia lava le malo ma fa’ailoa atu i le taimi talafeagai.
O le fa’ai’uga o le vaiaso talu ai, na fa’amaonia ai e le Failautusi o Fa’asalalauga, le tofia o le Ofisa Sili fou o le SIFA.