VALA’AUINA E TAUTUA : Nafo’itoa

14 March 2016, 12:00AM

Ripotia e PaiMulitalo Ale

Fa’aliliu e Maiava 

 

O le a iai le sui fou mo le Itumalo o Gaga’emauga Numera 3, pe a usuia le ulua’i fono a le Palemene i le Aso Faraile nei. 

O le tamaloa o Nafo’itoa Tala’imanu Valu Keti Selemanu Peseta, lea sa avea ma Sui Komesina o le Matagaluega o Leoleo. 

Na malolo mamao ai le sa avea ma Minisita o le Matagaluega o Puna’oa Fa’aleNatura ma le Si’osi’omaga, o Fa’amoetauloa Fa’ale Tumali’i, e 838 palota i le 746.

Na fa’aalia le agaga fiafia o Nafo’itoa ina ua tu’uina mai fa’ai’uga aloa’ia o le palota i le vaiaso talu ai ma ta’ua ai, lona naunau e fa’atino lona tofiga i le malosi e o’o iai.

“O le mea a lea sa moemiti iai a’o talavou, ae le’i avea ma leoleo,” o lana fa’aaliga lea. “O le mea ua leva o ‘ou mafaufau iai, a ua ‘umi fo’i aso o fa’atalitali mo se taimi talafeagai ae maise le musumsuga a Le Atua ia te a’u.” 

Na ta’utino lava e Nafo’i, e le faigofie le nofo-popole, le masalosalo ma le le-mautonu a’o le’i ‘aumaia fa’ai’uga aloa’ia, ae maise lava, o lea sa sili pea le sa la tauva, ina ua mae’a le faitauga muamua o palota. 

“Pei fo’i o isi sui-tauva ia. E iai lava le le-mautonu i lou mafaufau. Peita’i, a manatu i le tele o le galuega sa fa’atino ae le’i faia faiga-palota, fa’atasi ai ma le fa’alagolago i le vala’au a Le Atua, na lagona lava i lo’u loto le mafanafana, ‘ou te manumalo.   

 “O le agaga fiafia lea. ‘Ou te fa’afetaia ai Le Atua ona o lona filifilia o a’u mo lea tofiga. O se tofiga e ‘ese mai le mea sa masani ai i le Matagaluega o Leoleo.”

Na ta’ua fo’i e Nafo’i, e matua fiafia lava ma amana’ia le ta’ita’iga a le Palemia, Tuila’epa Sa’ilele Malielegaoi.

 “O tama-matutua,” o lana fa’aaliga lea. “E iai uma lava o tatou vaivaiga peita’i o lea ua tatou iloa, e leotele atu galuega nai lo na o fa’a’upuga.” 

Na ta’ua fo’i, ua tele le atina’e o le atunu’u i lalo o le ta’ita’iga a Tuila’epa, na mafua ai lava ona naunau e tauva i lalo o le fu’a a le HRPP.

“Sa aga’i mai le isi  vaega fa’a’Upufai, ae ‘ou te le’i talia.” 

Na fa’ailoa manino e Nafo’i, o nei, ua sauni e fa’atino lona sao i fa’ai’uga-fai a le Palemene.  

 “’Ou te fa’afetai tele i si o’u aiga ma e na lagolagoina a’u, aua e seanoa latou ia, ‘ou te ‘ausia lenei tulaga ma ‘ou le ‘auai fo’i i’inei i lenei taimi,” o lana saunoaga lea. 

Na faia fo’i lea avanoa o le faipule fou, e momoli ai lana fa’afetai ia Fa’amoetauloa Fa’ale, mo mea lelei uma sa ia faia mo le itumalo i le lima tausaga sa tu ai i le tofi. 

Na ia fa’afetaia fo’i le galuega a isi faipule tuai, e aofia ai Leota Lu ma Galuvao Viliamu. 

Mo le aga’i i luma, na ta’ua e Nafo’i, o le a saga’i e fa’aauau poloketi ma galuega sa latou amataina ma o le a silasila fo’i i nisi atina’e e manuia ai le Gaga’emauga Numera 3. 

 “O le mea lava e lelei mo Upolu, e lelei fo’i mo le Gaga’emauga Numera 3,” o lana saunoaga lea.

O vaega o le a taula’i iai lana silasila, o le fa’amautuina lea o avanoa tutusa i totonu o lona itumalo, i tulaga tau-a’oa’oga, le soifua maloloina, le atina’eina o tagata-tafafao, o fa’ato’aga ae maise le tausia pea o le filemu ma le soifua saogalemu o lo tatou atunu’u.

E Nafo’i, ua 56 tausaga o le soifua. E mai afio’aga o Avao ma ua fa’aipoipo ia Susiana Fa’afouina-Keti. E to’aono o la alo.

Ua 35 tausaga o tautua i le Matagaluega o Leoleo, mo le fa’amalosia o le tulafono. 

E suafa fo’i ia Misa (le La’au-na-fausia) mai Falelatai, Fotuitaua (le ati-pouniu) mai Safotu, Fagamalo (le Togia’i) i Gataivai, Lepou mai Vaitele ma Taitu’uga i le afio’aga o Magiagi.

O se Failauga o le Talalelei a le Ekalesia Metotisi Samoa, ma o le pule fo’i o le ‘Au’aunaga fa’aLeoleo-sikulaki, le Top Security Services. 

Na mulia’i fa’afetai e Nafo’itoa, le lagolago a Lona Aiga fa’aLeoleo ona o talosaga ma la latou lagolago sa ofoina atu mo ia. 

Alo i ou faiva-manaia!

14 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>