Fesoasoani mai o aiga I Fafo
O le mafua’aga tonu lava I le Malaga atu o tagata Samoa I atunu’u mamao ma aumau ai o le saili manuia lea mo a latou aiga.
O le talitonuga lea o se taule’ale’a ia Iosefa Fagavili 37 le matua o lona soifua mai le afioaga o Satuimalufilufi.
Na maua le avanoa e fa’atalatalanoa ai le taule’ale’a ia Iosefa ma le Fofoga o Samoa a’o aga’i atu o ia I lona fale mai sana galuega I le aoauli ananafi.
Talitonu le taule’ale’a ia Iosefa o le olaga lea ua iaia nei Samoa ua matu afaigata lava.
“O le olaga lea ua iaia nei Samoa ua matua faigata lava ma ua leai lava se auala e mafai ona tete’e atu iai aua se fa’amama avega mo tagata.
“O le olaga lava ia lea ua iai tatou I nei I Samoa a leai se galuega ma leai se fanua e te galue ai mo sau fa’atoaga ua mautinoa lava le faigata o le mafatiaga o le a lua fa’afesaga’i ai nei.”
Taua e le taule’ale’a ia Iosefa o ia sa faigaluega muamua ma na’o le to’atasi lava le o lo’o faigaluega I le latou aiga I le taimi nei.
“Na mafua ona ou le toe faigaluega ona ua leai se isi e vaaia le matou fale, ona ua ausage lava le matou aiga.
“O le taimi nei ua na’o lo’u tuafafine lava o lo’o faigaluega I le taimi nei aua le tausiga o le latou aiga, ma le fesoasoani mai I ona uso ma tuafafine o lo’o I fafo.”
Na taua foi e le taule’ale’a ia Iosefa le auala o lo’o tausia ai le latou aiga mai le taugata ua iai le soifuaga I Samoa nei.
“O lo’u tuafafine o lo’o faigaluega o lo’o tausia le matou aiga atoa I le itu tau meataumafa ia ma le tama’i toga fa’i o lo’o ou galue ai nei, ia ma le ta’avale la’u pasese o lo’o fealua’i le to’alua a lo’u tuafafine.
“Ae o le taimi lava e iaia ni a matou fa’alavelave fa’a le aiga, ona fa’apena lea ona maua mai le fesoasoani mai I uso ma tuafafine o lo’o aumau I atunu’u mamao aua nei fa’alavelave.”
Na fa’aalia foi e le taule’ale’a ia Iosefa o le galulue fa’atasi lava le tali o mafatiaga ua iai nei le olaga ma le soifuaga o Samoa.
“Ou te malamalama lelei lava I le faigata lea ua iai le olaga nei, ma ou te iloa foi o le auala sili ona lelei o le galulue fa’atasi o aiga iinei I Samoa aemaise tagata o lo’o aumau I atunu’u mamao.
“Mo tatou aiga o lo’o aumau I atunu’u e mamao, o le mafua’aga tonu lena na ala ai ona tuua aiga ae Malaga atu Ina atunu’u, e fa’afetaia ai foi lo latou pitolaaau I le fesoasoani mai foi ona o le faigata ua iaia nei Samoa.
“O le galulue fa’atasi e mama ai se avega.”