Tu’u le ulaula tapa’a - Mona

Tusia Ilia L Likou ,

27 Hits

E LEAGA LE ULAULA TAPA'A: Mona Fa’afua o Faleula.

E LEAGA LE ULAULA TAPA'A: Mona Fa’afua o Faleula.

Na maua le fa’atalatalanoaga a le Fofoga o Samoa ma le ali’i talavou i a Mona Fa’afua o Faleula ma ia fa’ailoa ai le tele o lana tupe ua mafai ona sefe mai ina ua tu’u le tapa’a ma le ulaula.

“E le fa’apea la ua tu’u ona o se isi tulaga ae ona ua ou ma’i ai tausaga e le’i mamao atu."

Na ia fa’ailoa o le taimi lenei o lo’o ia faigaluega i se tasi o ulugali’i i Vailele ma o lo’o mafai ona maua ai se tupe e fesoasoani ai lona aiga.

“O le taimi lenei e to’afa lo matou aiga o lo’o faigaluega ia ae le mafai ai lava le agaga e fia fesosoani e ui ina laiti totogi."

“E leai se isi e mafai ona toe faitio aua o lea lava le tulaga ua i ai nei si o tatou atunu’u."

O Mona na ulaula tapa’a mai lava i lona laititi.

“Ia e ta’u sa’o atu lava o a’u na tau fa’aola i le falema’i ona o le sikaleti, ua ou fa’alogo atu i o’u mama ia ua tau le mafai ona manava sa’o."

“E avatu a’u le falemai ae  fa’atonuina ai loa a’u ina ia aua ne’i o’u toe tagofia le sikaleti ma le ava malosi."

“Ia ma le fa’amatalaga na fai,  a ou fia ola umi, ia ua tatau loa ona tu’u vaega nei."

Na ia ta’ua ua ia va’aia le tele o ana tupe e mafai ona fa’asaoina mai le sikaleti ma le pia.

“E pei o lea lava le tulaga ua i ai le taimi lenei, o le taumafai lava ina alu ai pea, aua o lea ua va’ai atu ia o le tele o tupe ua mafai ona fa’asaoina ona o  lea ua tu’u le ulaula ma le pia."

“Atonu o le a fesoasoani ai tele mo le aga’i atu ai le lumana’i."

Na ia ta’ua e leai lava se isi mea e mafai i le taimi lenei, nai lo le to’aga e faigaluega ia maua ai sina tupe.

“Ua taugata le soifuaga, e pei o le lelei ai fo’i lea o le tu’u o vaega nei, aua e sefe ai le tupe aua mea’ai a le aiga ma isi mea ou te mana’o ai."

© Samoa Observer 2016

Developed by Samoa Observer in Apia