Tapena le Vailima mo le maketi i Amerika

Tusia Ilia L Likou ,

71 Hits

Ua le’o toe mamao ona  auina atu lea o le ‘Tofo a le Atunu’u’, le Vailima,mo le maketi i totonu o Amerika

O se sainiga lima i le vaiaso ua tuanai  a le kamupani a le Foredrinks LLC ma le kamupani Vailima i Samoa na fa’amauina ai lea mafutaga vavalalata.

I le sauniga fa’apitoa mo lea fa’amoemoe taua na auai ai ma le Afioga i le Alii Palemia, Tuilaepa Sa’ilele Malielegaoi  i le po o le Aso Lulu na se’i mavae atu nei e molimauina lea fa’amoemoe taua.

O lenei feagaiga na sainia, o le a mafai ai ona auina atu ai le Vailima Lager ma le Vailima Pure mo maketi i Amerika, Uasigitone, Oregon, Alaska, Idaho, Kalefonia aemaise o nisi o Setete tetele i totonu o lea atunu’u.

Na fa’ailoa e le sui o le kamupani o le Foredrinks LLC lea na malaga fa’apitoa mai mo lea fa’amoemoe, Mauala Joseph King Tufele Pele ‘O le aulia ai o le 40 tausaga o le auaunaga a le kamupani a le Vailima i Samoa nei, o se agaga fiafia o lo’o ua matauina le lagolagoina ai pea e tagata Samoa ma le lalolagi atoa o lenei oloa taua i totonu o le atunu’u’

“A maitau atu i le so’otaga vavalalata o le aganu’u a Samoa ma Amerika i itu tau ta’aloga ma fa’afiafiaga ona o tatou iloa lea le tele o le so’otagata lenei e mafai ai pea ona feso’ota’i atu ai le maketiina atu o le pia a le Vailima mo atunu’u i fafo ma le lalolagi atoa.

O lea le agaga e tasi na fa’aleoina e se tasi o Sui Ta’imua o le Vailima i Samoa nei i a  Heath Baker.

“O le faiga fa’apa’aga mo atunu’u e lua o se ki lea mo le aga’i atu ai o le atina’e lenei ma o le tele se avanoa e mafai  ona ofi atu ai le Vailima mo isi maketi ma fa’amautuina ai le va vavalalata ma atunu’u e pei ona ua i ai Amerika Samoa, Niu Sila ma Ausetalia.

“Mai le tausaga e 1978 lea na fa’atuina ai le Vailima i totonu o le atunu’u, ma fa’aigoaina ai le Vailima ‘po o le vai e asu mai ou lima’, o se auaunaga ua tele lona sao mo le atina’eina o le atunu’u.

“O se tala i se ulugali’i na o malaga i Upolu, ma na galala i le fia feinu ma saili ai loa le to’alua a le tamaloa mo se vai ona ua fiainu, ma na maua e le fafine se vai tafe lemu i se atumauga ma ia asu mai  ai se vai mai ona lima mo lona to’alua ma ola ai, ma o le mafua’aga lea o le igoa ‘Vailima’ 

© Samoa Observer 2016

Developed by Samoa Observer in Apia