“A o’o ina outou ō, tou te le ō fua”

By Rev. Petaia Setu 13 January 2019, 12:00AM

(Esoto.03:21)

E laualuga le alofa o le Atua i le loto. E le galo lona agalelei i aso uma. Ua agiga i le feagiaiga a le savili le iuga o le fono a faifeau taitai o le ekalesia, ua mālōlō ma’ua ma le galuega i Niu Sila ona ua taugata le ma’i o lo’u to’alua. Ia ma toe foi mai i Samoa. Na faailoa aloaia mai lea faaiuga i le Koneferenisi o le 2005. Ua ou tā’ua la lea vaega, ‘ona e ese lava faiga a le Atua. E le tia’ia tatou e le Atua. Ua tapena lo mā’ua toe foi mai i si o ma fasi fanua i Samoa nei, ae ua le nofonofo lelei atu ai ma tagata o si o ma aulotu, e oo lava i tagata uma o le ekalesia i lea itu atoa o Niu Sila. Ua faatupu e le Atua le alofa i loto o tagata uma. Ua o’o ina ma ōmai, oka, e mulia’i ni oli a o ni foli! Ua mama i oa ua mama i taloa e pei o upu a le atunuu. E le ina a tautino e Ioane, “O le Atua, o le alofa lava ia”(1 Ioane.4:16) O foliga ia o i’u o mafutaga a Isaraelu ma Aikupito ua faailoa manino e le Atua ia Mose, “A oo ina outou ō, tou te le ō fua”

E 430 tausaga o aumau Isaraelu i eleele o Aikupito. Ua tele foi tausaga sa auauna ai le nuu ia Aikupito. Sa matua iloga ona oi ma mafatia ai i le pologa. Peitai, sa faataunuuina lava upu uma na fetalai atu ai le Atua ia Mose. A oo ina ō ese atu ma Aikupito, latou te ō ma le tamaoaiga uma o Aikupito. E ō ma loto o le nuu. E toatele foi o le a o atu ai faatasi ma Isaraelu (Esoto.11:3;12:38).

O lenei tapenaga, o le tōfā ua faitau semituri o taoto. O le feagaiga o le ola. O le ola o le nuu o le Atua; o le ola o le lalolagi uma. E ui ua tele tausaga o tagataesea i nuu ese, ae o loo ta ta logo pea le folafolaga E ui ina faaumiumi ona oi ma oono, ae tua i faamanuiaga sa fofola ia Aperaamo, Isaako, ma Iakopo. Ioe, e ese lava faiga a le Atua. Poo le a lava le tulaga faigata e oo iai lo tatou ola, a o le a foi le faaumiumi e faataugāina ai tatou e le lalolagi, e le mafai ona tia’i e le Atua oe. E iai pea le Atua ia te oe ma lau fanau. (Ioane.14:18) Na te faatupu le lelei ma le fiafia. Na te faafotu le tamaoaiga ma manuia. O fuafuaga ma tapenapenaga alualu mamao ia a lo tatou Atua a o lei fanau mai Mose. La lea ua faailoa ia Mose o mea o le a tutupu, e faaalia ai le mamalu ma le silisili ese o le auai o le Atua i lona nuu. O le agalelei o Aikupito e mai le Atua. O le lima mafola ma le agaga foai o ia tagata e mai le mana ma le pule alofa a le Atua. I le, ua tatou iloa, e faaaoga e le Atua tagata uma! E galulue tagata uma mo le faaolataga. E tofu sao tagata uma i le alofa faaola o le Atua.

Ua silafia lelei e le Atua le umi ma le puupuu o le ala. Na te silafia mea uma lava. A o le i laa ese Isaraelu mai eleele o Aikupito, ua iai atua o le ala. Ua iai foi le maa tui ma le maa gao. O le maa faalavea aao. O tofotofoga 

ma mailei a le fili. E umi foi se taimi o le a faataamilo ai i le vao. O lona uiga, e le tatau ona malaga faasamasamanoa. E tatau ona ō tapena. Ia ō sauniuni. Ia ta oso le folauga. Auā e leiloa taga e fai i luga o le vasa e pei o upu masani a toeaiina ma loomatutua. E tapena i mea uma. O le tino, o le mafaufau, o le agaga. O le tagata atoa lea o Isaraelu sa fau ai le poto, le malosi, ma le tamaoaiga o Aikupito. A o’o la ina ō ese Isaraelu, e faamativaina Aikupito. Fai mai le Atua, “tou te le ō fua”. E ō uma ma le tamaoaiga o Aikupito.

E lei moe le tōfā a le Atua. Sa faamalumalu lava i luga o lona nuu i tausaga uma sa tautua ma pologa ai ia Farao. Na ia lavea’i. Sa na taitai. Na aoa’i, se’ia oo lava ina faasaofa’i, i eleele ma laufanua ua loa ina mita’i.

E le i oge le malaga! E le i masae se ‘ofu pe pala se seevae! Aisea? O faiga a le Atua! E aumā le oa a Aikupito, a o le tumu o le Atua sa maoona ma malilie ai!. Sa saoloto ai i le ao ma le po i le fasefulu tausaga ma malu ai! Fai mai le Atua, “tou te le o fua”.

E toafia ua leai ni fale e nonofo ai? O ai ua fia ai ma fia inu? Ua le lavalavā ea oe? Ua gaoia e le malosi o le vai au mea uma? Ua segia e le afā lo tatou faamoemoe? Le au uso e, ia outou iloa, o loo iai le Atua ia te outou. Tou te le ō fua i le folauga o le 2013. E faatupuina pea lava e le Atua le alofa i tagata uma  ma atunuu eseese uma e faatumuina ai lou gaogao.

Ua iai ola ua aveesea. O iai foi ola o sailia ma taumate pea. Ou te tatalo pea mo outou, ina ia aumai pea e le Atua e ona le mana uma lava le filemu i ō outou loto mafatia. Ia le pule le faanoanoa ma le le mautonu i o outou finagalo, a ia to maninoa mai le lagi i se aso. Ia ‘aua nei ō malaga ma le faanoanoa Samoa, a ia ō malamalama ma ō ua atoatoa.

 Ua ou iloa Samoa, e iai pea atugaluga ma popolega i le tausiga o nai fanau, o aoga, ma lumanai o aiga! Ia outou loto tetele. E mai le Atua mea uma. E ā le Atua foi mea uma. Ua tatou iloa ma ou mautinoa, e te le toe maua mea sa i ou lima. Ua vāea foi mafutaga sa faamauina. A o lenei le mea e tasi ua ou talitonuina, e le o oe o se tagata ua tuulafoaiina. Ou te toe fai atu, e le o tia’ia oe e le Atua. “ Tou te le ō fua” o le upu lea a le Atua. E le o se upu a Mose poo se upu a a’u – o le Atua. E ogaoga tiga o Iopu! E le i lafoaiina e le Atua Iopu. Na faatumu e le Atua. Na faaatoatoaina e le Atua. Ua faamanuia e le Atua.

Samoa e, ua ala eseese mai le tele o faalavelave tutupu. Ua tatou taumafai foi e natia le moni i le pogisa. Fai mai le Atua, Ou te faatupuina le alofa o Aikupito e faailoa ai, e tautala ai, e fafaga ai outou i lana amiotonu ma lona faamaoni. Tou te le ō fua. E ia te outou le malamalama o Ieova, e ia te outou le poto uma lava e iloa ai mea lilo. E ia te outou le tumu o le Alii o Iesu Keriso e mafaia ai mea uma lava. O lenei, e le tuugaogaoina outou e lō outou Tama o i le lagi. Na te faatupu le alofa faamafanafana, le alofa faamagalo, le alofa tausi ola, le alofa mamā i ō outou loto, e ta osoina ai lau malaga i lenei tausaga fou. Ou te faamanatu atu, o lo o iai pea ia i tatou le Atua. O lana upu ia e manatua, “ Tou te le ō fua”.

 

Amene.

 

7737063/7783782

E-mail: [email protected]

By Rev. Petaia Setu 13 January 2019, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>