Lauga - “O le taulaga tatau”

Tusia Rev. Petaia Setu ,

108 Hits

Rev. Petaia Setu

Rev. Petaia Setu

 (Mataio.25:40)

E le fou le ola faitaulaga o ō tatou tagata mai lava anamua. O faiga taulaga i fua o le fanua, ma taulaga ua faia i le soifua. O taulaga sa masani ai i ō latou atua anamua, ma taulaga sa faatonuina ai le ola tautua. Ua oo mai i ona po o le talalelei ma o tatou foi tupulaga, ua felefele solo le mau faauigaga. Poo fea e sa’o, a o lē fea ua le a’o? O le ā le taulaga e taofi ona toe faaauau, a o lē fea taulaga ua tatau? Ua faapea mai le tasi tusitala ole Feagaiga Fou, “Aua le galo ia te outou ona agalelei ma alolofa atu; auā o taulaga faapenā e fiafia ai le Atua.” (Epe.13:16). A o le uiga lava o loo tautala ai le Faamasino sili i ā tatou galuega ma lau auaunaga o aso uma: “auā na faia e outou i le tasi o ē aupito itiiti o o’u uso nei, o a’u lea ua outou faia iai.”

O le taulaga, o lau tapuaiga saoloto ma lau auaunaga mălie e tali faafetai atu ai i le Atua mo lou ola, i le ma le faaaogāina o ō tatou ola i le galuega saili ola (f.35,36).

O le taulaga tatau, o galuega poo tapenaga lelei ma le mamā ua finagalo iai le Atua. O le lelei ua fausia mai i le loto ua mălie; le loto ua faamaoni ma ua tumu i le olioli. Samoa, o le loto lenā o loo nainai mai e le Atua. Le loto  na te le faatulagaina le taualoa ma le mativa. Na te le faavasegaina le faipisinisi ma le limavaivai. Na te le faailogaina le tagata ma’i ma le fai faailoga; le mătua ma le laitiiti. E fafaga, e faainu, e faalavalava ma faamafanafana. E asiasi iai ma fai tatalo ai. E faasoa iai ma ofo alofa atu iai. Le loto na te le faitaulia le tele poo le itiiti ua alu. Na te le iloa lea upu o le feāu! E le afua ona fai ona o le faatonuga poo le faatauanau! E le siitia i le ola tausili ma faamamafa se mea faasili. Leai! A o le loto ua silafia e le Atua ua saoloto. Ua momomo. Ua saoloto le pese. Ua saoloto le siva, le vivi’i, le tautala, le ’ai, le savali, le moe. Ua saoloto le ola, ina ua iloa ola! E ola mole isi ola.

O le taulaga, o le tiute fai o aso uma. Ioe, o taulaga lava aso uma. O lau taulaga i le Atua e fanau mai i lou loto lou faamaoni ma lou fatuatua i le Atua, e ala i mea lelei ma galuega o le alofa tunoa e faaalia i totonu o lou aiga, o lou tuaoi tagata, ma lou siomaga.

Samoa e faamasino e le Atua lau taulaga o aso uma. O lona uiga, e le faatauagavale i le ola faasoa ma le alofa faaola o aso uma. Auā  e faaalia le taui o mea uma tatou te fai. O le fesili, o lē fea taulaga e tatau i le Atua? ae faapefea ona fua le taui o lau taulaga?

Uso e, vaai ifo i lou aiga i lau fanau. O le faamua lena a Iesu ma le talalelei. E iai se isi taulaga e te ono faafiafia atu ai i le Atua pe afai e le o lou aiga? Vaai i lou tuaoi. O le tagata puapuagatia. O le tagata mativa. O le tagata o loo fesulufa’i mo se lavea’i. O le tagata ma’i. Ole lima vaivai o loo pologa i lana amoga! Ae faapefea le tagata faigaluega ua le iloa mānava i le mamafa o le mau avega? Si loomatua e tau ma le la i aso uma? A o le tamā ua le mago le ie i le aso atoa? Talofa e, ua le mātū le afu. Samoa, e lua lava upu o loo faamatalaina ai e le tusitala o le Eperu le taulaga sa’o – o le agalelei atu ma le alofa atu. Fai mai Iesu, “auā na outou faia i sē aupito itiiti o o’u uso nei, o a’u lava lea na outou faia iai”.

O faapefea ona tapena lau auaunaga i le Alii lou Atua? O ’e iloa le finagalo o le Atua ia te oe? E te faitaulaga i le Atua i ni ā? Uso e, e loto le Atua i le alofa. O le agalelei foai; ae le o le agalelei faatalitali. O le alofa faasoa; ae le o le alofa talisoa. Auā o taulaga faapena e fiafia iai le Atua (Epe.13:16). E faaosofia e le lagona fuatia ifo ua lelei le loto e agalelei ma alofa atu ai. O le alofa tuufua. Le alofa lena e te savali ai. E te asiasi ai i ē ua saisaitia ma ē ua mafatia. E te fafagaina ai ma faainu. E te faalavalava ai ma faamafanafana. E te tatalo ai ma faamanuia. Ole taui, e fai mo outou tofi le malo ua saunia. Ioe, e le tuusaolotoina mo tagata uma lea malo. Peitai, ua saunia mo e ua moni le alofa. E mamā le loto. E faia mea uma i le loto mălie. Ua saunia mo e ua maua le saolotoga mo Keriso Iesu. O i latou ua le faapito le alofa. O ē ua tutusa le alofa i tagata uma. Ua tofia i le itu taumatau o le Faamasino. E nofo tupu faatasi ma le Tupu o tupu. Silasila la oe i faamanuiaga o le tagata e sa’o lona loto! E mamā lana taulaga! O le faamanatu a le feau o lenei vaiaso, e le o taulaga uma e fiafia iai le Atua. E le o le telē o le taulaga poo le tele o mea ua e foaiina e taulia i le Atua. E leai. A o le loto na fai ai. O le loto ua pogai ai le telē! O le loto na ala ai ona tele le foa’i!

Samoa e, e iai vaivaiga masani ua fua faatatau iai lau faitaulaga. Ua fua i le telē o lou suafa. Ona o oe o le fai upu a le ekalesia/nuu. Ona, e vaai mai tagata e fai au pisinisi. Ona e maualuga lou tofi, lau galuega. E te leotele i mea e fai. E te lima malosi. Ona, e tu lelei lau fanau. Uso, faalogo mai, e le mu lau taulaga. E fuamoa sou tofi poo sou avanoa i le malo ua saunia. Ou te toe fai atu le upu a le Atua. Ou te loto i le alofa (1 Kori.13:1-3).

Ia mamā lou loto. Ia moni lou alofa. ’Aua le vaai maualalo ma manatu faatauvaa i le isi uso a tagata. Aua le faatauemu i le tagata valea, poo le tagata ma’i. O tagata ua afaina i to’atūgā o le olaga, ma ē ua leiloloa i le agasala ia fai lenā ma au taulaga.’Aua ua ou sau ina ia latou maua le ola, ia maua atili ai lava. (Ioane.10:10).

Samoa e, ole alofa faaola lena na fai taulaga ai le Atua i lona Atalii pele e toatasi mo lou faaolaina. O le taulaga tatau, na faia i le finagalo mălie o le Atua, na āma ai le inosia ma le  faatausuai, na onosai ai ile sasa ma le ta, na inu mălie ai i le tiga ma le oti, ina ia tatou saoloto ma maua le olioli. Na maliu mo tagata uma, ina ia faaolaina tagata uma.

Ioe, ua uma ona āsa e Keriso le ala mo lau auaunaga. E faavae i le alofa le galuega faaola. A leai se alofa ua le aogā lava (1 Kori.13:2,3). A aunoa ma le alofa, ua le nanea lau taulaga. E le tatau lou fai taulaga mo ’o ma ’o ae o loo mafatia lou aiga ma ūa fālōlō! E le ole seetia i le faatauanau ae faasagasaga ai i le sami le fanau. Vaai iai! Vaai lelei i lau fanau! Vaai lelei i le tagata o loo mafatia! Vaai i le tagata o loo puapuagatia! Vaai lelei i ona foliga. Vaai lelei i ona mana’oga. E fia ola! fai mai Iesu, “ O a’u lenā.”

Samoa, o le taulaga tatau, ole taulaga sa’o (f.40). O le taulaga sili foi lenā i taulaga uma lava. The best of all sacrifices to bring to God is the gift of help to one of his children in need.  

“ E moni ou te fai atu ia te outou, auā na faia e outou i lē tasi o ē aupito itiiti o o’u uso nei, o a’u lea ua outou faia iai.”

 

Amene

 

7737063/7783782

© Samoa Observer 2016

Developed by Samoa Observer in Apia