Taugata tele si’itaga

Tusia Ulimasao Fata ,

27 Hits

Te’o Sio o Levi Sale’imoa.

Te’o Sio o Levi Sale’imoa.

Na molimau Te’o Sio o lo’o lelei lava tulaga uma o le olaga vagana ai le taugata tele o le si’itaga o pili i auaunaga a le malo.

Na maua le avanoa e faasoa mai ai Te’o Sio o le afioaga o Levi Sale’imoa i le Fofoga o Samoa a’o aga’i atu i se tasi o faleolao aua se malu taeao mo ia ma le aiga.

Na taua e  Te’o Sio le faigata o le olaga ua iai nei Samoa ona o le taugata o le soifuaga ua iai nei ae toe fa’aopopo atu iai ma le tele o siitaga o pili aua auaunaga o le galuege a le malo.

“O le tau lava ia o meaai aemaise oloa i faleoloa ua matua taugata lava a’o lea foi ua toe fa’aopopo iai ma le siitaga mai le malo i a latou auaunaga mo le mamalu lautele o le atunuu, ua matua le fetaui lava”.

“O le tau o le soifuaga ua iai nei Samoa ua matua taugata lava, faatusa atu i le tulaga o lo’o iai le tele o aiga i Samoa e pei o a’u o lo’o faapena lava ona fa’alagolago i le fa’atoaga talu le le gafatia o mea o lo’o I faleoloa”.

Na ia taua foi e talitonu lona loto e to’atele lava  aiga o lo’o faapena ona faanoanoa i lea tulaga aua o lo’o aafia ai i latou.

“Ou te talitonu e le na’o au o lo’o faapena ona iai lea fa’afitauli ma le lagolagoina lea tulaga ona oute iloa e tele aiga lima vaivai i Samoa toe le tele ni tupe maua mai i galuega”.

“Tele foi aiga i Samoa nei o lo’o fa’alagolago i mea toto ma le gataifale aua le tausiga o aiga, a’o lenei tulaga ua siitia mai e le malo ua matua le gafatia lava”.

O lo’o faafetaia ai e le uso ia Te’o Sio le galuega a Ali’i ma Faipule o lo latou nu’u.

“O lo’o manuia lo matou nu’u atoa ona o le lagolago mai o Ali’i ma Faipule i le fautuaina pea lea o le tupulaga i auala e tausia ai aiga ma nu’u”.

© Samoa Observer 2016

Developed by Samoa Observer in Apia