Se tane vai mo Ave ma lona aiga

Tusia Aruna Lolani ,

22 Hits

Mana’omia se tane vai: Ave Siloli mai Mutiatele Aleipata.

Mana’omia se tane vai: Ave Siloli mai Mutiatele Aleipata. (Photo: Aruna Lolani )

Na maua le fa’atalatalanoaga a le Fofoga o Samoa ma se tasi o tamā e suafa ia Ave Siloli mai Mutiatele Aleipata.

Na ia ta’ua le fa’afitauli o lo’o feagai ai nei o le leai o se suavai mautu.

“O ii le matou pito, pau a le fa’afitauli la e iai o le vai,” o lana saunoaga lea.

“Aua o matou e lei o’o atu le mita, o le vai la lea e iai o le ola mai matou mai gauta le mauga. Ia a o ituaiga aso la nei ua fa’aletonu le suavai, ua pē le vai aua ua ova fo’i le la.

“A leai la se suavai, e alu la le matou tīiga vai i nai aiga lea e mita i tai le aai, matou te tau savali a la aua fo’i e leai se matou sā e o ai.

“Pau a la sina mana’oga o le iai lea o ni tane vai mo le aiga; fuafua a la i taimi o timuga ina ia tau fa’aitiitia ai foi le o e su’e le vai i ituaiga aso fa’apenei.

“E leai se matou tane vai aua e le’i leva ona matou nonofo i uta; lea fato’a tolu nei tausaga.

“A na le iai le sunami lea sa uma atu matou te le nofoia uta.

“O le polokalame fo’i a le mālo lea sa fai na uma a i le vaitaimi o le sunami, e le i toe iai sesi polokalame.”

E to’atolu le fanau a Ave ma e laiti uma lava tamaiti. O tamaiti e lima tausaga, fa tausaga ma le lua tausaga.

“A uma a la le ma’umaga ia ua fai fo’i le la’uga vai.

“E mana’omia lava se tane vai ina ia sefe ai a matou vai, ma fa’afaigofie ai fo’i aso mugala aemaise foi mo le faiga o a matou mea’ai ae fa’asilisili ai lava tamaiti.

“O le ma’umaga a le alagatupe lea e iai. O lesi foi alagatupe o le su’ega lea o galuega foi lea a aiga e fai aua sina seleni fa’aopoopo.

© Samoa Observer 2016

Developed by Samoa Observer in Apia