Tala Oto’oto mai Leoleo

63 Hits

1. O le aso lulu 4 o Aperila na aumaia ai e se taxi lau pasese se taulealea i le ofisa o leoleo e faapea sa ia pikiina mai i  Siusega e fia malaga mo Laulii. Ae peitai ane ina ua taunuu i Laulii na sola ese ai lenei taulealea mai i le taxi e aunoa ma se totogiina o le taxi laupasese. Na tuliloa e nisi o taulelea o le afioaga lenei taulealea ma mauaina ai o ia ma toe tuu i tua o le keli o le taxi ma aumaia ai loa o ia e nisi o taulelea ma le ave taxi i le ofisa o leoleo e tusa ai ma le le totogiina o lona pasese. Peitai ane e taunuu mai i le ofisa o leoleo ma susue atu ai le keli o le taxi ua maliu lenei taulealea ma auina atu ai loa o ia i le falemai ma faamaonia mai ai ua maliu lava o ia. Na faia suesuega a leoleo ma ua molia mai ai ni taulelea se toafa i le fasioti tagata ma e tulai i luma o le faamasinoga i le aso 30 o Aperila e tali i o latou moliaga.

2.O le aso tofi le aso 5 o Aperila 2018 na logoina mai ai le ofisa o leoleo e le falemai i Motootua i se maliu na tulai mai i Vaitele fou. E faapea se faamatalaga o lenei mataupu na mafua mai i ni inuga pia ma iu ai ina feeseeseai nei alii e toalua ma na agai ese atu ai loa le ua maliu mai i lenei inuga pia. Na oso le ua molia i lana taavale ma agai atu ai loa ma soa le ua maliu i luga o le auala ma maliu ai lava.

Na aveina atu o ia i le falemai ma faamaonia mai ai e fomai ua maliu lava o ia. Na faia suesuega a leoleo ma molia mai loa lenei alii mai Vaitele fou lava lea na ia aveina le taavale i le moliaga o le fasioti tagata ma ua taofia nei o ia i lalo o le vaavaaiga a leoleo seia tulai i luma o le faamasinoga i le aso 5 o Me e tali atu i ona moliaga.

 3.Na ripotia mai i leoleo se mataupu e uiga i se talepe ga fale na tulai mai i se aiga i Vailele tai i le aso Faraile 6 o Aperila 2018. O lenei talepe ga fale na aveesea mai ai ni mea totino o se laptop, telefoni feavea faapea ai ma se tablet ma se ipad. Na faia suesuega a leoleo ma molia mai ai se taulealea 22 tausaga o Vailele lava ma ua taofia nei o ia i lalo o le vaavaaiga a leoleo seia aulia le aso 30 o Aperila e tulai ai i luma o le faamasinoga e tali atu ai i ona moliaga.

 4. Na ripotia mai foi i leoleo se taulealea 31 tausaga o Faleaseela ua maliu i le falemai i Leulumoega i le vaiaso ua tuanai i le aso lulu aso 5 o Aperila. E faapea se faamatalaga o lenei mataupu o lenei alii na faasuaava o ia ma na i ai se feeseeseaiga o ia ma lona toalua ma tago ai o ia ma tatui tioata o le latou fale.

Na tele se palapala alu mai ona manua ma aumai faatopetope ai loa o ia i le falemai i Leulumoega peitai e taunuu ane ua maliu o ia. E leai se tasi ua molia ai i lenei mataupu ma o lo o faaauau i ai suesuega a leoleo i le taimi nei.

 5. O le aso toonai foi 7 o Aperila 2018 na oo mai ai le aiga o le alii pagota o Uili Manuleleua ma aumaia lenei alii pagota i le ofisa o leoleo talu ona sola o ia i tua mai le toese i Tafaigata mai le faaiuga o le tausaga ua tuanai atu. Na sailia e leoleo le tino o Uili ma maua ai ni lau laau mariuana. O lea ua toe molia nei Uili i le sola lea i tua mai i le falepuipui faatasi ai ma ona moliaga fou i lona umiaina lea o fualaau faasaina ma e tulai o ia i le aso 30 o Aperila 2018.

6. O le aso 4 foi o Aperila na tulai mai ai se faalavelave tau taavale lea na ripotia mai i le ofisa o leoleo i le afioaga o Laulii. E faapea se faamatalaga o lenei mataupu o se taavale na agai mai i le itu i sasae mo Apia peitai ane na moe le na aveina lenei taavale ma tifa ai lana taavale i le i si itu auala ma fetoai ai ma le i si taavale o lo o agai atu i Apia mo le itu i sasae.

Na auina atu le ave taavale o le i si taavale na alu atu i lesi itu auala i le falemai ma toe tea ai i tua. Ua molia ai nei e leoleo le ave taavale sa moe i moliaga o le ave taavale faatamala ua oo ai le manua ma ua toe tatala nei i tua e faatali ai lona faamasinoga i le aso 17 o Aperila 2018 e tulai ai ma e saini mai i le ofisa o leoleo i Apia i aso Faraile uma i le ofisa o taavale afi.

 7. O le aso 29 o Mati na ripotia mai ai foi i leoleo se taxi o lo o agai mai le itu i sisifo e fuafua mo le taulaga i Apia  ma o lo o masalomia o lo o aumaia ai ni fualaau faasaina o le mariuana. Na taofia e leoleo lenei taxi ma sueina ai ma maua ai ni taga pepa mariuana e ova atu ma le selau ma ona tupu.

Ua molia ai nei e leoleo ni alii se toalua 34 ma le 32 tausaga i le umiaina o nei taga pepa mariuana ma ua toe tatala laua nei i tua ae e saini mai i laua i le ofisa o leoleo i Faleata seia aulia atu le 16 o Aperila e tulai ai i luma o le faamasinoga e tali atu ai i o laua moliaga.

© Samoa Observer 2016

Developed by Samoa Observer in Apia