Talosagaina le malo e faia le auala ma taga’i i le tulaga tau suavai

Tusia Fetalai Tuilulu’u ma Aruna Lolani ,

52 Hits

Le vai i uta o Magiagi o lo’o sua mai ai vai mo tagata Samoa.

Le vai i uta o Magiagi o lo’o sua mai ai vai mo tagata Samoa.

O auala lelei o se fa’amama avega lea ia matou galuega e fai ao le vai, e taua i le olaga o tagata.

O le manatu fa’aalia lea Taumaoe Upuese mai Magiagi.

O le tama e 50 le matua o lona soifua ma sa ia fa’amatalaina i le Fofoga o Samoa le tulaga ua iai nei lona ia olaga.

“E lelei ai le olaga i totonu o le matou nu’u,” sa ia fa’apea mai.

“E le gata i le filemu ae fa’amalosia fo’i a matou fonotaga mo le nu’u aua le fa’atupula’ia o le lelei ma le saogalemu.

“E sa’oloto uma tagata ma e fa’alogoina uma leo o tagata e fia fai ni o latou manatu.

“Ua tele suiga i totonu o Samoa ma o le mafua’aga lea ua taumafai ai le matou nu’u e apoapo ma tausi malosi i aganu’u fa’aSamoa.

“Ma o le mea tonu a lea ou te fia nofo ai totonu o lea nu’u.

Sa ta’ua e lenei tama ni fa’afitauli o feagai ma le nu’u.

“E lelei le tulaga o o matou auala ma o le tele o aiga lea ii nei e fa’amoemoe ma fa’alagolago i mea toto aua mea’ai ma le su’eina o se tupe.

“E fai o le leaga o auala e o ai ta’avale ae o auala fo’i ia le matou te savali ai luga.

“O maumaga o lo’o matou feola ai aua mea’ai mana’omia, e fa’atau atu fo’i aua tupe mo fa’alavelave e tutupu mai.

“Pei o le mafua’aga na o lo’u ou fa’atalosagaina atu ai i le malo, e mana’omia le fa’aleleina o auala lenei aemaise fo’i la le mataupu lea i le vai.

“O lo’u a ia manatu, e le tatau ona totogi ni pili o a matou vai aua o matou lea e alu atu ai le vai. O le matou nu’u e ona le vai lenei.

“O lea la le mafua’aga e toe totogi ai fua le vai pea fai o le vai lea a le nu’u. E le tatau lava ona totogi ni a matou pili, ae o le tele o aiga ia ii nei, ua tatipi vai ae o le vai lea a le nu’u, o le fanua a le nu’u.

Sa taua fo’i e Taumaoe o lo’o faitioina e le nu’u lenei tulaga i le totogiina o pili e fa’aola ai le vai.

“O la’u talosaga la lea i le malo ia mafaufau ai fa’amolemole.

“O lo’o mana’omia lava le vai, pau a na ae o isi uma mea mo le tausiga o le aiga o lo’o lelei.

O Taumaoe e to’aiva lana fanau ma o le to’aono o lo’o a’o’oga ma o lesi to’atolu o lo’o faigaluega.

© Samoa Observer 2016

Developed by Samoa Observer in Apia