Galue mo manuia o fanau

By Ilia L Likou 11 October 2017, 12:00AM

O le masani o le tamā i a Salā Tielu o le usu lea i le taeao e le’i malamalama e ao atigifagu aua se tupe fa’asili mo le fa’aa’o’ogaina o lana fanau e to’afitu.

Na maua le fa’atalatalanoaga ma le Fofoga o Samoa o lo’o ua fa’atoā sau ma lana uilipaelo atigifagu mai totonu o le lapisi i Tafa’igata.

“Ia ona ua fiu e su’e se galuega mo le tausia ai o si a’u fanau ma le fa’aao’ogaina o lea ua fai ai lava ma masani lo’u sau i’inei i le lapisi mo le aoina atu o atigifagu e fa’atau aua aoga a tamaiti.” O lana saunoaga mai lea.

“O lea lava la’u masani i taeao uma, ma o le agaga moni lava o le olaga lenei a ota fa’avaivai ai o lona uiga e leai ma se tamaititi e alu i le aoga.

“E ui ina faigatā ai le tau ma le manogi leaga o le lapisi i aso uma ma taimi uma.

Na ia fa’ailoa o lo’o i ai nisi o lana fanau matutua e to’alua o lo’o ua faigaluega i le taimi lenei.

“Ia e moni lava, e le taitai lava ona lava ni totogi e maua mai si a’u fanau mo si o matou aiga, e pei o lea lava le tulaga ua fai ai lava ma a’u galuega lo’u sau i uta nei e ao atu ai atigifagu.

“E pei ona fa’ailoa atu e usu mai le 4 i le 5 i le taeao ia fa’atoā fo’i i tai i le 12 mo sina ea lelei aua e le mafai ona nofonofo umi se isi le aso atoa i tua ona o le leaga o le ea.

“O lo’o o i ai fo’i lava ofu mo le saogalemu o lo’o fa’aaogaina ia ae le fa’apea la o le a nofonofo ai tua i o.

“E pei e manaia lava i a te a’u ia le usu mai le vaveao aua e moni lava o lae to’a ai le savili ma to’a atu ai ma le ea leaga mai le lapisi mai le manavaina.

Na ia ta’ua e le faigofie le feagai ai ma le lapisi  ma le manogi leaga i aso uma.

“Ia o le a se isi mea o le a fai? E pau lava lea o le tali o le taimi lenei e fesoasoani ai lo’u aiga, ua leaga lava aso.

“O le tau o le soifuaga i la’u ia maitau i ai, atonu e le na’o matou le aiga o lo’o feagai ma lea fa’afitauli i le tau fa’asoasoaina o le tupe maua aemaise o tupe fanau i le aoga.

“E ta’u sa’o atu lava e le na’o a’u o lo’o i tua i le lapisi mo le sailia lava o se tupe fa’asili e ola ai aiga, masalo a i ai se taimi e o’o atu i tua i’o ia ua pei lava o le fale faigaluega i le tumutumu ai o tagata e ao le atigifagu ma plastics.

E le na’o Tafaigata o  lo’o tosoina ai le uilipaelo a Salā e aofia ai ma nofoaga lalata ane o lo’o ia taeina ai atigifagu mo le aiga.

By Ilia L Likou 11 October 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>