‘Ausia fa’ailoga maualuga e se faia’oga NUS.

By Vatapuia Maiava 11 April 2016, 12:00AM

O se taimi fiafia tele mo le Iunivesete Aoao o Samoa, ina ua fa’apaleina fo’i se tasi o le ‘aufaigaluega, i ni fa’ailoga maualuluga.

O le faletua o Edna Temese-Ualesi - e le’i leva atu talu ona mae’a ana taumafaiga mo le fa’ailoga maualuga o le Foma’i-o le-mafaufau (PhD in Philosophy), o se taunu’uga ua tilofia ai le finau-maua’i a le Iunivesete e una’ia lana ‘aufaigaluega fa’apea fanau-a’oga mo tulaga maualuluga fa’apea. 

I se fonotaga a le Vaega-Fa’asalalau ma le Tapa’au o le Iunivesete, o Porofesa Fui Asofou So’o, na saunoa ai i le sao o le iunivesete mo le si’itia o tulaga tau-a’oa’oga mo tamaiti-a’o’oga o lo’o iai.

“O lea ua 32 tausaga o le tatou iunivesete, ae pei lava o isi iunivesete i le lalolagi, o le tasi lea o a matou fuafuaga ma fa’amoemoega, o le si’itia o tulaga tau-a’oa’oga,” o lana saunoaga lea. 

O tua atu la, “O le tasi lea o vaega aupito taua o le matou galuega fa’aFaia’oga i le Iunivesete, o le iai lea o faia’oga ua pasi-atoatoa ma agava’a lelei e a’oa’oina a matou mata’upu ma polokalame fa’aIunivesete.” 

 “I inei i le iunivesete, e tolu ituaiga polokalame o lo’o iai: e iai le polokalame mo palama, le uela ma isi matata ‘ese’ese; o lo’o iai le polokalame Fa’avae e tapena ai fanau mo a’oa’oga i iunivesete; ma le vaega mulimuli, lea e iai le polokalame mo A’oa’oga Maualuluga,” o lana fa’aaliga lea. 

“O a matou tapenaga fa’apitoa la mo A’oa’oga Maualuluga nei o lo’o matou taumafai ai lava e fa’alelei tulaga-agava’a ma fa’ailoga maualuga ia ‘ausia e le matou ‘aufaigaluega.” 

Peita’i, sa le-fa’apea le tulaga sa iai muamua. 

“I le fa’atoa amata mai i le 1984, e leai se tasi o le matou aufaigaluega sa iai se fa’ailoga maualuga lea, tau-foma’i o le mafaufau. O le taimi nei la, ua to’asefulu ma le ono nisi ua o’o i le maualuga lea,” o le saunoaga lea a le Tapa’au o le Iunivesete Aoao.   

 “E ‘ese mai le 16 lea, e to’asefulu isi o lo’o fa’agasolo i le taimi le sa’iliga o le fa’ailoga lava lea, o nisi e tatau ona mae’a i le fa’ai’uga o le tausaga nei, o nisi fo’i i le tausaga fou. 

“O se taumafaiga e fa’aauau pea, mo le si’itia o lea tulaga ma fa’aauau pea i le lumana’i.” 

Ae mo le faletua o Edna, e le o se mea faigofie. 

 “A’o avea ma teine-a’oga o le Iunivesete i tausaga ua mavae, e le’i maua ni a matou sikolasipi e o ai i Fiti, Ausetalia po’o Niu Sila fo’i, ma sa nonofo ai lava i inei,” o lana fa’aaliga lea. 

“Na matou iloa lava e iai si o matou tama’i-fa’amoemoe e talosaga ai mo ni avanoa i fafo; ma ‘ou o’o ai loa i Iapani ma maua ai lou fa’ailoga tikeri, ma ina ua taliu mai, na amata ai loa ona faia’oga i le iunivesete. 

“Na ‘ou iloa e tatau ona sa’ili so’u fa’ailoga e maualuga atu, ma e fa’afetaia ai le malo o Iapani, ona o lo’u avanoa na maua ai lou fa’ailoga lona lua (masters degree) ma ‘ou fa’aauau ai loa mo le fa’ailoga lea, PhD.

O le manuia o taumafaiga a Edna, o le fa’ailoga lea o le fa’amoemoe o tamaiti-a’oga ma le ‘aufaigaluega, e le-fiu-gofie ae finau maua’i pea mo mea-lelei mo le lumana’i. 

By Vatapuia Maiava 11 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>