E sili le ola galue
E sili le ola e galue nai lo le faitio ma nofonofo, pe e sili galuega ma fa’atinoga nai lo tala ma upu.
O lea le talitonuga o Tusi Tapuai, 26 le matua o Samua i Manono.
I le fa’atalatalanoaga ma le Fofoga o Samoa i le aso ananafi na ia fa’ailoa ai o ia e ulumatua o le fanauga e to’alima.
Na ia fa’ailoa o ia e fai lava sina faigata o le olaga ona e leai se isi o lona aiga o faigaluega po o galue foi le taimi lenei.
“Ia e pei o lo’o i ai se tasi o tuafafine o lo’o aumau i atunu’u i fafo e pei o ia lea o lo’o ua feasoasoni tele mai i lo matou aiga i le taimi lenei.
“O le isi itu o lo’o ua fesoasoani tele i le taimi lenei i si o matou aiga o le fa’ato’aga.
Na ia fa’ailoa o nei aso ua le toe faigofie.
“O le uiga o la’u tala e tagi lava i lima mea uma, ia o lo’o fa’alagolago tele fo’i le sami le tausiga o le aiga i le taimi lenei.
“E leai se tulaga fo’i le le e nofo ae pei e fa’alagolago tele i isi ma isi, e leai e tatau lavaona fa’alagolago lava le tagata i lona malosi.
“Ua tele suiga ua i ai nei aso ma la aso, o la aso na ola fetuafaa’i tagata , o nei aso ia au ese fo’i.
“Mo a’u lava ia e na o le fa’alua lava ona ou alu e fagota i le po, ua matutua foi nai o’u matua ae pei o lo la’ua taumafataga lava lea e manana’o ai.
“O lea lava la e pei e galue ai lava i aso uma i le fagota ona o le manaoga o matua.
“Ia o lo’u ia iloa i ai o le faaaoga tatau lava o le malosi o le tino manu o lea maua le malosi.
“E le gata i lea, olo’o ua soifua matua, aua o le tele lava o le tausi i matua o le tele foi lea o fa’amanuiaga e mafai ona maua.