Se’i o ta talanoa

11 January 2016, 12:00AM

Tatou te viia pea le alofaga ma le agalelei o le Atua-ona o lea ua tatou aulia manuia mai le faaiuga o lenei vaiaso muamua o le masina o Ianuri 2016.

E ui foi i na tatou fetaia’i pea ma mala ma puapuga-aemaise ai o le maliu ma le oti ua motusia ai mafutaga pele ma matua, uso ma tuafafine aemaise ai o le fanau pele-ae faafetaia pea le Atua-ona o le faatotoe pea o i tatou e to’atele e o’o mai i lenei taeao fou!

O a foi o tatou faanoanoaga-o lea lava ua soloia e le Atua o tatou loimata maligi ma faanoanoaga-ma liua i le fiafia ma le olioli! Ia fo’i atu pea le viiga ma le faafetai ia te Ia e faavavau, faavavau lava! Ae alo maia-o le tatou talanoaga masani foi lenei ma le mamalu o le ‘aufaitau o lenei nusipepa; aemaise ai foi le mamalu lautele o le atunuu o loo fiafia pea e silasila ma faitau i lenei tusitusiga i Aso Sa uma.

A’o lei amataina la le tatou talanoaga-e muamua lava ona tuuina atu le faamanatu e faapea-O lenei tusitusiga- e le o se tala fai fua-e le o se tala fatu-e le o se tau faaleaga poo se faaoloataua-ae ua na o se taumafaiga lava e faailoa atu ai mea o loo tutupu i lo tatou atunuu ma le pogai ua tutupu ai-ona aumai lea o outou finagalo tatou te faasoaina faatasi-ina ia maua ai se vaifofo mo ia faafitauli! Ia, o lena ua i luga le ulutala o le tatou talanoaga mo lenei Aso Sa-ma e i ai lo’u talitonuga-ua manino ma malamalama le uiga  o le ulutala! 

“O LEA UA ILOA LE MEA LILO. “ O le a lea mea lilo? O le tali-“E mana’o lava le HRPP-ia toe manumalo i le Faiga-Palota o loo loma nei- ona toe foi mai lea e faafoe le atunuu! I se tasi faaupuga-“E mana’o lava le HRPP na te toe pulea foi le atunuu mo le isi 5 tausaga o i luma!

A tatou fesili la pe ua fia tausaga talu ona pulea e le HRPP le atunuu-o le tali-“o lea ua savalia le 40 tausaga! Ia-e leai se tio i lea faamoemoe-talu ai-o le aano moni lea o le fai o nei mea o faiga-malo faa-Pati! Ia ona pulea ai se atunuu mo se vaitaimi umi-tusa lava pe o’o i le faavavau o latou pulea se atunuu!

A tatou tilotilo lelei la i le tala faasolopito o nei mea o faiga-Pati i totonu o Samoa-e le o se mea na masani mai ai! Aisea? Leaga o le finagalo lava o le atunuu-ia tau lava o Tama-a-Aiga e faafoeina le atunuu! Aisea? Leaga o i latou tonu ia ma o latou matua ia ua tofafā mai Tia Sa- na tafetotoi faatasi ma le atunuu –i le sailiga o lona Malo Tuto’atasi e afua mai le Pulega a Siamani-faasolo mai ai ia Niu Sila se’ia o’o ina maua lona Malo Tuto’atasi ia Ianuari 1962.

O iina foi na tulai mai ai Mataafa e taitai le atunuu-soso’o ai ma Tupua Tamasese Lealofi-faasolo mai ai ia Tupuola Efi lea ua avea nei ma Ao o le Malo o Samoa! A tatou tilotilo lelei la i faamaumauga a ia faiga-malo-matou te le tau fai atu Samoa o lena e te silafia mea uma!

Ina ua faatoa tulai mai le HRPP e tau mai i le taimi nei-a faatusatusa o latou faamaumauga-matou te le tau fai atu Samoa –o lena e malamalama e pei o le aoteatea i lo outou silafia. Mai le taimi na faatoa tulai mai ai le HRPP e o’o mai i le taimi nei-Samoa e le o se tala e avane ai!

Afai o outou silasila lelei i le tulaga ua i ai nei le atunuu-e le masino faaletonu! Ae o ai o loo sili ona afaina ai? O le tali -o le atunuu! Ia-o lea ua toe o se aga ona aulia lea o Mati o le tausaga nei- e fai ai le Faiga-Palota Lautele! O le a la le mea ua tatou iloa nei?

O le tali-“O lea ua atagia le Pagi.” O lona uiga-o lea ua aliali mai le mea lilo? O le a le mea lilo? O loo manana’o lava le HRPP e toe manumalo mai e faaauau pea ona faafoe le atunuu! Ia taatia la polokiki ma finauga faa-Pati-ae mo tatou lava ia –poo le atunuu atoa e filifilia o tatou sui faipule ma le faiga-malo e pulea le atunuu-o le fesili-o e manuia pe leai? O outou maua le taui e tusa ai ma lo outou afu maligi?

O outou maua faamanuiaga uma e tatau ona outou maua-e tusa ai ma a outou aia tatau faa-tagatanuu o Samoa? O amiotonu ma sa’o le faaaogaina o tupe o lou afu maligi? O amana’ia a outou aia tatau e tusa ai ma le faiga o tulafono ma faiga faavae? O mafai ona faatino le amiotonu ma le faamasinoga mo tagata uma? Aisea ua faatetele ai le gaoi, talepe fale-toso teine, sauaga mataga i fanau ma le sauaina o tamaitai? O tali atu le faiga-malo i outou mana’oga ogaoga? 

O le uiga o se faamatalaga-afai o lea ua savalia le 40 tausaga o pulea e le HRPP le atunuu-o outou maua mea uma e tusa ai ma faamanuiaga o tagatanuu uma e tatau ona i ai? Afai o le tali e leai-o le a la sou manatu i le mana’o o le HRPP lea ua faailoa mai e toe fia faaauau foi lo latou pulea o le atunuu?

E le faatonuina la e le matapia le manaia-ae mo se atunuu ua mapuitiga e pei o Samoa-afai e te le o manuia-o ai la na te avatua le manuia ia te oe pe afai e leai sau ma’a o togi mo lea faamoemoe?

E le o se faatosina-ae o le fe’au o loo tau molimoli atu-“e leai, leai lava se tasi na te aumaia sou manuia vagana ai lava ua e taumafai e saili! Saili faapefea? E saili i le faaaoga tatau o lau palota! Aisea?

O lau palota o lau aia tatau lea-e te filifili ai mo le mea lelei e te manuia ai! I se tasi faaupuga- e le faapea e te faatautala i lau aia tatau ae faamoemoe i le isi tagata lou manuia! Afai la o oe o le matai poo le tamā o se aiga toatele-o le manuia o lou aiga atoa ma lau fanau-o loo i ou lava lima! E le faapea e faatau lau palota i tupe ae faamoemoe e palota le isi mo lou manuia! O le uiga la o se faamatalaga- afai o e fia maua manuia- o oe lava e te sailia! Ia manatua foi- o le 5 tausaga e le o se taimi puupuu!

E le o se tala foi e avane ai pe a ‘ou fai atu-afai ua faalatalata atu sui faatutu ia te oe-ona e manatua lea-ona pau lava lenei o le taimi e latalata atu ai-ae uma loa le palota ma taunuu o latou faamoemoe-ona fai loa lea o le upu lea e fai soo e tamaiti-“Tofa la’ia! E faatoa toe iloa atu foi pe a latalata le isi faiga-palota!

E le o se faatonuga la-ae o le agaga lea e tau faailoa atu- afai tatou te le o manuia i le taimi nei ae tatou te fia manuia- o i tatou lava e faia le tonu ina ia tatou manuia ai! Ia manuia tele le Aso Gafua Samoa ma ia faamanuia atu le Atua! 

11 January 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>