Ia fa’amaoni
O Apisai Mago e 21 ona tausaga mai le afio’aga o Satapuala.
Na maua le fa’atalatalanoaga ma le Fofoga o Samoa i le aso ananafi na ia fa’ailoa ai e ao lava i tupulaga talavou ona fa’aaoga tatau lo latou taimi.
O lea sau galuega o fai lenei taimi?
“O a’u o lo’o o’u galue nei se tasi o aiga mo le va’aiga o lo latou fa’ato’aga ma le lafu manu.” O lana tala mai lea.
“Ia o nisi e fai mai e faigata ae o a’u ia e ala ona faigata ona o le paie, ae a tu’u atoa lava i ai le malosi ma le mafaufau ia e leai lava se mea e faigata ai.
“O le olaga lava fa’apena, a le aunoa ma le afu ia e le mafai ona maua se mea e ai.
Na ia ta’ua o le taimi lenei o le taumafai lava e fa’atino so’o se vaega mo le lelei alu i luma o le fanau.
“E pei o lea lava le itu taua i a te a’u lava ia, o se itu lelei ai o le taumafai lava ia aua nei ola falolo i le lumana’i.
Na ia fa’ailoa le taua o le ola fa’amaoni.
“Ia e leai lava se isi mea nai lo le ola fa’amaoni i galuega, e moni fo’i o nisi o taimi ua alu le mafaufau e alu e tafao.
“Ae pei lava e ave lava le fa’amuamua i la’u galuega aemaise o le ola fa’amaoni i mea uma e fai.
“Aua e le fa’apea a alu e tafao ona maua ai lea o se isi galuega, leai, e ao lava ona fa’amalieina le vala’auina ia na mafai ai lea ona va’ava’ai atu i se isi vaega e sili atu.
“I a te a’u lavaia o le itu sili lea ona taua.
E ese mai le ola galue lelei, na ia fa’ailoa e pau le tulaga o lo’o ua i ai nei Samoa o le taugata ai lea o le tau o le soifuaga.
“Ia ua o tatou iloa uma lava lea tulaga, ua matua’i le mafai ona gafatia e tagata le ola ua i ai nei, ua fai lava sina maualuga o le soifuaga.
“E le fa’apea la o le a se tulaga o i ai ae o le taumafai lava ia lelei mea uma aua le aga’i ai le lumana’i aemaise o le ola lelei o nai o tatou tagata.