E iai o tatou talitonuga i o tatou sootaga faa tagata soifua e faapea, ‘e malosi lava le loto.’ Ioe, e te fiu lava e nanā lou Samoa i atunuu i fafo, e iloa lava oe o le Samoa. Sa ou ta’ua muamua foi, poo fea lava o le lalolagi nei e fealua’i ai le suli, o le suli lava; e le mafai ona aveesea. La lea la, ua fiu Iosefa e tau nanā ma taofiofi, e le i mafai. Aisea? E malosi lava le toto. E lagona lava e le toto lona tupu’aga ma lona fasinomaga. Fai mai le tusitala, ua alaga Iosefa, ia o ese uma tagata uma mai ia te ia! Tagata o Aikupito o loo i le maota. Ua tagi foi le tama ma le leotele, ua oo ina lagona e Farao ma Aikupito uma. Ua le mafai e le gutu ona taofi le finau a le loto uso, loto aiga, loto nuu – O a’u o Iosefa.

E le o se igoa poo se upu Aikupito, o le upu Eperu. O Iosefa lea o le ulumatua a Rasela, ae lona sefulu ma le tasi i le fanau tama a Iakopo. A o le palemia o Aikupito. Na o le Farao lava e i luga a’e o Iosefa. O le fesili. E maifea ona tupu o se mea faapea? O le upu a le Atua, “o o’u manatu e le o outou manatu, o o’u ala e le o outou ala.” (Isa.55:8). Auā ua vaai Farao ia Iosefa o se faamanuiaga tele mo Aikupito peitai, ua le o le fuafuaga lea a le Atua. O le ata ua leva ona faataoto a le Atua, o Iosefa, o le faailo lea o le Faaola  i le lua afe tausaga a o lumanai le fanau mai o Iesu. Vaai i suafa ia e lua o Iosefa ma Iesu – e tupu uma mai i a’u e tasi o le upu Eperu e faauigaina, “faaolataga”.

Silisili i le loto uso ma le  agaga faa-suli moni o le upu muamua lava, “o a’u o Iosefa” O lona uiga, o le faaola. O le ata tonu lea a le Atua. O le tama lea – o le faaola. Na auina e le Atua le tama o Iosefa i Aikupito ina ia fai ma laveai ma faaola i lona aiga i taimi ua vevela ai le oge (f.7). Na vave ona lagona i le toto lana feau poo lana misiona na auina ai e le Atua i lea nuu; o le fai ma faaola. Ua moni lava le upu, O le uō i aso uma, ao le uso i le aso vale. O le maa na lafoaiina, ua fai ma maatulimanu aupitoaluga. Sa agaleagaina, ae ua fai ma sulufaiga. Lea ua tu mai i Matagiolo, le atalii sa faamemelo ai le toeaina o Iakopo.

O la tatou mătua, o le tautinoga. O le tautinoga e afua mai i le loto ua momomo; le loto ua mafatia i le alofa. O le loto na tapena e le Atua i tiga ma faigata e faaātaāta mai ai le uiga o le faaola i le lalolagi. Pei ona ou mua’i tā’ua, e tupuga mai igoa ia e lua i le a’a e tasi – faaolataga.

O Iosefa na auina ese atu e le Atua mai lona tamā ma lona aiga i se nuu ese e fafaga mai ai lona aiga i taimi o le oge. O Iesu na auina mai e le Atua mai le lagi i le lalolagi e fai ma “vai ola” ma “areto o le ola” mo tagata uma (Ioa.4:10; 6:48). O Iosefa na teena ma faalataina e ona uso. Na latou faatau atu i lima o le fili, ma ua fai ma pologa.  O Iesu sa faalataina e Iuta, faafitia e Peteru, le i talitonuina e Toma. Fai mai le atalii o Sepetaio, “Ua maliu mai o ia i lona lava nuu, ae le i talia o ia e ona lava tagata.” (Ioa.1:11)

E luasefulu sekeli o siliva na faatau atu ai Iosefa e ona lava uso, ole tau lea o le pologa (Ken.37:28). A o Iuta o le soo moni, na ia faatau atu Iesu i le tolusefulu tupe siliva (Mat.26:15), o le tau masani o se pologa.

Na molia Iosefa i tuuaiga sesē o le taumafai e faamalosi le ava a Potifara ma tuuina atu ai i le falepuipui (Ken.39:19-20). A o Iesu sa tuuaiina sesē i lona faalata o tagata ma upu leaga i le Atua (Mat.26:64-65). Ina ua tu’ua e Iosefa le falepuipui sa faaeaina i le lima taumatau o Farao. Ina ua tu’ua e Iesu le tuugamau sa faaeaina i le aao taumatau o le Atua. 

Samoa, o le tautinoga a Iosefa o le tautinoga o le loto atoatoa. O lona loto o lalo, e le o luga. Manatua le anau atu a Peteru ia Iesu ina ia latou nonofo ese i luga o le mauga, peitai o le finagalo o Iesu o i lalo i le mea mea o iai tagata. (Mat.17:1-9). E ui ina faaeaina i Aikupito, a o lona loto sa matuā atoatoa ona manino. E le o Sapenapaenea; e le o le tulaga palemia; e le o teuga ma mamalu faa Aikupito; e le o le pule foi i le ’oa uma ma le tamaoaiga – a o lona valaauina. O a’u o Iosefa. O le suli o le Aiga. Ua filifilia e le Atua e fai ma faaola (f.5). E le i faaosofia e le tulaga faaeaina se taui ma sui. E le i tauanauina e lona tulaga pule se leaga e faaoo i ona uso. E le i mālō le mamalu ma le oa i lona loto; a o le fai uso, ma le alofa faamagalo. Aisea? O le faaola. O le ata ia o Keriso.

Uso e, poo e iloa e oe ’oe lava? poo e malamalama i lou tuātagata ma lou faasinomaga? Na to ’ese e Iosefa laei o nuu ese ma foliga o Aikupito, ae faailoa lona tagata moni i le malamalama. O le toomaga i aso leaga. O le fesoasoani ma le laveai i tagata. O le suli ia o le faaolataga.

Samoa, na taoto lava mamalu ma itū taulagi o lo tatou Alii ae inu i tiga ma puapuaga o le ola nei ona o a’u ma oe. E le i manatu i lona tulaga Atua, ae ia laveaiina lava tā’ua. Fai mai a ia, “ua ou sau ina ia outou maua le ola, ia maua atili ai lava.” (Ioa.10:10) O le faaola ia o oe ma lau fanau ma lou aiga. O le suli ua ia aumaia le ata e faata’i mo tatou uma. Ia fai oe ma laveai i soo se tagata. Ia fai i tatou ma faaola i tagata uma. Ia e iloa o lou faiva ma o tatou tofi, o le valaauina e faaola i tagata. O le galuega faaaola e faavae i le alofa. O le alofa e onosai ai; e lima foai ai; e loto faamagalo ai; e fafaga ai; e asiasi atu iai; e faamafanafana ai; e tausi lelei ai. O le alofa foi e tatalo ai ma faamanuia atu iai.

E faapefea ona e tautino atu oe i le Atua? O ai oe?

Amene