Toe mafaufau tasi lava… Ua tā’ua so’o fa’apea: “Ua fa’aleleia e le tagata-soifua mea uma vagana ai lava le tagata.” O le fa’anoanoaga lea, ona o lo’o fa’aauau pea ona le-avea isi o tatou ma tagata matutua, a ua ola ai lava pei tatou o ni tamaiti ma teineiti laiti.

O le tasi o fa’ailoga o le tagata ua matua, o le loto-pulea lelei. A o le tasi lea o mea aupito faigata ona tatou fa’atonutonu, o o tatou laulaufaiva ma ‘upu e tautatala ai.

Ua mafai ona tatou fa’alalata manu-fe’ai ma manu-tetele pei o elefane, o tafola ma liona, peita’i, e le’i mafai lava ona tatou fa’alata ma fa’atonutonu le tama’i maso i o tatou fofoga, lea e ono avea o se a’upega mata’utia e fa’atiga ai ma fa’aleagaina mafutaga ma so’otaga.

“E le mafai e ‘upu ona ta’ei o ponaivi, ae na o fatu.” O le la’asaga muamua la, o le mafaufau. Nofo lelei ma mafaufau i ‘upu o le a e tautala ai: Pe moni, pe fa’amaoni? Ni ‘upu alofa pe fa’atiga-loto? E talafegai pe leai? 

O le la’asaga lona lua, ‘aua le tautala so’o. E la’ititi atu avanoa e te fa’atiga ai i isi tagata – e aofia ai ma ‘Oe – pe a le-tautala so’o. O nisi taimi, e sili atu ai lou fifilemu. Manatua le tulafono, “E sili atu le la’ititi. “

E tele atu lou sao pe a le-tautala so’o. O tagata e tele mea e fia talanoa iai, e le tele ni ‘upu latou te fa’aaoga. 

O le isi fa’ailoga o le tagata ua matua, o le fuafua leleia lea o ou fa’amoemoega ma fa’amuamua o le olaga nei, a ia ‘aua ne’i ma’umauina lou taimi i na o mea fa’afiafia ma mea le-mautu.

Ae tatau ona fa’aalu lou malosi, ou taimi ma lou iloa e fa’aleleia ai soifua o lou aiga, o uo ma tagata o tou soifua fa’atasi.  

O tagata ua matutua, e soifua mo se mea mautu ma lelei ae le fa’amuamua latou lava. E fiafia e foa’i atu, ae le na o le talia o mea uma. “E ‘uma atu le ola nei, pau mea ua to’esea mai ia tatou, o mea sa tatou taumafai e taofiofi mamau iai.’

O tagata matutua ma malolosi, latou te le mo’omia ni taimi fa’apitoa e fa’afiafiaina ai.  E malamalama lelei latou na, e maua le fiafia mai le fa’afiafiaina o isi tagata. Pau lena o le ‘auala tatou te maua ai le fiafia moni, o le fa’afiafiaina o isi tagata.    

Manatua, na fa’ailoa manino mai e Iesu le fa’ata’ita’iga tonu o le tagata matua, ma ‘aumaia lona malosi e mulimuli ai i fa’ata’ita’iga sa ia Fai. E na o Ia lava e mafai ona a’oa’o atu ina ia e taunu’u i le atoaga o le tagata soifua matua, na fausia e Le Atua ia soifua ma manuia i le ola nei.

Na fetala’i Iesu: “’Ou te le’i sau e fa’apologa ‘outou a ia ‘au’auna ma avatu lo’u ola mo isi.” Tatalo nei ia Iesu e fa’amagalo ‘Oe ona o lou iai pea i ou ala tuai ma sese. Tatalo ia ta’ita’ia Ia i lou ola e amata nei, ma aso uma o totou o lou soifua. Toe mafaufau tasi lava…