Ta’utino le solo a le tamaloa

10 February 2016, 12:00AM

Ripotia e Deidre Fanene

Fa’aliliu e Maiava

 

Ua aga’i nei le malo e “fa’asa’o fa’amatalaga” ma ripoti e uiga i le fa’ama’i o le Zika i totonu o Samoa. 

I le fonotaga ma le vaega fa’asalalau lea na ‘auai le Ali’i Palemia ma le Minisita o le Soifua Maloloina, na fa’amalosi’au ai i turisi, ina ia asiasi mai pea i Samoa ae ‘aua le fa’apopoleina ona o le Zika. 

Na saunoa Tuila’epa, o le Minisita fo’i mo Tagata Asiasi mai Fafo e fa’apea, o ripoti ua ‘aumai nei,  ua ta’ua ai Samoa ua maua ai le fa’ama’i lea, ua tele ai le afaina o tulaga tau-tagata asiasi mai fafo.

“O le mafuaga lea ua manatu ai le malo, e fa’asa’o le mea lea mo tagata uma, e aofia ai tagata mai fafo, e leai se fa’ama’i fa’apea i Samoa nei,” o le fa’aaliga lea a Tuila’epa.

Sa ‘auai fa’atasi i le fonotaga lea, sui-sinia o le Matagaluega o le Soifua Maloloina, e lagolago ma fa’amautuina le mau na fa’aalia e Tuila’epa ma le Minisita o le Soifua Maloloina, o Tuitama Dr. Leao Tuitama.

Na fa’ailoa e Tuila’epa, o ia faiga tau-fa’amata’u sa fa’aaoga e fa’afefe ai tagata ia ‘aua ne’i afea ai Samoa. 

“Moni e to’atolu gasegase sa fa’amaonia na maua i le Zika, a o le tausaga lena talu ai,” o lana fa’aaliga lea. “E to’atasi na fa’amaonia ia Setema ma le lua ia Oketopa, ona pau lea. Ae leai nisi na afaina lata mai nei.” 

Na ta’ua e Tuila’epa, o vaega fa’asalalau nei i fafo na latou faia le tala lea, e foliga o lo’o matua pepesi le Zika i Samoa.

“O ripoti nei ua mafua ai le tele o fa’afitauli mo turisi mai fafo,” o lana fa’aaliga lea.

“E iai lava le tagata lea e faia ripoti nei, e mumusu ai turisi e afea Samoa, o se nofoaga e asiasi mai iai mo tafaoga.” 

O ripoti nei, pei ona ta’ua e Tuila’epa, ua tele ai le afaina o pisinisi i le lotoifale, ae maise lava latou e fa’amoemoe i tupe e maua mai tagata tafafao.

Na ioeina fo’i e le Minisita o Tuitama lea tulaga.

“O Oketopa i le tausaga talu ai, le masina mulimuli na maua ai se gasagase ua a’afia i le Zika,” o lana saunoaga lea.

“Lea ua o’o mai ia Fepuari, e le’i toe iai lava se gasegase o le Zika ua fa’amaonia. Ae o ripoti ia mai fafo ua tatou fa’alogo iai, o lo’o ta’ua ai, e na o Samoa lava le atunu’u e tasi o le Pasefika ua maua ai le Zika.  

“O taimi uma ‘ou te fa’alogologo ai i ripoti nei, e le ta’ua ai lava ua fa’amaonia le iai o le fa’ama’i lea i isi atunu’u o le Pasefika.

“E na o Samoa lava lea e ta’u ai a’o le mea moni, o le tulaga lea e tasi sa maua ia Oketopa i le tausaga ua te’a.”

O lo’o masalomia e Tuitama, e “iai lava se mafuaga na faia ai ia ripoti.” 

“Tatou te le-iloa le mafuaga o ia ripoti. Pau le mea ua iloa, ua popole ma fefefe tagata o lo’o fia asiasi mai i lo tatou atunu’u.”

Na fa’aopoopo mai fo’i: “E sese i Sini ripoti nei ma o le tulaga lena o lo’o taumafai le malo e fa’amautuina, o lo’o sa’oloto pea tatou mai nei tu’ua’iga le moni.” 

Na fa’ailoa fo’i e le Palemia, o lo’o fa’atino galuega uma a le malo i le mea e gata ai le malosi, ia taofia ai le o’o mai o le Zika i Samoa nei.

10 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>