Fa’aaoga tatau taleni mai le Atua

Tusia Vatapuia Maiava ma Sarafina Sanerivi ,

108 Hits

FA’AAOGA TATAU LOU TALAVOU: Simone Sulusi mai le afioaga o Solosolo.

FA’AAOGA TATAU LOU TALAVOU: Simone Sulusi mai le afioaga o Solosolo.

O ese’ese lava taleni ua foa’iina mai e le Atua mo le tagata. 

Ae po’o le a lava le taleni ua tu’uina mai, pau lava le mea e tatau ona fai, o le fa’aaoga tatau lea ma ia fa’aolaola.

O lea le finagalo o le taule’ale’a ia Simone Sulusi mai le afioaga o Solosolo.

O Simone o lo’o fai nei lana pisinisi o le tusiina lea o mamanu i luga o pepa fa’ata ma fa’atauina atu mo le eleiina o laei. 

Na ia ta’ua o lana lea taleni o lo’o fa’aaoga e maua ai se fesoasoani mo lona aiga.

“E tofu lava le tagata ma le taleni na foa’i mai i le Atua,” o lana lea fa’aaliga.

“Ua savali nei i le fa tausaga talu ona ou fa’atinoina lea taleni ma maua ai seleni e fesoasoani i mea e fai i totonu o le aiga ma maua ai a’u tupe.

“O le olaga lenei, o le tinou lava ma le sogasogā e maua ai manuia o aiga. A ua fa’aletonu mai le aoga, o lo’o iai lava isi auala e maua ai mea e tausi ai aiga.”

Na ia ta’ua foi, e na te le’i a’oa’oina mai lenei taleni mai se isi lava mea. 

O le maitau lava ma lona ola sogasoga ua ia iloa ai fai lenei taleni.

“E leai se mea e faigofie i lenei olaga, ae a fa’amaoni ma finau, e tatou te maua lava auala e fa’atinoina ai a tatou taleni.”

Na ta’ua foi e Simone, e latalata lava i le $1000 tala i le vaiaso lana tupe e maua mai i le fa’atauina o ana pepa fa’ata.

“A tele lava fa’atau ma oka a tagata e fai mai e tele foi le tupe e maua.

“Ae iai foi lava aso ma vaiaso e la’ititi ai le tupe maua.

“E to’atele foi tagata o si o matou aiga. Ae faigaluega uma foi nai ou uso matutua, ae o lo’o aoaoga nisi.”

E le gata i lea, na ia fautuaina foi le to’atele o nisi o le tupulaga ina ia fa’aaoga tatau o latou taimi ma taleni e tautua ai aiga ma saili manuia ai. 

“E tele lava ina fa’alogoina pea le mau tupulaga o lo’o fa’aaoga sese o latou taimi.

“Ia te a’u lava ia, e ma’imau lava le taimi e fai ai na mea. Ae a fa’aaoga tatau lelei le malosi ma le taimi e tautua ai aiga, ona manuia loa lea o lumana’i mo i tatou uma.”

Na fesiligia foi mo sona finagalo i le tulaga o lo’o iai le olaga i Samoa i lenei vaitau, ma na ia fa’aalia mai ai, o lo’o sologa lelei pea lava mea uma i totonu o Samoa. 

“E faigofie lava mea uma i totonu o Samoa. 

“E leai lava se mea o fa’aletonu ai. E iai lava taimi e faigata ai, ae o le natura lava lea o le olaga. O aso ua lelei, o aso foi ua masei.

“O le mea taua lava o le taufai sa’ili manuia aua se manuia o aiga ma fanau.

“Ae o le olaga lava ia i Samoa, e to’afilemu lava ma o lo’o manaia lava. E le pei o isi atunu’u o lo’o tutupu ai vesiga ma taua.”

© Samoa Observer 2016

Developed by Samoa Observer in Apia