Fa’aaloalo ma tausi lelei le va-fealoa’i ma tama’ita’i

Tusia Vatapuia Maiava ma Sarafina Sanerivi ,

130 Hits

Siaosi Valelia, e 21 ona tausaga mai le afioaga o Sasina, Savaii.

Siaosi Valelia, e 21 ona tausaga mai le afioaga o Sasina, Savaii. (Photo: Sarafina Sanerivi )

O se tasi o tulaga e lauiloa ai Samoa ma lana aganu’u, o le tulaga lea i le fa’aalolao ma le va-fealoa’i ma isi tagata. 

O le isi tulaga o le ava fatafata lea i le mafutaga a le tama ma lona tuafafine. 

Ae peita’i o se tasi lea o tulaga ua va’aia lava le iai o suiga i lenei vaitau. 

Ua tauau ina mou atu lenei vaega taua o le aganu’u a Samoa. 

O lea foi le finagalo o le taule’ale’a ia Siaosi Valelia, e 21 ona tausaga mai le afioaga o Sasina, Savaii. 

Na ta’ua e Siaosi, e taua tele le tausia lelei lea o le va o le tama ma le teine i totonu o Samoa. 

O lona finagalo, e taua lava le ave o le fa’amuamua i tama’ita’i.

“O Samoa o se tasi lea o atunu’u o lo’o iloga i le aga lea o le fa’aaloalo ai lea o tama i o latou tuafafine po’o tama’ita’i foi.

“E le pei o nisi o atunu’u, o Samoa, o lo’o taufai laiga tutusa lava tina ma tama i le tele o vaega i totonu o Samoa.

“Ma o se mitamitaga lena ia te a’u i le tulaga o iai le olaga i Samoa i lenei vaitau. 

“O le ala lea e tele ai lava ina faia e tama galuega mamafa, ae nafa lava tamaitai ma le vaiaga o fale ma tiute i totonu o le lotoifale o so’o se aiga.”

Na ia ta’ua, o le auala lava lea na fa’ata’atia mai e o tatou tua’a ua lagomau mai ti’asa.

“Na tatou feola mai lava o iai le vaega lea o le ave o le fa’aaloalo ma le fa’amuamua i tama’ita’i. 

“O lea foi la ua matutua ma fai aiga, o lo’o tumau mai lava ia a’oaiga i mafaufau.”

E le gata i lea, na fautuaina foi e Siaosi i latou e le’o tausia lea feagaiga ina ia fa’amamalu lelei ma tausi lelei le va ma tamaita’i. 

“Ou te iloa lava e a’u ia o lo’o iai lava nisi o lo’o faia le tulaga lea o le fa’aoo lima i tama’itai.

“Ae e ese le taua o le ola fa’aaloalo ma le ola ava i nai tuafafine ma tama’ita’i. 

“E tele lava ina fa’alogoina pe le fa’aoolima ai o nisi i tama’ita’i, ma ou te ofo lava a’u i ia tama.

“O le tama Samoa lava ia o lona i’oimata lona tuafafine. O ia foi e malu ai lona tuafafine.

“O le teine lava ia i le olaga fa’asamoa, e na’o na fa’amaepaepa ma fai nai fe’au laiti, ae tautua e tama ma tuagane le aiga.

“O le ala lea na fa’atonuina ai i tatou e o tatou matua. 

“Ia o a’u ou te sau mai Savaii, ae o lea ou te faiava nei i Salelesi.

“Ma o lo’o ou taumaai lava ma le malosi ina ia fa’atinoina fe’au i totonu o le aiga ma tausi lelei si ou to’alua ma si o matou aiga.”

© Samoa Observer 2016

Developed by Samoa Observer in Apia