Ua faapea le upu a Matini Luteru e masani ona ou fai atu ai, “Ou te le iloa le ala o loo ia taitaiina ai a’u ae ou te iloa lelei lo’u Taiala.”Na alu tauto’ai lava foi Aperamo ma lona le iloa poo fea e alu iai, ae sa alu lava ma lona talitonuina o Le ua taialaina lona olaga (Ken.12:1,4). A o le Atua lava lea, na afio ane i luma o Isaraelu i le ao faaniutu i le ao, a o le afi faaniutu i le po, ina ia savavali i le ao ma le po le nuu ina ua tuua e i latou o Aikupito.

Pe iai ea se mea e faigata i le Atua? Pe le o le Atua ea lea na ia tuu eseese le malamalama ma le pouliuli? (Ken.1:3,4) Pe le o le Atua lava foi lea na ia faapotopotoina vai uma i lalo o le lagi ma tuu eseese ma le eleele matūtū? (Ken.1:9,10). O le Atua e mamao lana Tōfa.

Na te faia folafolaga, ma faataunuu  i lana lava pule i taimi ua finagalo lava ia iai. O ai na vaai muamua i Kanana? E le i oo lava foi Mose i le nuu ua folafolaina! A o le mau a i latou ua malamalama i le va lea, e faapea, e lua ala e oo atu ai mai Aikupito i Kanana. Muamua, o le ala puupuu e ui ane i luga i le itu i matu o Aikupito ona maua lea o laueleele i le itu i toga (saute) o Kanana i le fa poo le lima aso e malaga ai. Lua, o le ui solo atu i le vaomatua e pei ona filifili e le Atua.

O le fesili e lu’i  ai oe ma lou talitonuga  i le Atua, Aiseā? Aiseā ua ave ai e le Atua le tolu miliona o tagata i le vaomatua, e umi toe gaoā? Afai la ua le faaaogaina e le Atua le ala puupuu , o lona uiga, ua tatau la ona tatou malamalama ma talitonu e pei o le mau a Matini Luteru ua tā’ua i luga. Pe umi lava la ma mamao le ala lea, a o le mea mautinoa, o le ala sili lea nai lo se isi lava ala; aemaise o faailo ua mamao tapena iai le faaolataga.

O tatou Samoa, e le mana’o lava i le umi. E musu i le ala o mea. Ae fiafia i le faauilāvea.

O le malaga a Isaraelu i le vao, ua le o se tofa na faafuāveta a o le faatofala’iga na afua mai i le fesaga’iga a le Atua ma Aperamo (Ken.12:7). O fuafuaga poto a le Atua. E faatonu e le Atua; e taiala lava le Atua. O le curriculum o le fasefulu tausaga o Isaraelu i le vao na o mea kuku’a lava.

E iai le fiafia, e iai foi le faasiasia. O taimi ua lelei, o taimi foi ua masei. O itu aso o le olioli ma le taufaiofo, o aso foi ua faafiufiu ma faaonoono. A fiafia ua alalaga leotetele ma tuliususū; ae a le fiafia ua muimui solo ma faa’ū’ū. O taga ia i le ala. O foliga na o le malaga. Samoa, e iloa le umi o le ala tatou te ui ai pe a tatou fetaui ma malosi eseese o le olaga. Tele fesuia’iga eseese o le tau o loo foli mai luma. O le lu’i o le mafaufau, o feta’ia’iga o malosi faaletino, ma taua faaleagaga.

O le lu’iina o lou tagata ma le aiāina o mafutaga. O le tofotofoina o oe i le siomaga ua e iai,  ma le save’uina o au faaiuga fai. E tele atua o le ala. Ae fai mai le tusitala o le Tusi nei, ua afio Ieova i luma o le nuu i le ao faaniutu i le ao e taitaiina ai i latou i le ala, a o le afi faaniutu i le po e faamalamalama a’i latou, ina ia savavali pea i le ao ma le po. O foliga ia o le silisili ese ma le mata’utia o le Atua o Isaraelu. Ua le iloa se po. Ua tutusa le ao ma le po i le malamalama o le Alii.

Na toe faama’alo e Iesu le mamalu lea ina ua ia faapea atu i le au faresaio ma le motu o tagata, “O a’u nei o le malamalama o le lalolagi o lē mulimuli mai ia te a’u, e le savali o ia i le pouliuli, ae ia te ia le malamalama o le ola.” (Ioane.8:12) Oka, se manaia pe a o oe lea ma a’u, a ea? Sa’o le taiala. Manino i lo oulua sootaga. Savali i taimi uma i lana faasinomaga. Pe iai se isi ala e ese mai ia Iesu Keriso, o le ala i  malo? (Ioane.14:6) O le ala e talileleia ai i le Upu? O le ala e tasi i le Ola? O faamanuiaga ia sa sapi ai le nuu o le Atua i le vao. E le maua i se ala puupuu. E le vaaia i au ala faatogafiti. E ‘asa i le faigofie.

O le itu sili ona taūa, o le iai pea lava pea o le Atua i le fasefulu tausaga i le vao faatasi ma le nuu. Ua faailoa mai ai ia te i tatou, o i latou uma ua tata’i e le Atua i le vao poo le piliota e tofotofoina ai, e le tuuaunoaina pe lafoaiina e le Atua. Na te tausi, leoleo, a’oa’o ma taitai ina ia tupu atili ai lo latou faatuatua, ma saga faaalia ai pea le mamalu ma le Silisili ese o le Atua mai lo latou faatuatua. Viia le Atua!

Samoa e, e le malū pea lava aso uma o le olaga. Ua iai foi si a tatou pitolaau tauave. Ia faatuatua i le Atua. ‘Aua le gaua’i i le vave, ma ala pupuu a le alii o le lalolagi. Auā o le itu aso e te magoto ai, e tia’i ai foi oe e le alii o le lalolagi. A o le Alii le Atua, e faamaoni lava ia. Na te le tuua oe ia mapeva lou aao (Sala.121:1-3). Afai foi e te pa’ū, na te taofi mau pea i lou lima (Sala.37:24). O le faaola ia o oe ma lau fanau; o oe ma lou aiga.

Ou te faamanatu atu ia te oe,   e iai pea le Atua ia te oe ma lou aiga i aso uma ma taimi uma. E fai pea o ia ma malamalama o le ola i mea uma tatou te iai ma le malaga o lenei tausaga. E ui ina umi le ala, a o le ala sili lea ua filifilia e le Atua mo oe ma tatou uma i lenei tausaga. Ia ola tapenapena ma sauniuni. Tatou tutū faatasi i le faatuatua, ma talitonuina lo tatou Taiala. Afai e osofia oe i peau o le vasa, ia toa lou loto, ma ia e iloa, e le aveesea lava e le Atua le ao faaniutu i le ao, ma le afi faaniutu i le po i ou luma. E iai pea lava ia i lou loto, i lou aiga, ma lau malaga. Talitonu i le Atua. O le Taiala ia o le tatou malaga.

Ia manuia le malaga i lenei Tausaga Fou.

Amene

7737063/7783782

E-mail: [email protected]