E tāua uma tamaiti

Tusia Vatapuia Maiava ma Deidre Fanene ,

85 Hits

Loimata Te’o.

Loimata Te’o.

I le fa’atalatalanoaga a le Fofoga o Samoa ma se tasi o faiaoga i Faleula o Loimata Te’o 52 tausaga mai i Vaie’e Safata ma Toamua sa ia fa’ailoa mai ai le tāua tele o le a’oa’oina o le fanau.

“O le galuega fa”afaiaoga e ese mai i galuega uma lava.

“E mafai ona ou tā’ua o la’u galuega fa’apolofesa lenei mai le Atua.

“O la’u molimau e mafai ona ou a’oa’oina le fanau ina ia avea ma foma’i, faifeau, ma isi vaega esesese uma lava o le olaga tau auaunaga e mafai ona ou faiatu o a’u lava lea na tu’uina mai ai le galuega talai a le Atua o le a’oa’o.

“E le gata i le tino, mafaufau ae sili ai le agaga.

“Auā o le upu moni o le tele ma le anoanoa’i o matāfaioi a le tinā ma le tamā e tatau ona fai o lea ua fai uma lava e le faiaoga.

“E mafai fo’i ona ou fa’apea atu o matou nei e faiaoga i mea uma.

“O le laei o le tamaititi o lona tino o le atina’eina o lona mafaufau ina ia atamai i le poto salalau ae sili ai le olaga fa’aleagaga.

“Auā o lo’o molimau le tusi paia e fa’aeaina oe e le poto, e fa’apaleina oe e le poto.”

Sa ta’ua e Loimata o le faiaoga o le tagata pitosili lea ona tāua i le olaga o le tamaititi aoga.

“E ala ona e nofo ona o lou faiaoga e ala fo’i ona o’u nofo atu ona o lo’u faiaoga sa i ai.

“O le itu lena e ala ai ona ou mimita auā o lea ua ou tilotilo atu i fua o a’u galuega sa fai.

“E fa’afefea ona e iloa fua o au galuega o lou vaai atu lea ua maua se galuega a le tamaititi sa e a’oa’oina.

“Fa’afefea ona e iloa le fua o le galuega a le faiaoga, e le gata ina e maua se aiga e ala i le tautua o le auauanaga lena.

“Afai ua le lava le tomai e faigaluega ai i se galuega ofisa a ua maua le tomai ma le agava’a e tautua ai ma tausi ai matua.

“O le aogā lena sa aoga ai lena tamaititi.”

Sa saunoa fo’i Loimata po’o le a le tele o tikeri ma fa’ailoga maualuluga e maua e le faiaoga ae a le atamai le tamaititi e leai se aogā.

“O le fa’afiatuli muamua lava o le fa’afitauli o tamaiti i le tia’i aoga.

“O le matafaioi lena o matua o le una’i mai o fanau i le aoga.

“Ae ala foi ona tia’i aoga lesi tamaititi pe afai e sau i le aoga e le o ola ma tiotio le faiaoga.

 “E le tāua la le pua ma lafo ae tatau ona tilotilo lelei le faiaoga po’o le a le mafua’aga aua o le ogatotonu galemū lea o le galuega.

“E amata mai i matua, PTA, faiaoga ma le tamaititi aoga e taulai uma i ai.

“E le na o le va”ai la na o matua ae tatau ona tilotilo uma i itu taua o le a’oa’oina o tamaiti o le nuu

“Manatua fo’i so’o se galuega lava o le tele o sulu e maua ai figota.

“Po’o le a le tomai o le pule ma le faiaoga ae a leai se lagolago e le mafai ona maua se mea lelei.

“A lagolago mai matua, PTA, faifeau ma faiaoga e le taitai ona maluelue le la’au lea e toto, ma e fua mai fo’i e matuā matagofie e aogī i aiga, itumalo, nu’u aemaise le galuega a le Atua.”

© Samoa Observer 2016

Developed by Samoa Observer in Apia