“E ala ona matitiva tagata Samoa o le lē gaioi ma le lē galulue, ma le lē o e faigaluega,”  Lafua Leatasa o Tanumapua.

O Lafua o se tasi o tamā o le atunu’u na maua le avanoa e le Fofoga o Samoa e fa’atalatalanoa ai i le aso ananafi, ma na ia fa’ailoa e fa’apea o lo’o sologa lelei mea uma ma vaega e tele  o lo’o i ai le soifuaga i totonu o lona aiga i le taimi lenei.

“E mo le silafia ai, e to’alua tagata faigaluega o si o matou nei aiga, o lo’u aiga (to’alua) ma lo’u afafine.” Lafua Leatasa.

“O lo’o galulue i se tasi o fale (faleoloa) i gatai atu.

“O le taimi lenei e to’aiva tagata matutua o le aiga, ia ma le fanau iti e pei ona outou silasila atu nei i ai, ma e le’o tele lava ni vaega o fa’aalu ai se tupe e mafai ona maua mai.

O le fesiligia ai o le tamā i tupe fa’aalu mo le aiga, na ia fa’ailoa mai ai e selau ma nai ona tupu se tupe e fa’aalu i le vaiaso ona fesoasoani ai lea i ai o nai mea toto i tafāfale aua le tausiga o le aiga.

“Ia o lo’o lava le fa’asoa, ma o lea lava e tau maua nai seleni ,e  fa’atau ai mea’ai aemaise o pasese a le fanau i le aoga.

 “E tau talafeagai (tutusa) lava le olaga o Apia ma tua nei, ae ua na’o nai vaega lava (tau ese’ese ai) aua o nei e fai lava ma tau maua mai ai nai mea aano.

O le a sou silafia, o i ai se ese’esega o le olaga i Apia ma nu’u i tua?

“O Apia e tau leai ni mea’ai e ai, ae o ‘i’inei e tōtō tau lava nai mea’ai.

O lona lava ia manatu maumaututu e ala ona matitiva le tele o tagata o le le gaioi.

“O le to’atele lava ua tu’u lava i le paie.

“Ou te talitonu lava a’u fa’amalosi (e atia’e aiga) ae aua le faalagolago i Polokalame o lo’o  alolofa ma agalelei mai i nisi o taimi o le a lelei mea uma.

“ O se tasi o itu, e tatau lava ona fai (fuafua) a tatou fanau ma ia iloa e gafatia (ona tausi), a ola ane fo’i la tamaiti ia ua o latou iloa fo’i lava (ona fuafua).

Ua 17 nei tausaga talu ona aumau le tamā i a Lafua ma le aiga i Tanumapua.