Le feauauta’i le fa’asoa i vaiaso uma

By Vatapuia Maiava ma Ilia L Likou 09 September 2016, 12:00AM

O le aiga o le tinā, Titi Olive o Fasito’o-Uta na afea e le Fofoga o Samoa i le aso ananafi.

O le fa’atalatalanoaga na ia ta’ua ai  ma le manino le tulaga pagatia o lo’o feagai ma le aiga i le taufa’asoasoa ai o tupe e mafai ona maua i vaiaso uma.

O le taimi lenei, e to’atasi le tama teine o lo’o faigaluega i se tasi o aiga i totonu o le Itumalo ma e na’o le $100 le tupe e maua i le vaiaso.

“E na o le selau talā i le vaiaso, ma e na o le mea’ai lava a le fanau, ia uma.” Titi Olive.

“Ia a aumai le totogi, e le lava aua o mea fai o le lotu , ia o mea e fai o le nu’u, ia aemaise le tausiga o le aiga ma le fanau.

“ E leai se mea foi lea e lelei ai se aiga pe maua ai se lelei o se aiga, e tusa na o le faigaluega lava maua mai le totogi i le Aso Faraile, ia e uma lava e le’i taitai le vaiaso.

“ E to’atele le fanau aoga, o nisi o fanau aoga o lo’o nonofo aoga i Apia i le uso o si o matou aiga (to’alua).

“Ia e le lava le fa’asoa ,  o lo’o taumafai fo’i nisi o a matou mea tōtō i se tasi o matou fanua lea o lo’o lalo atu.

“O lo’o aga’i atu ai si a’u fanau e galulue ai i lenei taimi e taumafai ai si o matou aiga vaivai…aua e to’afa la’u fanau aoga.

“E to’alua le ‘au a’o’oga i Apia, to’atasi o lo’o aoga i Nu’u’ausala , to’atasi o lo’o aoga i le aoga a Pope Paulo ia ma nisi o le fanau iti o lo’o a’o’oga i le aoga  Fa’ata’ita’i a le E.F.K.S. i gatai.

“Ia e le taitai ona gafatia le selau tala, aua na o le tolu aso o le vaiaso ae uma  le $100.

“O nei  vaitau ua tatou i ai ua taugata le soifuaga o le mea lava e maua ai le seleni ia o lena lava, a maua foi se galuega o se tamaititi ia ua fesoasoani mo le aiga.

O lona talitonuga e i ai lava aiga o lo’o i le tulaga lelei le tamaoaiga ae o nisi  e  lima vaivai.

“O lea lava o lo’o ola le vai ma le eletise aua ua ola cashpower mea uma, aua a leai se tupe ia ua le ola moli, ia e taumafai lava si o matou aiga.

O se tasi o talosaga o lo’o silasila pea i ai le tinā  mo le fa’aleleia ma o lo’o talia pea i le taimi lenei o le talosaga lea i auala ma le  fa’ao’oina o le paipa o aiga o lo’o i gauta o le afioaga.

By Vatapuia Maiava ma Ilia L Likou 09 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>