‘Ou Te Tatalo ia E Siva (Vaega 1)

By Fa’aliliu e Maiava 09 June 2016, 12:00AM

Toe mafaufau tasi lava…Na alu le tafaoga a se ulugali’i i luga o mauga o Kalefonia. O aso uma lava, la te va’aia ai se ali’i-talavou, o nofonofo i tafatafa o se ‘auala-laupapa e tau-lalata ane i le faletalimalo sa nonofo ai. I le amataga, na la fa’apea o lo’o fagota lea ali’i, a ina ua fa’alatalata atu, fa’atoa la iloa ai, e leai. E na o le nofonofo lava o le tamaititi lea e leai sana mea o fai, ma fa’ataupupula i le lagi.  

I le aso mulimuli o le tafaoga a le ulugali’i lea, na fesili ai i le ali’i talavou lea: “Aisea ua e saga nofonofo ai lava i lena nofoaga e tasi i aso uma?” Ae tali le tama, “O ‘au nei e talitonu i le ola e fa’afouina. ‘Ou te talitonu ua tele ituaiga olaga ‘ese’ese na ‘ou ola muamua ai ma e tele fo’i isi olaga e o’o iai pe a ‘uma atu lenei. Ua ‘ou manatu ai, e sili lo’u nofonofo e fa’a’uma atu fa’apea lenei fo’i ituaiga olaga.”   

E foliga e mālie, a o le mea moni, e matua mata’utia le mafaufau o le talavou lea, ona na te le o silafia, e tasi-pe lava le ola o tagata-soifua uma, ma e le-tatau ai lava ona na o le “nofonofo e fa’a’uma.” E ‘ese’ese lava aso o le soifuaga nei, o aso ua la, o aso fo’i ua timuga, o aso ua lelei, o aso fo’i ua solo-i-tua. O aso ua momosi ma malosi, o aso fo’i ua fa’agasegase ma fa’aletonu le tagata na faia e Le Ali’i. Ae le taofia ai le taimi a Le Atua –o lona uiga, o a tatou aga ma taga, o fa’atinoga ma siva ‘ese’ese o sisiva ai i le ola nei, e le ‘umi na’ua ae mae’a.  

Fa’afofoga fo’i i ‘upu o le pese lauiloa “’Ou te tatalo ia e Siva: “Talosia ia ‘aua ne’i e fa’atauagavale i le ola e tasi; talosia ia ‘aua ne’i tu’u-aunoaina ‘Oe e le alofa. Afai ua tapunia le isi avanoa, ‘Ou te tatalo ia matala atu se isi mo ‘Oe. A ia e ta’utino mai, o le a e finau ma lou fa’atuatua atoatoa mo se isi avanoa … afai e fai sau filifiliga – nofonofo pe siva, ‘Ou te tatalo, ia e siva… ‘Aua lava ne’i fa’aseseina ‘Oe e se lagona sese, ae tu’u-tasi mea uma i Lagi.

A o le tala-lelei la, e le’i matua tuai na’ua. Amata aso uma i se suiga fou, suiga fou e lelei ma aoga mo ‘Oe. Ioe sega e, e pu’upu’u lava ma sa’asa’a le ola, ua tatau ai ona fa’atino nei, i le aso lenei! Manino lava fetalaiga a Iesu: o le ituaiga soifua o tatou ola ai nei, e fua iai le nofoaga o le a tatou ola ai i le fa’avavau pe a tatou tu’ua le mea nei – ola ma Ia pe ola fo’i i le mea e le o Ia.

Na o Ia lava, le Ali’i Foafoa e silafia ‘auala ma la’asaga sa’o o le siva tatou te sisiva ai i le olaga nei. Ioe, tatalo nei ina ia fa’asino mai Ona ala ma pule e Ia lou fatu ma lou tagata atoa, i aga ma taga o le “siva” e malie ma tonu na Ia foafoa ‘Oe e ina ia e soifua manuia ai nei ma le gata’aga. Toe mafaufau tasi lava… 

By Fa’aliliu e Maiava 09 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>