“O le teuteuina o ‘a’ai ma afio’aga aua le fa’amatagofieina o se itu e ao ona fa’amalosia i totonu o aiga, nu’u ma afioaga ta’itasi.” Lē pulenu’u o le afioaga o Tufulele, Tagiilima Si’u i le fa’atalatalanoaga ma le Fofoga o Samoa i le aso ananafi.

O le galuesga a tinā ma tama’ita’i o le afio’aga o lo’o ua galulue ai o le tapenaina ai lea aua le tauvaga mulimuli o le tausaga lenei i le fa’amatagofieina o ‘a’ai ma afio’aga ta’itasi.

Na ia fa’ailoa o le lelei o lea tulaga e le gata  mo le taimi lenei ae o le aga’i atu ai i le lumana’i ma o se tasi lea o vaega o lo’o ua taumafai ai pea e fa’atinoina  ia galuega mo le lelei alui i luma o le afio’aga.

“Ia ou te talitonu e le’i o’o le taimi o la matou galuega mulimuli i le fa’aiuga fo’i o le tausaga ia o le taimi lenei o le galuega o lo’o faatinoina o le fa’amāmāina o le ‘a’ai  i le asiasiga o le malo o lo’o lumana’i nei.

“E i ai fo’i le isi galuega  o lo’o matou alo atu i ai ae le’i o’o i le fa’ai’uga o le tausaga.

“O  le aoga mo tinā ma tama’ita’i i totonu lava i so’o se faiganu’u ia e atia’e, tapenapena o so’o se tulaga aua lava le atina’eina o so’o se vaega.

“Ia o lea le fa’amoemoega tele o lo’o ua i ai nei e mo le  una’ia ai fo’i o fanau e fa’atinoina le tele o vaega nei aua lo latou fo’i ola tuputupu a’e.

“E le gata i lea ae o le fa’amatagofieina lava aua le tele ai o turisi malaga mai fafo.

“O le fesoasoani i totonu o alalafaga aemasie o le aga’i i luma, ia ou te iloa o se fa’ata’ita’iga lea i tupulaga faia’e ia faifai pea lenei masani.

“Ou te iloa i totonu o le afio’aga o le fa’amamaina lea ma le teuteuina i totonu o lo matou a’ai aemaise, o le tulaga e pei ona i ai ma ou te iloa si o matu afioaga o i matou o le pae ma le auli.

“O lo matou taofi a lelei lava tinā aemaise o le fa’atinoina ai o latou galuega e fai i totonu o aiga ma afio’aga ia o le manuia fo’i lea o si o tatou atunu’u aua e leai se mea e faigata pe a galulue punoua’i mo le lelei o so’o se atina’e.

Na ia fa’ailoa o le taimi lenei ua tapena atu fo’i tinā ma tama’ita’i o le afioga i sa latou fiafia e  fa’ai’u ai ma le manuia feau ma tiute o lenei fo’i tausaga.