LAUGA - “Ia la’a i luma”

Tusia Rev. Petaia Setu ,

74 Hits

Rev. Petaia Setu

Rev. Petaia Setu

E tumau le faavae ae fesuisuia’i faiga. O le manatu taatele lea ua masani ai le faalogo. E foliga mai o le faiga o loo tā’ua, ua mafai ona faasino i ni mafaufauga fausia; o ni auala po o ni metotia; o ni galuega faaalia, poo ni suiga vaaia tino mai.

E tumau pea le faavae. E le tatau ona ō ese ma le faavae, e le tatau ona manatu faatauvaa iai, e le tatau lava ona faagaloina le faavae. Peitai, e le tatau ona moe i luga o le faavae, pe tu tu ai foi i le faavae e aunoa ma se malosi faale faatuatua, po o se ola faaleagaga o atia’eina ai. I le manatu o le tusitala o le tusi nei, ia ō i luma; e tatau ona aga’i i luma. Tuu mea tuai ma taatia faiga masani ma faiga faavae anamua, ae la’a i luma ma le loto faatuatua.

Soo se tagata Isaraelu lava, e ta’ua o Eperu. A o tagata ia sa ave iai le tusi nei, o Eperu Kerisiano. O i latou ia sa liliu ese mai i talitonuga ma faiga faavae o le lotu Iutaia, poo le olaga faa Iutaia, ma ua avea i latou ma tagata kerisiano. Peitai, ua avea foi le fai ma kerisiano, ua le maua ai se to’afilemu ona o le matamata ita ma le tulituliloaina pea e Iutaia. Ua faasinosinomia, ua inosia, ua agaleagaina, ua lamatia, ua saūaina, ma oo ai lava ina fasiotia.

Ua fetōtōa’i le toatele; ua le iloa poo luma poo tua poo le tu faaleiloga ai pea i le mea o iai. Ua manatua vave ai lava le upu a se tasi faifeau a o i le aoga faafaifeau. Na suesueina le tevaaga a tama. Fesili toeaiina, Tu i luga le tagata na alu i le solaaga. Tu i luga le uso lea. Nonofo i lalo. Tu i luga i latou e le i o ai. Toe tu foi i luga le uso lea. E fai atu i ai nisi uso ae faapea mai, ‘E le iloa lava le ku e laki.’ Ua saili e le mafaufau se laveai.

O fea tonu e ola ai? O Iesu Keriso po o le faa Iutaia? Ua le mafai e nisi ona pulea le fefe. Ua oo mai le lagona sa sa’i ai le nuu anamua ia Mose (Eso.14:12). Toe foi i talitonuga faavae o le lotu Iutaia. O le faamalosi la a le tusi nei, la’a i luma; ia tatou faaoo atu i le faaatoatoaga (perfection). O lea atoatoa, o le mătua, poo le ta’umătuaina lea o lou iloa ma lo’u malamalama ia Iesu Keriso, o le ua sili ona lelei i mea uma. E faavae lea manatu o le na tusia lenei tusi i lona talitonuga i le maoa’e ma le maualuga tele, ma le silisili atu o Iesu i lo pulega ma aga faa Iutaia.

Afai ua silisili ona lelei o Iesu Keriso i lo agelu, auā e auauna ma vivii agelu ia te Ia; afai ua sili ona lelei o Ia i lō Mose, auā o Ia na faia Mose; afai ua sili ona lelei o Ia i lo faiva faa ositaulaga o Arona, auā o lana taulaga e tasi mo le olaga atoa; E sili ona lelei Ia i lo le tulafono, auā o le puluvaga Ia o le feagaiga e sili ona lelei; aisea lava la e ātu ai ma popole? Aisea e saga femoumoua’i ai ma fefe pea? E lasi ona faamălieina ia Keriso nai lo le leiloloa i le faa Iutaia.

Ua na o Iesu Keriso lava na ia aumaia le auala i le moni ma le auala i le Atua. O le manatu autū lea o lenei tusi. O Ia, e sili ona lelei i lo pulega faa Roma; o Ia e sili ona lelei i lo talitonuga faa Iutaia, auā o loo ia te Ia le saolotoga ma le faaolaina o tagata uma e talia o Ia, ma onosai’a tiga uma ona o Ia, ma ua faatuatua i lona suafa. O le vaai mautinoa lea a le tusitala i le silisili ese o le Alii o Iesu Keriso, e saga faamalosiau ma faatupuina ai le faatuatua ola, e finau maua’i ai ma la’a ai pea i luma i le faamoemoe mautinoa ua tatalaina e Iesu.

O lona uiga, e le tatau ona toe taotaomia i tatou i le mea tuai ua le mafai ona tupu. ’Aua foi le taofia i tatou i faiga faavae masani. Fai mai le tusitala nei, Tuu mea nā, ae tatou aga’i atu i luma. Ia tatou vaavaai i nisi auala ma metotia faaleagaga e fau ai i luga o lo tatou talitonuga i lo latou Atua, ni lelei ma ni manuia faaleagaga mo Samoa, le ekalesia ma ona tagata.

Samoa, o le olaga faa Kerisiano e le o se olaga faa fifilemu. O le moto a se tasi tamā Enelagi – o lē ua le naunau ia sili ona lelei, ua le naunau ia lelei. O lona uiga, e le tatau ona tatou nofoa’i ma faalolololo ai lava i faiga masani poo le mea tuai. Ua tatau ona tatou moe alaala ma moe manatunatu e pei o le upu i le tamaloa Aana. O le Meleniuma Fou lenei tatou te folau ai! Ua saoasaoa le lalolagi, ua televave foi suiga, a o lea a e faamaepaepa le tōfā i luga o le faavae; a o lea lava e taoto le faautautaga i luga o mea tuai! Samoa, tatou see agai i luma ma le loto faatuatua i le faasinomaga mai le Agaga o le Atua na faavae ai Samoa, mo se lelei ma se saolotoga o ona tagata lautele. 

Le ekalesia, ua leva ona tatou laa i luma. O le feau o le talalelei e le na o le folafola ma molimau atu, a o le taulamua ma muamua atu i luma o tagata. Tatou galulue mo ni auala ma nisi metotia faaleagaga mai le Atua, ina ia toe fuataiina ai le ola faaleagaga o Lana ekalesia i Samoa ma le lalolagi atoa. 

Lou atunuu e, ia faalologo ma le onosai. E mafaia mea uma i le faatuatua. A o le faatuatua o le faalagolago lea i mea ua faamoemoe iai o le mautinoa lea o mea e le o vaaia (Epe.11:01). Ia ‘alo ese mai galuega sesē ma galuega ua mate ua leai sona uiga, ina ia iloa le toe fuataiina i le salamō ma faatuatua e vaai atu ai i le Atua. Auā o le salamō i mea sesē, e fanau mai ai le faatuatua i le upu moni. A o le Upu Moni, o le Alii ia ua sili ona lelei, na ia saunia le taulaga e sili ona lelei mo tagata uma, e ala i lona lava soifua paia. 

Uso e, laa nei loa i luma i lenei masina fou ma le loto faatuatua, auā e faamaoni lava le Atua.

 

Amene

 

7737063/7783782

© Samoa Observer 2016

Developed by Samoa Observer in Apia