O le tiute fa’atāma i totonu o aiga

Tusia Aruna Lolani ,

17 Hits

USITAI I MATUA: Asolua Lam Cheung mai Tuanai ma Malie.

USITAI I MATUA: Asolua Lam Cheung mai Tuanai ma Malie. (Photo: Ilia L Likou )

O se mea tatau i le tupulaga ona fa’amuamua o latou aiga.

O se talitonuga lea a se tasi o ali’i mai Tuanai ma Malie e suafa ia Asolua Lam Cheung.

Sa ia fa’apea a lelei ona fa’atino lea tulaga, o le lelei fo’i lena o aiga uma.

“Ua fai lava sina leva ona ma nonofo ma le tina o le aiga, masalo o le tausaga e 2000. O lo’u aiga lava lea ua ave ai le fa’amuamua."

“O le taimi ia o lo’o sologa lelei mea uma. O lo’o i ai la’u galuega, ou te faigaluega i leMatagaluega o Eletise ma ou te fa’afetaia lava le i ai o so’u aiga e fesoasoani mai ma lagolago mai taimi ta te lelava ai."

Ua pau lava sina popolega ia Asolua, o le saoasaoa o le alu i luma o le olaga a le au tupulaga.

“O le taimi nei e mo’i o lea ua avea a’u ma tama, ia ae e le uma ai lo’u tiute i lo’u aiga muamua lea iai o’o matua. Ou te fautua lava i nai ou tei laiti aua o le tiute lava lea ou te faia aua o a’u e ulumatua i le fanauga a o’u matua."

“E to’afitu matou o lo’o iai, to’atolu o lo’o faigaluega ma o isi o lo’o fa’auma a’oga."

“E fautua ai a e sili lava le usita’i i matua e maua ai mea lelei aua e misi loa na e fa’alogo i le mea e tatau ona fai, ona sasi fo’i lea o au aga e fai i lenei olaga. O matua lava o tatou faiaoga muamua."

“Faimai le tala a le Tusi e sili lava le usita’i na i le ga’o o le mamoe po’a. O le ala fo’i lena o lo’o ou taumafai ai ina ia usiusita’i ou tei laiti i matua aua o i lava e amatalia atu ai le ata o lo latou lumana’i. “

© Samoa Observer 2016

Developed by Samoa Observer in Apia