‘Fa’amuamua tatou fanau’ - Iona Lona

By Vatapuia Maiava ma Ilia L Likou 08 October 2016, 12:00AM

E le taumateina le tele o tapenapenaga   o lo’o ua alo atu ai nei le tele o matua o le atunu’u i le aso fa’apitoa a le fanau o le ā fa’amanatuina i le aso a taeao.

E mau ‘ese’ese fo’i finagalo fa’aalia o le to’atele o le i vaega e ao ona ave ai le fa’amuamua mo le aso a le fanau.

Aepeita’i, o le talitonuga o le tamā i a Lona Iona o Fa’ala Palauli, o le fanau o le tofi lea mai le Atua, ma e ao ona tapena uma itu e mana’omia e matua ona fa’atinoina mo le fanau.

“Ia o lenei taeao ma le fa’amoemoe e pei lava o le tapenaga o aso o le fanau ua mafua ai ona tumutumu fo’i i le maketi i Salelologa nei.

“Ia e pei ona outou silasila mai, e le gata ina ou sau i’inei aua le fa’atauina atu o lavalava papa’e o le fanau ma so’o se teuga, ae o a’u fo’i o lo’o sauniuni uma vaega mo si a’u fanau ina ia fiafia i lo latou aso.

“E ese ma le taua o le Aso Sa o tamaiti i totonu o si o tatou atunu’u , e le gata ina to manatu ai i le meaalofa ma le tofi ua aumai e le Atua, ae o se toe fa’amanatu fo’i i matua ina ia tapu’e lelei le ola o le fanau.

“Fai mai le Tusi Pa’ia , a a’oa’o le tamaititi a’o laititi e tusa ma ona ala e savali ai e matua ane lava e le toe te’a ese mai ai.

O Lona e i ai lana poloka i le maketi i Salelologa lea o lo’o fa’atauina ai le tele o lavalava papa’e o le fanau aemaise o teuga felanulanua’i mo le Lotu Tamaiti.

“Ia e le gata ina fa’ailoa nei oloa ma fa’atau atu ae o se vala’au fo’i  i le mamalu o le atunu’u e omai e fai fa’atau mo tamaiti. “O le a le mea e mana’o ai le tamaititi  ia e tatau lava ona fai aua o le lumana’i lea o aiga, nu’u ma ekalesia.

“O le a le mea e mana’o ai e tatau ona o tatou fa’afiafia ma fa’atau atu aua na’o le tasi lava le aso e tatou te fa’amaaluluina  aua le e soifua maloloina ai fo’i o lo latou ola tuputupu a’e.

“Ia o lo matou nu’u latou e le fesiligia le itu tau i Aoga Aso Sa, o le matua’i maopopo lava o le Aoga ona o galuega lelei o lo’o fa’atinoina e Fa’afeagaiga o lo’o galulue ai.

“O lo’o una’i ai pea  matua i le taua o le Aso Sa e ta’ua o le Aso Sa Pa’epa’e.“Ia mo tamaiti uma lava i Savai’i ma Samoa atoa, ia outou maua se Aso Sa Pa’epa’e fiafia.

By Vatapuia Maiava ma Ilia L Likou 08 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>