Lauga - “Ua filifilia outou e a’u”

By Rev. Petaia Setu 08 July 2018, 12:00AM

(Ioane 15: 16)

E le filifilia se tagata ta’alo i sona mana’o; o le mea lena e patino i le pulega a le au. E le gata e vaai le pulega i le malosi ma le agavaa, a o le loto foi ma le faaaogaina o le mafaufau. 

Ua le tāua ia Iesu pe sa a’oga pe leai foi; a o le loto ia fetaui ma le feau. I le ua le tu’ufauina le feau i so tatou mana’o, a o le silasila ma le pule a lē ana le feau. E tāua outou ua filifilia; ae sili atu ona tāua o Lē na faia le filifiliga. Fai mai Iesu, “Ua le filifilia a’u e outou, a ua filifilia outou e a’u.” O le filifiliga a Iesu.

O lē tasi lea fua o le alofa fa’aalia o Iesu i lona au soo. O le valaauina ma le filifilia o lona au soo mo le galuega molimau o le faaolataga. O le valaauina mo le galuega, ua le o se mea lea a oe ma a’u. E le o se matafaioi lea a le tagata. 

E patino lava i le Alii. Auā foi o le talalelei o le faaolataga, ua le ose mea a se lotu po se ekalesia; o le galuega a le Alii.  Na o le Alii lava na te silafia loto taitoatasi uma e mafai ona ola ai lana fanau agasala. Le loto ua mata’u i le Atua. Le loto ua ioe e lafoai mea uma ae mulimuli ia Iesu. Le loto ua mălie e ola mativa ma ta’uleagaina ona o le Alii ma lana talalelei.  

Le loto ua saunia e tali tiga ma sauaga ona o le amiotonu a le Atua ma lana upu moni. Le loto lea ua moni lona alofa i le Atua ma lana galuega.  O ia te oe se loto faapea? Oka! E sii oe i luga e agelu o le lagi pe a fai o lou loto lea o loo e galue ma auauna ai i le Atua Soifua. Poo le ā lava le ituaiga galuega ua tofia ai oe e le Alii, ia e manatua, e tasi le a’a o galuega uma, o le faaola. O lona uiga, ia ola nisi ia te oe. Fai mai Iesu, “ia outou fua mai ni fua”.

O le upu “outou” o loo i le mătua, o lona uiga, o ē ua talitonuina ma ua faatuatuaina e le Alii mo lana galuega. E le faapea la a tofi loa oe e fai ma taitai pe fai ma matai, poo le tofi  fo’i o a’u e fai ma faifeau, ona tauave ai a lea o le mau lea, o le tofiga mai le Atua. Leai. O le upu moni Samoa ia e malamalama, e le o tofiga uma ua filifilia e le Alii. O nisi foi tofiga o le filifiliga a tagata (1 Samuelu. 8:19-22). 

Fai mai Iesu, “ e iloa foi i latou i o latou fua” (Mataio. 7: 20). Ioe, sa ou ta’ua muamua i se tasi lauga ua mavae, e le faigofie ona fai oe ma soo. Auā o le soo, na te faia mea uma sa faia e Iesu. E savali ma ola i tulagā aao ma le soifuaga faa Keriso. Ou te toe faamanatu atu, “Every disciple is a Christian, but not every Christian is a disciple”. 

Ioe, e Kerisiano uma soo, ae le o Kerisiano uma e mafai ona fai mai soo. Na o Iesu na te silafia lelei i latou ua tatau i le galuega molimau faa-soo. Ua ou filifilia outou. O lana saunoaga manino i lona au soo e faapupula mai ai ia i tatou uma, o Ia e ana le galuega ae le o oe poo le ekalesia.

E le gata ina faatuatuaina e Iesu i latou ua valaauina ma filifilia mo le galuega, a o le tāpenaina o le lotoifale faasoo. Ia femalamalamaa’i ma fetausia’i. Ia lotogatasitasi ma tumau i le fealofani, o le ki lea o le auaunaga maopopo. O le faafitauli numera tasi lea o le galuega molimau o loo iai nei i le auaunaga faa Samoa, o le mana’o. E afua ai ona faufau i le tofi, ma asosi i le pule. O le ma’i matautia lea o loo apulusia ai le tōfa ma le faautautaga i le falaefu. Ua malomaloā ai tiga o le talalelei. Ua tapena e le Alii maopopoga. Tutū faatasi i le Alii. Pipii faatasi i le Pogai. O le la e le tumau i le vine na te le maua se mea lelei. E mago i la le agaga; i le, o le afi lona faasinomaga.

Samoa, o le pogai lea o le faamasino soo o aiga ma malepelepe faiga nuu. Fematea’i tagata faigaluega ma ōi le atunuu. Ua le maua fua o le alofa o Iesu. Ua tauaso ai foi ma le alofa i le uso a tagata, ona fai ai pea lea o oe ma pagota a le agasala. 

Pe ana e se i faalogo i le Alii ma tumau atu ia te ia, po ua maua lava e oe le manogi o le ola ua valaauina ai oe e le Alii, e ta’uta’u ma faailoa atu ai i tagata le alofa tunoa o le Atua ma le talalelei o le saolotoga.

Le Ekalesia e, ma le au molimau ole talalelei, o le a tonu lau galuega? E le tauilo ile silamaimoa mai a le atunuu le faigaluega sa valaauina e Iesu, ma le faigaluega ua filifili e ia lava le galuega a Iesu e tausi ai le toalua ma le fanau. 

E manino lelei i le maitau mai a Samoa. Poo le a lava le susua o au upu ma lou poto e faamatala le Tusi Paia, e tasi lava le ‘auga e tulimata’i e tagata, o lau amio. O le loto o loo fai ai le galuega. Pe mai le Atua poo oe lava. Silasila foi i le tōfa poto a lo tatou Alii; na ia filifilia le au faifaiva, kamuta, ao lafoga, o ē le aloa’ia ma faatauvaa e faavaeina le uluai aoga faafaifeau i le lalolagi. La lea ua oo i nei augātupulaga, o loo aooga uma ai lava le au popoto ma le au fai faailoga i mataupu ma aoaoga a le au faifaiva ia ma le au soo uma o Iesu. Le au uso e, pe vaivai poo le mativa ae ‘a tofi ma filifilia e Iesu, o kama sasao la ia e ola ai agaga ma saoloto ai tagata.

Le au uso e, o fua na o loo tautala iai Iesu. Ia maua agaga ma ia faaolaina tagata, ona foaiina atu ai lea ia te outou e le Tamā mea uma lava tou te ole atu ai. Ia tatou fealofani ma taitoatasi ona malamalama i le feau o le talalelei ma le mautinoa, o oe o le tagata na valaauina e Iesu e faaola tagata, ae le o le su’e ai o ou viiga ma au mea ile ola o le tagata. 

O tatou o auauna i tagata. E le o tatou o ni sifi. Fai mai Iesu, “o le Atalii o le tagata na le sau o ia ina ia auauna tagata ia te ia, ae peitai ia auauna o ia, ma foaiina atu lona ola o le togiola e sui a’i tagata e toatele”.(Mareko.10:45) O se tasi o tulafono a John Wesley mo faifeau uma e faapea, “Aua le fia alii; o le faifeau o le auauna ia i tagata”. (Mataio.20:25,26). O le faamanatu mai nai tuaa sa muaimalae i le galuega molimau, ‘A ‘e alofa i le galuega, e alofa foi le galuega ia te oe.

Le aufaigaluega e, e le o oe e pule i le galuega. Ua le filifilia a’u e outou, a ua filifilia outou e a’u. O oe ma a’u o le faigaluega. O lo tatou valaauina ia auauna. Ia fai i tatou ma auauna a Iesu Keriso i tiga ina ia maua e tagata uma le saolotoga e tapuai fiafia ma auauna ai ma le loto malie i le Alii lo tatou Faaola. Fai mai Iesu, Ou te fai atu ia te outou nei mea, ina ia outou fealofani. Po ua tonu ea i lou loto o oe o le tagata ua filifilia e Iesu? Pe ni a ni fua o lou valaauina?

 

Amene.

 

7737063/7783782

By Rev. Petaia Setu 08 July 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>