Sa matua mo’omia e se ‘aoga e tu-lalata i le taulaga, se fesoasoani, ina ua fa’ailoa iai e le Matagaluega o le Soifua Maloloina, o le a tapunia le latou a’oga, vagana ua fa’aleleia atoa fale-‘ese mo fanau-a’oga ma usita’ia tulaga mo’omia tau-Soifua Maloloina lelei. Na manino lava, ua matua le-talafeagai fale’ese a le A’oga Tulagalua a Tanugamanono ma ua mo’omia ai ona toe fa’alelei. 

A fa’amalosia ona tapuni o lea a’oga, o le a toe tigaina fo’i matua e tau-sa’ili nisi a’oga i nu’u tua’oi e ‘ave iai a latou fanau ma o le a toe tau sa’ili fo’i ‘auala e feoa’i ai. Talu ai, o le to’atele o matua e leai ni ta’avale, o le a le toe a’o’oga ai le to’atele o nei tamaiti ma to’atele ai fo’i ma faia’oga o le a leai ni galuega. 

I se fonotaga sa faia, na fa’ailoa ai i matua le tulaga fa’aletonu lea, ma ‘ia taumafai e sa’ili ni tupe po’o se fesoasoani fo’i e fo’ia ai lea fa’afitauli. O se tasi o matua nei – o se sui o le Ekalesia a Iesu Keriso o le ‘Au Pa’ia o Aso e Gata Ai, sa talosaga atu i Fa’alapotopotoga Fesoasoani a le Mamona mo se fesoasoani. Na talia lea talosaga mo se seleni ma fa’amaonia ai e le Ekalesia le faia o lea galuega (poloketi).

Na talai uma ‘ese puipui laupapa ua pala ae suia i puipui-piliki. Na ‘ave’ese atoa fale’ese, fa’afou ma toe fa’atu lelei. Na fa’afou vaega uma, o totoga mo’omia o fale’ese e aga’i iai fanau e aofia ai ma tapu fou ua fa’aopoopo. O le fola fou ua iai vaega masani (tiles) e fola ai, o puipui ma luga o fata o iai tapu-fufulu-lima. Ua mae’a ona toe vali atoa totonu ma fafo ma ua matagofie ma fetaui lelei mo nai fanau. 

O Fa’alapotopotoga Fesoasoani lava a le Ekalesia Mamona sa tu’ufa’atasia vaega uma mo lea poloketi. Na latou ta’ua, sa iai lava nai fa’afitauli muamua, i le tau sa’iliga lea o totoga mo’omia mo galuega Palama peita’i na malo lava le agalelei ma le alolofa na mafai ai ona ofo-fuaina nisi vaega na mafai ai ona fa’ama’eaina lea galuega manaia.

Sa galulue so’o-so’o-tau’au lava sui o le Ekalesia i le Siteki a Apia Tutotonu ma le Komiti A’oga, i le fa’atinoina o lea galuega.

I le aso na mae’a ai lea galuega ma tu’uina atu loa lea galuega, na talia fiafia e le Ta’ita’ifono o le Komiti A’oga ma o’otia ai e le Susuga a le Pule A’oga le ripine e tatala aloa’ia ai le fale’ese fou mo fanau. Na pepese fiafia fanau-a’o’oga i se pese fa’afetai e fa’aaliga lo latou talia fiafia o lea foa’i aoga.  

Na saunoa le Pule A’oga, o Si’utaufogapapa Salevao: “E momoli atu le fa’afetai tele i le Ekalesia mo mea uma ua outou gapatia ai, lea ua fa’asaoina ai le matou a’oga nei. Ua matagofie na’ua lenei galuega ma e momoli atu ai le fa’afetai tele.” 

Mo sui o le Ekalesia a Iesu Keriso o le ‘Au Pa’ia o Aso E Gata Ai, e talitonu maumaututu ma fa’atuatua i a’oa’oga fa’aleAgaga e pei ona iai i le Tusi o Mataio 25:40: “E moni ‘ou te fai atu ia te ‘outou, aua na faia e ‘outou i le tasi o e aupito itiiti o o’u uso nei, o a’u lava lea ua na outou faia iai.”