Mafatiaga o le leai se vai

By Fetalai Tuilulu’u 08 March 2017, 12:00AM

E toatele lava le mamalu ole atunu’u e pei o Temokisa Sefo e fa’asoa manatu ile itu lea ole vai.

E fa’amoemoe pea ile timu ma vai e lata ane ile nu’u aua le faiga o meaai ma isi mea fai a le aiga. A leai la se mea e maua mai ai se vai, po’o se tane vai fo’i ona faigata fo’i lea le faiga o tagamea, meaai aemaise vai inu.

Na maua le fa’atalatalanoaga a le Fofoga Samoa ma le tina o Temokisa, 35 le matua o lona soifua, le aso ananafi ae o lo’o maua se malologa mai i la’u ga vai mai ona tuaoi. 

“Ua tou silasila mai o le galuega masani lava lea o lo’o fai nei i aso uma. O lana lea tala.

“O se galuega faigata i a’i matou ma si a’u fanau le ausulusulu solo e su’e mai se vai aua mea’ai, o vai e taeele ai ae maise foi o tagāmea. 

“Mo le silafia ua lima nei tausaga talu ona leai se paipa, ma ua lima foi tausaga o talosagain ae leai lava se tasi ua aumaia. 

Sa fa’alia e le tinā le mafuaaga na tipi ai le latou paipa ona ua le maua le igoa na lesitala ai, ma fa’atonuina e totogi le $200 o le pili tuai pei tai o le mafatiaga o le tinā ona sa feso’ota’i lava le ofisa le vai e uiga i ia tulaga ae lei maua mai lava se tali mautū.

“Pau le tulaga ou te fa’anoanoa ai o le itū lea tau i le matou vai sa feso’otai lava i le isi tama faigaluega ma ave iai le fa’atuatau ae peitai sa leai se toe feso’otagi. 

“Ia na matou o’o lava i tai le ofisa le vai peitai e leai se tasi e faigaluega ai e o’o mai lava la i le taimi nei e leai lava se tala lata mai e fa’atatau le matou vai.  

 O le naunau o le tinā o le vai inu ma mea’ai  ia iai ma mautū.

“O le la’uina mai o le vai e fa’atau e sefe lava le tupe e fa’atau mai ai le vai. 

 “O le alagatupe si o matou aiga e fa’amoemoe lava si o’u to’alua fagota. O le faiva lava o lo’o faia ai nei le fatuaiga tausi. 

“O le ā lava le tupe maua o le tupe foi lea e fa’asoasoa lava aua le fanau aoga aemaise o le mea’ai ma mea fai le nu’u ma le ekalesia. 

Sa taua e le tinā o le taimi nei e lē gafatia se tane vai aua o le tupe maua mai i le aso foi e le lava mo le fa’asoaina o mea fai le aiga.  

“Ia o matou ia e leai se teugatupe aua foi o le taitai ona lava le fa’asoa i tupe maua i le aso. O lana lea tala. 

“E tele lava le mafatiaga o lo’o ia nei ona o ia vaega, leai se vai ma le isi foi itu o le leai se eletise a si o matou lava ia aiga. 

“Silasila atu i le eletise, sau mai gauta le isi matou aiga le uaea e ola ai le moli. O le moli foi e totogi e fa’atau e matou le power e ave e tā le mika le aiga ae fa’aola mai le matou moli. 

“O le aso lava lā ma le $20 e fa’atau o le power, a vifo ai le power ma le vai ae le gata i lea o tamaiti. 

“O fea a maua mai ai se tupe o ia vaega? O matou nei e leai se galuega, ua na’o le sami lava o lo’o fa’amoemoe iai. 

“Tele o taimi a leaga le tau  ma lē alu se faiva le tamā le aiga ona fai lea nai bob-corn e fa’atau e tau na maua ai sina seleni. 

“Pei o lesi lea itū e fai pe a leaga le tau ma ma’i le tamā le aiga ona le alu ai lea se faiva.  

Mo se tasi e fia fesoasoani le tinā ia Temukisa e maua le feso’otaiga le 7751156

By Fetalai Tuilulu’u 08 March 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>