Tatala se Pagota mo se taimi le-tumau

08 February 2016, 12:00AM

Ropitia e Pai Mulitalo Ale

Fa’aliliu e Maiava 

 

E to’atele pagota o le to’ese i Tafa’igata, na fa’aali le matua le-fiafia, ona o le tatala i tua o le pagota o Nazzario Chong Nee, i se “Fa’atagana Le-Tumau.” 

O Chong Nee, o se ali’i pagota na toe fa’afo’i mai i Samoa nei mai Niu Sila, sa ia gaoia le Faletupe a le Westpac i Vaitele i le ono tausaga talu ai, sa tatala i tua ona o se talosaga faia, ina ia ‘auai atu ai e fesoasoani i lona to’alua maitaga, na magalo i le palola ia Tesema o le 2015. 

Na ta’ua e le Sui Komesina o Falepuipui, o Sagaga Galu Frost, na te le o iloa I le taimi nei, pe fia le ‘umi na alu ai Chong Nee ma le falepuipui, peita’i na fa’ailoa mai, o le tasi lea o mata’upu o le a tilotilo iai le pulega, ona “e ono va’aia o ni faiga le-sa’o mo isi pagota o lo’o i le falepuipui.” 

Peita’i ane, o le mea tonu lea ua tupu nei, ua to’atele pagota ua fa’ailoa lo latou le-fiafia ona o le tatala i tua o Chong Nee, mai lava i le tausaga ua mavae.

Ae na toe fa’ailoa mai fo’i, e leai se Fa’atagana Le-Tumau e sili atu i le vaiaso e tasi, ma e masani lava ona na o nai aso, ae mafai ona toe fa’aopopo ona o mafuaga fa’apitoa. 

Ma ta’ua, o le aso e tatau ai ona toe fo’i atu Chong Nee ma fa’aopopo mai fo’i, ua mae’a ona siakia lea Fatagana.

Ae mo le mafuaga na fa’atagaina ai i tua le pagota, na ta’ua, “Sa mafatia lava le to’alua o Chong Nee ma le malosi ona o lo’o mamafa ma sa mo’omia tele ai o ia e fesoasoani i lona to’alua.” 

Na fa’ailoa fo’i e Sagaga, sa ta’oto le fafine ma taofia fa’atasi ai ma lana tama i le falema’i ona o popolega i lona soifua maloloina.

Na fa’aalia fo’i, e iai lava tu’utu’uga maumaututu e silasila iai le pulega a’o le’i fa’atagaina Chong Nee e alu i tua mo se taimi le-tumau. 

O le ulugali’i lea – Chong Nee ma lona to’alua – sa talosaga fa’atasi mo le palola i le tausaga talu ai, peita’i na o le fafine na manuia ai ae ua toe fa’atali se fa’ai’uga mo Chong Nee ia Iuni o le tausaga nei.

O pagota nei e tatala i tua mo se vaitaimi le-tumau, e iai lava tu’utu’uga ma’oti e fa’atatau tonu mo latou. 

E le fa’ataga ona va’aia i so’o se nofoaga faitele, pe ‘aveina se ta’avale, e fa’asa le inu-‘ava malosi po’o fuala’au-fa’asaina a ia nofo filemu i le nofoaga ua fa’atonuina e nonofo ai. 

E fa’atoa fa’ataga ona va’ai i nofoaga faitele, pe a iai ni vaega taua latou te mo’omia, pei o le va’aia o se foma’i ae tatau lava ona toe fo’i vave i o latou aiga, pe a mae’a.

Na ta’ua fo’i e Sagaga, o pagota uma e tatala i tu’utu’uga fa’apitoa fa’apea, e mulimulita’ia lava ina ia mautinoa, o lo’o usita’ia tu’utu’uga ma fa’atonuga sa tu’uina atu iai.

E fa’amauina fo’i e le Ofisa, numera o a latou telefoni, ia iloa ai po’o fea le oga-lalolagi e mafai ona su’e iai pe a mo’omia. 

Ua ono tausaga, lua masina talu ona fa’afalepuipuia Nazzario Chong Nee ona o le gaoia a’o fa’a’aupegaina, o le Faletupe o le Westpac Bank i Vaitele.

Sa toe-tipoti mai Niu Sila i tausaga ua mavae, ona o ana solitulafono e aofia ai le tu-fua i fanua o isi, o le gaoi, gaoi-ta’avale ma isi solitulafono tau-ta’avale.

08 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>